Josefa oa lekoa
1Josefa a theoleloa Egepeta. Potifaro, tōna ea Faro le mookameli oa balebeli, monna oa Moegepeta, a mo reka ho Baishemaele ba neng ba mo tlisitse moo.
2Morena a ba le Josefa, ea e-ba monna ea nang le katleho, a phela tlung ea mong'a hae oa Moegepeta. 3Mong'a hae a bona hore Morena o na le eena, le hore o atlehisa tsohle tseo a li etsang. 4Mong'a Josefa a moo hauhela, 'me Josefa a mo sebeletsa. Mong'a hae a mo etsa mookameli oa lelapa la hae, le molaoli oa tsohle tseo a nang le tsona. 5Ho tloha ka nako eo mong'a hae a neng a mo etsa mookameli oa lelapa la hae, le oa tsohle tseo a nang le tsona, Morena a hlohonolofatsa lelapa la Moegepeta eo, ka baka la Josefa; mahlohonolo a Morena a ba holim'a tsohle tseo a nang le tsona, lapeng le masimong. 6Eaba tsohle tseo a nang le tsona o li bea taolong ea Josefa, 'me ha a ntse a e-na le eena a se ke a tšoenngoa ke letho, haese feela ho itjella. Josefa o ne a le motle, a khahleha.
7Kamora' tsena mosali oa mong'a hae a lakatsa Josefa, 'me a re ho eena: “Robala le 'na!”
8Empa Josefa a hana, a re ho mosali oa mong'a hae: “Bona, mong'a ka ha a tšoenngoe ke letho ha ke le teng, tlung mona, 'me tsohle tseo a nang le tsona o li beile matsohong a ka. 9Tlung ena ha a moholo ho 'na; hape ha ho letho leo a nkhanelang ka lona, haese uena, hobane u mosali oa hae. Joale nka etsa bokhopo bo bokaalo joang, ka siteloa Molimo?” 10Le hoja mosali a 'nile a bua le Josefa ka matsatsi 'ohle, ha aa ka a mo mamela, leha e le ho robala le eena, kapa le ho ba le eena.
11Ka tsatsi le leng Josefa a kena ka tlung ho etsa mosebetsi oa hae, 'me ka tlung eo ho ne ho se na le ea mong oa bahlanka ba lelapa leo. 12Mosali eo a mo tšoara ka seaparo sa hae, a re: “Robala le 'na!” Empa Josefa a siea seaparo sa hae matsohong a mosali, a balehela kantle.
13Eare ha mosali a bona hore o siile seaparo sa hae matsohong a hae, o balehetse kantle, 14a hōoeletsa bahlanka ba lelapa la hae, a re ho bona: “Bonang, Potifaro o re tliselitse Moheberu ho tla re hlompholla! O kene ka ho 'na ka mona ho tla robala le 'na, eaba ke hōoeletsa ka lentsoe le phahameng! 15Ha a utloa ke phahamisa lentsoe, ke hōoeletsa, a siea seaparo sa hae ho 'na, a balehela kantle.”
16Eaba o bea seaparo seo sa Josefa pel'a hae, ho fihlela mong'a hae a fihla lapeng. 17A 'molella 'ona mantsoe ao, a re: “Mohlanka enoa oa Moheberu, eo u re tliselitseng eena, o ile a kena ka ho 'na ho tla mpeta, 18empa eitse hang-hang ha ke phahamisa lentsoe, ke hōoeletsa, a siea seaparo sena ho 'na, a balehela kantle.”
19Eare ha mong'a hae a utloa lipolelo tsena tsa mosali oa hae, tseo a li buang ho eena, tse reng: “Mohlanka oa hao o nkentse tjena le tjena,” khalefo ea hae ea tlōkōma. 20Mong'a Josefa a mo nka, a mo kenya chankaneng, sebakeng seo batšoaruoa ba khosi ba neng ba koalloa ho sona, 'me a ba moo chankaneng.
21Empa Morena a ba le Josefa, a mo hauhela, a etsa hore mookameli oa chankana a mo rate. 22Mookameli oa chankana a bea batšoaruoa bohle ba chankaneng tlas'a taolo ea Josefa, 'me tsohle tse etsoang moo li ne li etsoa ka taelo ea Josefa. 23Mookameli oa chankana o ne a se a sa itšoenye ka letho le taolong ea Josefa, hobane Morena o ne a e-na le eena, 'me tsohle tseo a neng a li etsa Morena o ne a li atlehisa.
