HOSEA 10

₁Iseraele ke morara

o hōlang haholo;

ha tholoana tsa hae

li ntse li eketseha,

lialetare tsa hae

le tsona lia eketseha.

Ha mobu oa hae o atlehisa lijalo,

le eena o ntlafatsa lifika,

fika tse khumameloang.

₂Pelo tsa Baiseraele li tletse mano,

kahoo ba fumantšoa kotlo ea bona.

Molimo o tla heletsa

lialetare tsa bona,

a lihe lifika tsa melingoan'a bona.

₃Joale ba tla re:

“Rōna ha re na khosi,

hobane ha rea ka ra tšaba Morena.

Esita leha re ne re e-na le khosi,

khosi eo e n'e tla re thusa ka eng?”

₄Ba etsa litšepiso tsa bosaoana,

ba hlapanye ka leshano,

ba etse le lilekane,

kahoo ho hlaha linyeoe,

nyeoe tse ngata-ngata,

li ke monatja o mela har'a boleme.

₅Baahi ba Samaria ba tla thōthōmela,

ba thōthōmetsoe ke manamane,

manamane a Bete-Afene.

Chaba sa Samaria

se tla llela namane eo,

baprista ba eona le bona ba e llele,

bona baprista ba neng ba e thabetse,

ba nyakalletse tlōtla ea namane,

tlōtla e seng e tlositsoe,

e tlositsoe ho eona.

₆Namane eo e tla isoa Asiria,

e le nyehelo ho khosi e kholo.

Efraime eena o tla hlajoa ke lihlong,

Iseraele a soabisoe

ke keletso tsa hae.

₇Samaria le khosi ea eona

li tla hōhōloa,

li hōhōloe

sa mahōhōli holim'a metsi.

₈Libaka tsa borapeli, tsa Afene,

li tla felisoa,

tsona tseo Iseraele

a etsetsang sebe ho tsona,

aletare tsa bona li mele meutloa,

li mele tšehlo.

Ba tla re ho lithaba:

“Re khurumetseng!”

Ho maralla ba re:

“Re oeleng holimo!”

₉“Uena Iseraele,

haesale u etsa sebe,

u se entse

ho tloha mehleng ea Gibea,

bofetoheli ba hao

bo qala moo Gibea,

hona moo Gibea

ntoa e tla u khaoletsa teng.

₁₀Ke tla futuhela bafetoheli,

ke ba khahlole,

ke ba khōbōkanyetse

mabōtho a balichaba,

ke ba otlele libe tsa bona,

libe tse ngata-ngata.

₁₁Efraime ke khongoana

e thapisitsoeng,

ke khongoana

e ratang ho pōla mabele;

molaleng oa eona o motle

ka bea joko,

ka bofella Efraime mohomeng

hore a leme,

Jakobo eena

a tl'a phōphōthe makoete.

₁₂Motho ka mong

a khathe thite ea hae,

a itjalle ho loka

ho tsoalang lerato,

a kotule molemo

o tsoaloang ke botšepehi.

Nako e fihlile ea ho batla Morena,

ea ho 'matla ho fihlela a e-tla,

a le nesetsa pul'a mahlohonolo.

₁₃Empa le ile la jala bokhopo,

kahoo le kotutse tholoan'a bokhopo,

la ja le eona tholoan'a leshano.

Kahobane u itšepetse

kariki tsa hao tsa ntoa,

u tšepile le boieane

ba mabōtho a hao,

₁₄morusu oa ntoa

o tla tsohela chaba sa hao,

qhobosheane tsohle tsa hao

ebe lia ripitloa,

li ripitloe

sa mohl'a tsatsi lane la ntoa,

ha Shalemane

a n'a ripitla Bete-Arabeele,

a pshatlaka basali le masea a bona.

₁₅Le uena Bethele,

ho tla ba tjena ho uena,

ka baka la bokhopo

bo boholo ba hao.

Ha mafube a meso

a hlaha ka bochabela,

khosi ea Iseraele

e tla ripitleloa ruri!”