Paulosi o amoheloa ke baapostola ba bang
1Ha ho se ho fetile lilemo tse leshome le metso e mene, ka boela ka nyolohela Jerusalema, ke e-na le Baranabase, le Tite a tsamaea le rōna. 2Ke ne ke senoletsoe hore ke nyolohele teng. Lekunutung, ka hlalosetsa batho ba nang le mabitso molaetsa o molemo, oo ke o phatlalletsang balichaba; esebe mohlomong nakong ena kapa e fetileng, ke tsamaetse lelea. 3Esita le eena Tite oa Mogerike, ea neng a e-na le 'na, ha a ka a qōbelloa ho bōlla. 4Hona e ne e le ho hanyetsana le balumeli ba bohata, ba tlileng ka bononnori ho tla iketsa lihloela tse tlil'o hloela tsa bolokolohi boo re nang le bona ho Kreste Jesu, hore li tle li re etse makhoba. 5Empa le ka motsotsoana feela ha kea ka ka ba mamela, e le hore le bōlōkeloe 'nete ea molaetsa o molemo.
6Ha e le bao ba nang le mabitso, ho 'na hono hase letho, hobane Molimo ha a ee ka tšobotsi, ha baa ka ba nkekeletsa letho le lecha. 7Empa ba bone hore ke tšepetsoe ho isa molaetsa o molemo ho balichaba, joalokaha le Petrose a ne a tšepetsoe ho o isa ho Bajuda, 8hobane matla a Molimo a entseng hore Petrose e be moapostola oa Bajuda, le 'na a entse hore ke be moapostola oa balichaba. 9Eare ha Jakobo, le Kefase, le Johanne, ba neng ba talingoa e le litšiea, ba hlokomela mohau oo ke o neiloeng, ba re tšoara ka matsoho, rōna le Baranabase, ho supa hore re tla sebelisana: rōna re ee ho balichaba, 'me bona ba ee ho Bajuda. 10Feela ba re re hopole mafutsana, e leng seo ke neng ke ikemiselitse ho se etsa.
Paulosi o khalemela Kefase ha ba le Antiokia
11Empa eare ha Kefase a fihla Antiokia, ka mo hanyetsa sefahlamahlo, hobane o ne a fositse. 12Pele ba bang ba tsoang ho Jakobo ba fihla, Kefase o ne a e-ja le balichaba, empa eare ha ba se ba fihlile, a ikhula, a iketsa mokhelo, hobane o ne a tšaba Bajuda. 13Bajuda ba bang le bona ba ikaketsa joaloka eena, hoo le Baranabase a bileng a khelosoa ke boikaketsi boo ba bona.
14Eare ha ke bona hore ha ba tsamaee ka 'nete ea molaetsa o molemo, ka re ho Kefase, mahlong a bona bohle: “Ha uena, u leng Mojuda, u phela joaloka molichaba, e seng joaloka Mojuda, ho ea ka'ng ha u qōbella balichaba ho phela joaloka Bajuda?
Bajuda le balichaba ba pholosoa ka tumelo
15“Rōna re Bajuda ka tsoalo, ha re balichaba, baetsalibe bano. 16Leha ho le joalo, re tseba hore motho ha a lokafatsoe ka ho phetha Molao, empa o lokafatsoa ka ho lumela ho Kreste Jesu. Le rōna re lumetse ho Kreste Jesu, e le hore re tle re lokafatsoe ka ho lumela ho Kreste, e seng ka ho phetha Molao, hobane ha ho motho ea ka lokafatsoang ka ho phetha Molao.
17“Empa haeba, ha re ntse re batla ho lokafatsoa ka Kreste, le rōna re fumanoa re le baetsalibe, na ke ho re Kreste ke mokhothaletsi oa sebe? Le khale! 18Ha ke tsosa tseo ke li helelitseng, ke iketsa motlōli oa molao. 19Ka Molao oa Moshe, 'na ke shoele ka nqeng ea Molao oo, hore ke tle ke phelele Molimo. Ke thakhisitsoe le Kreste; 20kahoo bophelo boo ke bo phelang ha e sa le ba ka, empa e se e le ba Kreste ea phelang ka ho 'na. Bophelo boo ke bo phelang lefatšeng joale, ke bo phela ka ho lumela ho Mora oa Molimo, ea nthatileng, 'me a itella 'na. 21Ha ke lahle mohau oa Molimo, hobane haeba ho loka ho tlisoa ke Molao, e tla ba Kreste o shoetse lelea!”
