Thapelo ea Esera ea boinyatso
1Ha lintho tsena li se li phethiloe, baetapele ba tla ho 'na, ba re: “Sechaba sa Iseraele, le baprista, le Balevi ha ba ea ikhetholla ho baahi ba linaha tsena; ba etsa manyala a etsoang ke Bakanana, le Bahete, le Baperise, le Bajebuse, le Baamone, le Bamoabe, le Baegepeta, le Baamore. 2Ba nyallane le lichaba tseo; kahoo sechaba sena se halalelang se kopantse mali a sona le mali a balichaba. Ba ka sehloohong ketsong ena ea bohlabaphieo ke baetapele le babusi ba sechaba.”
3Ha ke utloa taba ena ka hahōla liaparo tsa ka, le hempe ea ka, ka hlōthaka moriri oa ka, le litelu tsa ka, ka lula fatše, ka fetoha semumu. 4Bohle ba tšabang lipolelo tsa Molimo oa Iseraele ba mpōkanela, ka baka la bocholocholo ba bao e neng e le bathōpuoa. Ka lula joalo ke le semumu, ho fihlela ha ho etsoa sehlabelo sa mantsiboea.
5Ka nako ea ha ho etsoa sehlabelo sa mantsiboea, ka ema moo esaleng ke lula teng ke sithabetse. Ka khumama ka mangoele, seaparo sa ka le hempe ea ka li ntse li le matamuke, ka phahamisetsa matsoho a ka ho Morena Molimo oa ka. 6Eaba ke re: “Oho, Molimo oa ka, ke soabile, ke bile ke tšaba le ho talimana le uena, Molimo oa ka. Bokhopo ba rōna bo re hloele lihlooho, libe tsa rōna li lalellane holimo ho ea fihla maholimong. 7Ho tloha mehleng ea bo-ntat'a rōna, ho fihlela kajeno, re bile le melato e meholo. Ka baka la bokhopo ba rōna, rōna, le likhosi tsa rōna, le baprista ba rōna, ho neelanoe ka rōna matsohong a likhosi tsa linaha tsena, hore re bolaoe ka sabole, re thōpuoe, re hanyapetsoe, re hlabisoe lihlong, joalokaha ho le joalo kajeno.
8“Empa ka nakoana e seng kae, Morena Molimo oa rōna, o re hauhetse ka ho re siela mesaletsana e ileng ea phonyoha. O re tsitsisitse sebakeng sena sa hae se halalelang, e le hore a re tutubolle mahlo, a re lopolle bokhobeng bona ba rōna. 9Re ne re le makhoba, empa Molimo oa rōna ha aa ka a re tlohela bokhobeng boo ba rōna; o entse hore likhosi tsa Peresiea li re hauhele, re tsohe molōta, re tle re hahe Tempele ea Molimo oa rōna, re e lokise moo e senyehileng teng, ho sireletsoe Juda le Jerusalema.
10“Joale he, Molimo oa rōna, re tla re'ng kamorao ho moo? Re furaletse melao ea hao 11eo u neng u re laee ka eona, ka bahlanka ba hao, baporofeta, ua re: ‘Naha eo le eang ho eona, hore e tle e be ea lōna, ke naha e sa hloekang, ka baka la ho silafatsoa ke baahi ba linaha tseo ka manyala a bona, a e aparetseng ho tloha ntleng e 'ngoe ho isa ho e 'ngoe. 12Ka baka leo he, le se ke la nyallana le bona, leha e le ho sebeletsa khotso ea bona, kapa ho tsoela pelo leruo la bona ho isa khale, e le hore le tle le matlafale, le je menono ea naha eo, le e siele bana ba lōna hore e be lefa la bona la kamehla eohle.’
13“Tsena tsohle, tse re hlahetseng, li bakiloe ke liketso tsa rōna tse khopo, le litšito tsa rōna tse kholo, empa uena, Molimo oa rōna, u re otlile hanyenyane ho feta kamoo bokhopo ba rōna bo leng kateng, 'me ua re siela mesaletsana ena e teng. 14Na ebe re sa tla boela re tlōla melao ea hao, re nyallana le lichaba tsee, tse etsang lintho tse nyonyehang hakaale? Na u ke ke ua re halefela, 'me ua qetella u re timelitse, hoo ho ke keng ha e-ba le mesaletsana kapa ba phonyohang? 15Oho, Morena Molimo oa Iseraele, uena u lokile, hobane ke mona kajeno re mesaletsana e phonyohileng, 'me re kapele ho uena re ntse re le har'a melato ea rōna, le hoja re ke ke ra ema kapele ho uena, ka baka la eona.”
