1Josefa a kena, a bolella Faro, a re: “Ntate le bana beso, le mehlape ea bona ea linku le ea likhomo, le tsohle tseo ba nang le tsona, ba fihlile ho tsoa naheng ea Kanana, 'me joale ba se ba le seterekeng sa Goshene.” 2Eaba o nka ba bahlano ba bana babo, a ba bea kapele ho Faro.
3Faro a re ho bana bao babo: “Mosebetsi oa lōna ke ofe?”
Ba araba Faro, ba re: “Bahlanka ba hao ke balisa ba mehlape ea linku, joaloka bo-ntat'a bona.” 4Ba boela ba re ho Faro: “Re tlile ho tla jaka naheng ena, hobane mehlape ea bahlanka ba hao ha e na makhulo, kaha tlala e kholo naheng ea Kanana. Ka hona rea u kōpa: U ke u lumelle bahlanka ba hao ho aha seterekeng sa Goshene.”
5Faro a bua le Josefa, a re: “Ntat'ao le bana beno ba tlile ho uena. 6Naha ea Egepeta ke ena kapele ho uena. Bea ntat'ao le bana beno moo naha e leng ntle, ba ahe seterekeng sa Goshene. Haeba u tseba hore ho na le banna ba tšepahalang har'a bona, u ba etse balisa ba mehlape ea ka.”
7Eaba Josefa o tlisa ntat'ae Jakobo, o mo emisa kapele ho Faro, 'me Jakobo a hlohonolofatsa Faro. 8Joale Faro a re ho Jakobo: “Lilemo tsa hao li kae?”
9Jakobo a re ho Faro: “Lilemo tsa bojaki ba ka mona lefatšeng ke lekholo le mashome a mararo. Lilemo tsa bophelo ba ka li bile khutšoanyane, tsa e-ba thata, 'me ha lia fihla lilemong tseo bo-ntate ba li phetseng.” 10Eaba Jakobo o hlohonolofatsa Faro, 'me a tloha ho eena.
11Josefa a bea ntat'ae le bana babo, a ba khethela sebaka sa bolulo naheng ea Egepeta, moo naha e leng ntle seterekeng sa Ramesese, joalokaha Faro a ne a laetse. 12Josefa a fepa ntat'ae, le bana babo, le lelapa lohle la ntat'ae, ho ea ka palo ea baphelisuoa.
Puso ea Josefa nakong ea tlala
13Ho ne ho se lijo lefatšeng lohle, hobane tlala e ne e le ea bo-ja-likata, 'me naha ea Egepeta le ea Kanana tsa ba tsa felloa ke lijo ka baka la tlala. 14Josefa a bōkella chelete eohle e neng e fumanoa naheng ea Egepeta le ea Kanana ha ho ntse ho rekisoa koro, 'me a e isa tlung ea Faro. 15Eare ha chelete e fela naheng ea Egepeta le ea Kanana, Baegepeta bohle ba tla ho Josefa, ba re: “Re fe lijo! U re re shoe u ntse u re talimile, hobane feela re feletsoe ke chelete?”
16Josefa a araba, a re: “Tlisang liphoofolo tsa lōna; ke tla le ananyetsa lijo ka liphoofolo tsa lōna, haeba chelete e felile.” 17Ba tlisa liphoofolo tsa bona ho Josefa, me Josefa a ba ananyetsa lijo ka lipere, le linku, le likhomo, le litonki. Selemong seo a ba ananyetsa lijo ka liphoofolo tsa bona tsohle.
18Ha selemo seo se felile, ba tla ho eena ka selemo sa bobeli, ba re: “Ha re ka ke ra patela morena oa rōna hore chelete e felile, le leruo la liphoofolo le feletse ho moren'a ka. Ha rea salloa ke letho leo moren'a ka a ka le bonang, haese 'mele ea rōna le masimo a rōna. 19Re ka shoela mahlong a hao ka baka lefe, rōna le masimo a rōna? Re rekelle le masimo a rōna ka lijo, hore rōna le masimo a rōna re be makhoba a Faro. Re fe peō re tle re phele, re se ke ra shoa, le hore masimo a se ke a lala.”
20Eaba Josefa o rekela Faro naha eohle ea Egepeta, hobane Moegepeta e mong le e mong o ile a rekisa tšimo ea hae, kaha tlala e ne e ba imetse, 'me naha ea e-ba ea Faro. 21Batho bona a ba fallisetsa metseng, ho tloha karolong e 'ngoe e Egepeta ho isa ho e 'ngoe. 22Ke masimo a baprista feela ao a sa kang a a reka, hobane baprista ba ne ba neoa moputso ke Faro, ba phela ka oona, 'me ka lebaka lena ba se ke ba rekisa masimo a bona.
23Eaba Josefa o re ho sechaba: “Bonang, kajeno lōna le masimo a lōna ke le reketse Faro. Joale peō ke ena, 'me le tla jala masimo. 24Ka nako ea kotulo le tla nea Faro karolo e le 'ngoe ho tse hlano ea tse kotutsoeng. Karolo tse 'ne e tla ba tsa lōna, e be peō, le lijo tsa lōna le tsa malapa a lōna, le lijo tsa bana ba lōna.”
25Ba re: “U re pholositse! A re ke re fumane mohau ho moren'a ka, 'me re tla ba makhoba a Faro.”
26Eaba Josefa o etsa molao naheng ea Egepeta, o ntseng o le teng le kajeno-ea-bokajeno, oa hore Faro a neoe karolo e le 'ngoe ho tse hlano ea tse kotutsoeng. Ke masimo a baprista feela ao e sa kang ea e-ba a Faro.
Taelo ea Jakobo ea ho qetela
27Eaba Baiseraele ba aha naheng ea Egepeta, seterekeng sa Goshene; ba e rua, ba ata, ba ngatafala haholo.
28Jakobo a phela naheng ea Egepeta lilemo tse leshome le metso e supileng; kahoo Jakobo a phela lilemo tse lekholo le mashome a mane a metso e supileng. 29Ha nako ea ho shoa ha Iseraele e atamela, a bitsa mora oa hae Josefa, a re ho eena: “Haeba ke fumane mohau ho uena, ak'u bee seatla sa hao ka tlas'a serope sa ka. Tšepisa hore u tla 'ne u nthate, u tšepahale, 'me u ke ke ua nkepela Egepeta. 30Mohla ke shoang joaloka bo-ntate, u nkuke, u 'ntše Egepeta, u e'o nkepela mabitleng a bona.”
Josefa a araba, a re: “Ke tla etsa kamoo u boletseng kateng.”
31Iseraele a re: “Ntlhapanyetse!” A mo hlapanyetsa. Iseraele a inamisetsa hlooho mosamong.
