Ho timetsoa ha Sodoma le Gomora
1Mangeloi ao a mabeli a fihla Sodoma ka phirimana, 'me Lota o ne a lutse khorong ea motse oa Sodoma. Eare ha Lota a a bona, a ema, a ea a khahlanyetsa, a fihla a itihela fatše ka sefahleho. 2Eaba o re: “Benghali ba ka, kea le rapela, fapohelang tlung ea mohlanka oa lōna, le robaletse, le itlhatsoe maoto, le tle le tsohe ka malungoalungoana, le tsoele pele leetong la lōna.”
Mangeloi a re: “Che, re tla ithoballa mabeleng a motse.”
3Empa a a pheella ka matla, 'me a fapohela ho eena, a kena tlung ea hae. A a lokisetsa lijo, a a phèphèla bohobe bo sa lomosoang, 'me a e-ja. 4Empa eare ho e-s'o robaloe, banna ba motse, banna ba Sodoma, bahlankana le maqheku, banna bohle-bohle, ba etsetsa ntlo sakana-la-nkōpe. 5Ba hōoeletsa Lota, ba re: “Bana bale ba fihlileng ha hao phirimaneng ee ba kae? Ba tlise koano ho rōna, re tl'o ba ja maotoana!”
6Lota a tsoa monyako, a koala lemati, a ea ho banna ba kantle, 7'me a re: “Kea le rapela, bana beso; se keng la etsa bokhopo bo tjena. 8Bonang, ke na le barali ba babeli, ba e-s'o robale le monna; ha ke mpe ke le tlisetse bona, le etse seo le se ratang ka bona. Feela banna bana bona le se ke la ba etsa letho, hobane ba tšireletsong ea ka.”
9Empa banna ba Sodoma ba re: “Suthela koana!” Eaba ba re: “Mothoana enoa ke mojaki feela, empa o rata ho re laela! O rata ho ba moahloli! Joale re tla u etsa hampe le ho feta bona!” Ba etsa senkhōme holim'a Lota, 'me ba atamela hore ba robe lemati. 10Empa banna ba ka tlung ba nanabetsa matsoho a bona, ba hulela Lota ka tlung ho bona, ba koala lemati. 11Eaba ba foufatsa banna ba neng ba le monyako oa ntlo, ba banyenyane le ba baholo, hoo ba bileng ba khathala ke ho 'na ba phopholetsa hore na lemati le hokae.
12Joale banna bao ba re ho Lota: “Na u na le ba bang moo: bakhoenyana, bara, barali, kapa mang le mang oa heno ea motseng oo? Ba ntše sebakeng sena, 13hobane re lekhatheng la ho se timetsa! Sello se qosang motse ona se seholo kapele ho Morena, 'me Morena o re rōmetse ho tla o timetsa!”
14Lota a tsoa, a ea bua le bakhoenyana ba hae, ba nkileng barali ba hae, a re: “Tsohang, le tsoe motseng ona, hobane Morena o lekhatheng la ho o timetsa!” Empa bakhoenyana ba bona eka oa soasoa.
15Eare ha mafube a hlaha, mangeloi a pheella Lota, a re: “Tsoha, u nke mosali oa hao, le barali ba hao ba babeli, ba leng teng mona, u balehe; esere ua timela ha motse ona o otloa.”
16Empa a lika-lika; kahoo banna bao ba mo hula ka letsoho, 'moho le mosali oa hae, le barali ba hae ba babeli, hobane Morena o ne a mo hauhetse. Ba mo ntšetsa kantle ho motse.
17Ha ba se ba ba ntšelitse kantle, ba re ho bona: “Balehang le ipholose! Le se ke la hetla, kapa la ema kae kapa kae har'a phula. Le balehele thabeng, ho seng joalo le tla timela!” 18Lota a re: “Ho se be joalo, hle, Morena oa ka. 19Mohlanka oa hao o fumane mohau ho uena, 'me u nkhauhetse haholo ka ho mpholosa. Empa ke sitoa ho balehela thabeng, esere koluoa ea mphumana, 'me ka shoa. 20Bona, motse ono o haufi hoo nka balehelang ho oona, o bile o monyenyane. A nke ke balehele ho oona hle! Na ha o monyenyane, hore ke tle ke pholohe?”
21Morena a re ho eena: “Bona, le tabeng ena ke u mametse; ha ke na ho timetsa motse oo u buileng ka oona. 22Potlaka, u balehele ho oona, hobane nke ke ka etsa letho, ho fihlela u fihla moo.”
Ke ka baka lena motse oo o ileng oa bitsoa Sōoare.
23Letsatsi le ne le se le chabile ha Lota a fihla Sōoare. 24Morena a nesetsa sebabole le mollo holim'a Sodoma le Gomora, li e-tsoa ho Morena, maholimong. 25A ripitla metse eo, le phula eohle, le baahi bohle ba metse eo, le limela tsohle tse metseng teng. 26Empa mosali oa hae, ea neng a mo setse morao, a hetla, 'me a fetoha tšiea ea letsoai.
27Aborahama a tsoha ka malungoalungoana, a ea sebakeng seo a neng a eme ho sona ha a le kapel'a Morena. 28A talima nq'a Sodoma le Gomora, le nqeng tsohle tsa phula, 'me a bona mosi a fōqōha fatše joaloka mosi oa sebopi.
29Ha Molimo a ripitla metse eo e phuleng, Molimo a hopola Aborahama; a ntša Lota koluoeng eo, ha a ne a ripitla metse eo Lota a neng a ahile ho eona.
Ho tsoaloa ha Bamoabe le Baamone
30Lota a nyoloha Sōoare, a ea aha lithabeng le barali ba hae ba babeli, hobane o ne a tšaba ho aha Sōoare; eaba o phela lehaheng le barali ba hae ba babeli. 31Morali e moholo a re ho e monyenyane: “Ntat'a rōna o se a tsofetse, 'me ha ho na monna lefatšeng ea ka kenang likobong tsa rōna ka mokhoa oa batho ba lefatše lohle. 32Tloo, re noese ntat'a rōna veine, re tle re robale le eena, re tsose lelōko ka ntat'a rōna.”
33Bosiung boo ba noesa ntat'a bona veine; morali e moholo a kena, 'me a robala le ntat'ae. Eena ha aa ka a tseba ha morali oa hae a kena likobong, leha a tsoha.
34Ka letsatsi le hlahlamang e moholo a re ho e monyenyane: “Bona, bosiung ba maobane ke ile ka robala le ntate. Bosiung bona a re mo noese veine hape, u tle u kene, u e'o robala le eena, re tle re tsose lelōko ka ntat'a rōna.” 35Le bosiung bona boo ba noesa ntat'a bona veine; morali e monyenyane a kena, 'me a robala le ntat'ae. Eena ha aa ka a tseba ha morali oa hae a kena likobong, leha a tsoha.
36Eaba barali ba Lota, ka bobeli ba bona, e ba baimana ka ntat'a bona. 37E moholo a tsoala ngoana oa moshanyana, a mo rea lebitso la Moabe. Ke eena ntat'a ba bitsoang Bamoabe le kajeno. 38E monyenyane le eena a tsoala ngoana oa moshanyana, a mo rea lebitso la Bene-Ami. Ke eena ntat'a ba bitsoang Baamone le kajeno.
