TŠIMOLOHO 49

₂“Bōkanang le mamele,

bara ba Jakobo,

mamelang ntat'a lōna Iseraele.

₃“Rubene, ke uena letsibolo la ka;

ke uena matla a ka,

le tholoana ea pele ea bonna ba ka;

u feta ba bang

ka seriti le ka bonatla.

₄U ka metsi a tsapolang,

empa u ke ke

ua ba feta ka boholo,

hobane ua na ua kena

kobong tsa mohats'a ka,

ua hlompholla phate tsa ka

ka ho hloella ho tsona.

₅“Simeone le Levi

ke bana ba letsoele,

lihlomo tsa bona ke tse sehlōhō.

₆Moea oa ka

o se kene mererong ea bona,

pelo ea ka

e se kene mokhatlong oa bona,

hobane ha ba halefile

ba na ba bolaea batho,

ha ba halefetse lefeela

ba khaola liphōlō mesifa.

₇Ho rohakoe bohale ba bona,

hobane bo ne bo tšabeha;

le khalefo ea bona,

hobane e ne e se na mohau!

Ke tla ba qhalakanya

har'a bana ba Jakobo,

ke ba hasanye

har'a fatše la Iseraele.

₈“Uena, Juda

bana beno ba tla u rorisa,

tsoho la hao

le tla khama lira tsa hao;

bana beno

ba tla khumama kapele ho uena.

₉Juda ke taoana!

U nyolohetse thabeng,

mora oa ka, u tsoa hapa;

ua bōrama,

u qachama joaloka tau,

'me, joaloka tauhali,

u ka tšosoa ke mang?

₁₀Lere la bokhosi

le ke ke la tloha ho Juda,

le lere la bolaoli ho litlōhōlō tsa hae,

ho fihlela mong'a lona a fihla,

eena eo lichaba li tla mo mamela.

₁₁O hōleha tonki ea hae morareng,

le pohoana ea tonki

morareng o khethehileng;

o hlatsoa liaparo tsa hae ka veine,

le kobo ea hae ka lero la morara.

₁₂Mahlo a hae a tlerefetse ke veine,

meno a hae a masoeu ke lebese.

₁₃“Sebulone

o tla aha lebōpong la leoatle,

e tla ba eena kou ea likepe,

meeli ea hae e tla fella Sidone.

₁₄“Isakare ke tonki e matla,

o bothile pakeng tsa masaka.

₁₅O bona hore ho phomola

ho monate,

le hore naha ea khahleha;

a sekamisa lehetla la hae ho jara,

a sebeletsa mong'a hae e le lekhoba.

₁₆“Dane o tla busa sechaba sa hae

e le e mong oa merabe ea Iseraele.

₁₇Dane e tla ba nōha e ka tseleng,

e be marabe ea linaka ka tseleng,

ea lōmang litlhako tsa pere,

mopalami oa eona a oe ka sanketse.

₁₈“Ke lebeletse

ho pholosoa ke uena, Morena.

₁₉“Gade o tla futuheloa

ke mabōtho a bahlabani;

eena o tla ba phalalisa,

a ba hate lirethe.

₂₀“Lijo tsa Ashere e tla ba tse malōli,

o tla fana ka limonate tsa khosi.

₂₁“Nafthali ke khama ea molala-sekoai,

e tsoalang manamane a matle.

₂₂“Josefa ke tholoana

ea sefate se behang,

tholoana ea sefate se behang,

se pel'a seliba,

makala a sona

a rarahane holim'a lerako.

₂₃Ba fulang ka metsu baa mo hlorisa,

ba liqha baa mo phephetsa,

₂₄empa seqha sa hae se ntse se tiile,

o matjato liatleng

le matsohong a hae;

o thusoa ke matsoho

a Ea Matla oa Jakobo,

e leng Molisa, Lefika la Iseraele.

₂₅Molimo oa ntat'ao a ke a u thuse,

eena Ea Matla 'ohle

a ke a u hlohonolofatse,

ka mahlohonolo

a tsoang holimo, leholimong,

ka mahlohonolo

a tsoang malibeng katlas'a lefatše,

ka mahlohonolo

a ho tsoala le ho nyantša.

₂₆Mahlohonolo a ntat'ao

a feta mahlohonolo a lithaba

tsa mehla eohle,

le mekhabo ea maralla

a mehla eohle;

kaofela a ke a be holim'a hlooho,

hlooho ea Josefa,

a be holim'a phatla,

ea eo e leng mokhethoa

ho bana babo.

₂₇“Benjamine ke phiri e harolakang,

hoseng e khetšela tse bolailoeng,

mantsiboea e arola khapo ea eona.”