TŠIMOLOHO 50

₁Josefa a kopa ntat'ae ka molala, 'me ha a ntse a mo aka meokho ea hae ea keleketla holima sefahleho sa hae. ₂Josefa a laela bahlanka ba hae ba lingaka ho omeletsa setōpō sa ntat'ae ka meriana; eaba lingaka li omeletsa setōpō sa Iseraele. ₃Ha feta matsatsi a mashome mane, hobane ho omeletsa setōpō ho nka matsatsi a makaalo, 'me Baegepeta ba mo llela ka matsatsi a mashome a supileng.

₄Ha matsatsi a bofifi a fetile, Josefa a bua le ba ntlo ea Faro, a re: “Haeba le nkhauhetse, le ke le bolelle Faro, le re: ₅‘Ntate o ile a ntlhapantša, a re: Bona, ke lekhatheng la ho shoa; u tle u e'o nkepela lebitleng leo ke icheketseng lona naheng ea Kanana.’ Kahoo kea u kōpa: ak'u ntumelle ke nyolohe, ke e'o epela ntate, ke tle ke boele ke khutle.”

₆Eaba Faro o re: “Nyoloha, u e'o epela ntat'ao, joalokaha a u hlapantšitse.”

₇Josefa a nyoloha ho ea epela ntat'ae, 'me bahlanka bohle ba Faro, le baholo ba lelapa la hae, le baholo bohle ba naha ea Egepeta, ba nyoloha le eena. ₈Le bohle ba lelapa la Josefa, le bana babo, le ba lelapa la ntat'ae, ba ea le eena; ba siea bana ba bona feela, le mehlape ea linku, le ea likhomo, seterekeng sa Goshene. ₉A nyoloha le likariki, le bapalami ba lipere, 'me ea e-ba lebōtho le leholo haholo.

₁₀Eare ha ba fihla Seotlong sa Meutloa, kamose ho Jorodane, ba lla sello sa 'mokotsane, 'me Josefa a qeta matsatsi a supileng a llela ntat'ae. ₁₁Ha baahi ba naha eo, e leng Bakanana, ba utloa sello sa bofifi Seotlong sa Meutloa, ba re: “Sello sena ke se bohlōkō haholo ho Baegepeta!” Ka lebaka lena sebaka seo, se kamose ho Jorodane, ba se rea lebitso la Abele-Miseraime.

₁₂Bara ba Jakobo ba mo etsetsa joalokaha a ne a ba laetse; ₁₃ba mo isa naheng ea Kanana, ba mo epela lehaheng le neng le le tšimong ea Makapela, e pel'a Mamore, leo Aborahama a neng a le rekelle le tšimo ho Eferone oa Mohete, hore e be setša sa hae sa mabitla. ₁₄Hoba a epele ntat'ae, Josefa a khutlela Egepeta, eena le bana babo, le bohle ba neng ba nyolohile le eena ho ea epela ntat'ae.

₁₅Ha bana babo Josefa ba bona hore ntat'a bona o shoele, ba re: “Mohlomong Josefa o tla re hloea, a phetetse bobe bohle boo re neng re bo etse ho eena.” ₁₆Eaba ba rōmela molaetsa ho Josefa, ba re: “Ntat'ao a e-s'o shoe a na a re laela, a re: ₁₇‘Le tle le bue tjena ho Josefa: Rea u rapela hle: Ak'u tšoarele bana beno molato oa bona le sebe sa bona, hobane ba ne ba u etse hampe.’ Joale rea u rapela, ak'u tšoarele molato oa bahlanka ba Molimo oa ntat'ao.” Josefa a lla ha a utloa.

₁₈Joale bana babo le bona ba tla, ba itihela kapele ho eena, ba re: “Bona, re makhoba a hao.”

₁₉Empa Josefa a re ho bona: “Le se ke la tšoha; na 'na ke Molimo? ₂₀Ke 'nete, lōna le ne le ntheretse bokhopo, empa Molimo o ile a bo fetola molemo, e le hore a tle a etse joalokaha a entse kajeno, a pholose sechaba se sengata. ₂₁Joale he, se tšoheng; 'na ke tla le fepa le bana ba lōna.” A ba tšelisa, a ba thoba lipelo.

₂₂Josefa a aha Egepeta le ba ntlo ea ntat'ae, 'me a phela lilemo tse lekholo le leshome. ₂₃Josefa a bona molōko oa boraro oa bana ba Efraime; le bana ba Makiri, mora oa Manase, bao Josefa a ileng a ba nka e le bana ba hae.

₂₄Eaba Josefa o re ho bana babo: “Ke se ke le lekhatheng la ho shoa, empa Molimo o tla le etela, a le nyolle naheng ena, a le ise naheng eo a neng a e hlapanyetse Aborahama, le Isaka, le Jakobo hore o tla ba nea eona.” ₂₅Josefa a re bara ba Iseraele, ba ikane hore, mohla Molimo a ba etelang, ba tla tlosa masapo a hae Egepeta.

₂₆Josefa a shoa a le lilemo tse lekholo le leshome, 'me ba omeletsa setōpō sa hae, ba se kenya lekeseng, moo Egepeta.