HOSEA 2

₂“Khalemang 'm'a lōna,

le mo khaleme,

hoba eena ha e sa le mosali oa ka,

le 'na ha ke sa le monna oa hae.

Lebososelo la bootsoa a le felise,

linyatsi li tlohe sefubeng sa hae.

₃Ho seng joalo ke tla mo tsolisa,

a be pōōshō sa mohla a tsoaloang;

ke mo etse hore a ke lehoatata,

ke mo fetole e be sebataōlo,

ke 'molaee ka ho 'molaisa lenyora.

₄Bana ba hae nke ke ka ba hauhela,

hoba ke bana ba tsoetseng,

ba tsoetsoeng ka bootsoa.

₅'M'a bona a n'a iketsa seotsoa,

a itlontlolla ha a ba emōla,

a re: ‘Ke tla ikela

le melingoana ea ka,

eona e mphang lijo, e mphe le metsi,

e mphang boea, e mphe le motsitla,

e mphang ole, e mphe le lino tsa ka.’

₆Ka meutloa tsel'a hae ke tla e ralla,

ke be ke e thibe ka ho haha lerako,

a se k'a tsamaea

ka tsela tsa hae tsa khale.

₇O tla manakisa melingoan'a hae,

a e manakise, a se k'a e tšoara;

o tla e batlisisa, a se k'a e fumana.

Ke moo he a tla re:

‘Ke tla khutlela

monneng oa ka oa pele,

ho eena ke ne ke iketla

ho feta kajeno.’

₈O n'a sa tsebe hore mofani ke 'na,

mofani oa koro le veine le ole,

ea mo fileng silefera

la khauta e ngata,

eo ba sebelitseng Baale ka eona.

₉“Kahoo ke tla mo amoha

koro ea ka e butsoitse,

ke mo amohe veine ea ka e ritelehile,

ke mo amohe boea le motsitla oa ka,

tseo a patang bofeela ba hae ka tsona.

₁₀Joale bofeela ba hae

ke tla bo pepesa,

ke bo pepese

mahlong a melingoan'a hae;

ha ho ea tla mo namolela

matsohong a ka.

₁₁Ke tla felisa menyaka eohle ea hae,

mekete ea hae ea selemo ka seng,

ea ho thoasa ha khoeli

le ea Lisabatha,

mekete eohle e halalelang

ke e felise.

₁₂Ke tla senya fate tsa morara,

ke senye le tsa feiee,

tseo a reng ke moputso oa hae,

moputso o tsoang

ho melingoana ea hae,

melingoana eo a e ratang haholo.

Fate tseo ke tla li etsa mofero,

batana tsa naha li itjelle tsona.

₁₃Ke tla mo otlela

matsatsi a hae a pele,

matsatsi a ho sebeletsa bo-Baale,

ao ka 'ona

a n'a ba chesetsa mokubetso,

a ikgabisitse ka masale le mabenyane,

a manakisana le melingoana ea hae,

'me 'na a s'a a bile a ntebetse,”

₁₄“Bonang, joale ke tla mo qekisa,

ke ee le eena koana lehoatateng,

teng ke bue le eena ka lerato.

₁₅Moo teng ke tla 'museletsa,

ke 'museletse lirapa tsa morara,

khohlo ea Akore

k'e etse monyako oa tšepo.

Teng o tla tsanyaola,

a tsanyaole sa bocheng ba hae,

sa mohla a neng a nyoloha Egepeta.

₁₆“Mohl'a tsatsi leo,”

“uena u tla mpitsa: ‘Monna oa ka’,

ha u sa tla hlola u mpitsa: ‘Baale’,

e leng ho bolela: ‘Mong'a ka’.

₁₇Mabitso a bo-Baale ke tla a felisa,

le ho bitsoa a ke ke a hlola a bitsoa.

₁₈Mohl'a tsatsi leo

ke tla ba etsetsa selekane,

ke ba etsetse sona

le batana tsa naha,

ke ba etsetse sona

le nonyana tse fōfang,

le tsona lihahabi

tse hōlōbang mobung.

Ke tla felisa seqha le sabole ea ntoa,

ke li felise hona naheng eo,

bohle ba tle ba phele,

ba iphelele ka khotso.

₁₉Ke tla u nyala u be oa ka kamehla,

ke u nyale ka toka le ka ho loka,

ka lerato le ka kutloelo-bohlōkō.

₂₀Ke tla u nyala ka botšepehi,

'me u tla tseba hore ke 'na Morena.

₂₁“Mohl'a tsatsi leo ke tla araba,”

“ke tla arabela maholimo,

maholimo 'ona a arabele lefatše.

₂₂Lefatše le lona le tla arabela,

le melise koro le veine le ole,

tsena li arabele Jesereele.

₂₃Ke tla mo jakisa naheng ena,

ke hauhele

ea neng a bitsoa Mohanuoa;

ho bao e neng e se sechaba sa ka

ke tla re: ‘Le sechaba sa ka’,

bona ba re: ‘U Molimo oa ka.’ ”