Ho tsosoa ha Tempele hoa hanyetsoa
1Eitse ha lira tsa ba morabe oa Juda le oa Benjamine li utloela hore bao e neng e le bathōpuoa ba tsosa Tempele ea Morena Molimo oa Iseraele, 2eaba li tla ho bo-Serubabele le ho lihlooho tsa malapa, li re ho bona: “E-reng re le thuse ho haha, hobane le rōna re sebeletsa Molimo oa lōna joaloka lōna. Haesale re mo etsetsa mahlabelo ho tloha mohl'a Asare-Hadone, khosi ea Asure, a neng a re tlisa mona.”
3Empa bo-Serubabele, le Jeshua, le lihlooho tsa malapa a Iseraele, ba re ho lira tseo: “Le ke ke la haha Tempele ea Molimo oa rōna le rōna. Ke rōna feela ba tla hahela Morena Molimo oa Iseraele Tempele, joalokaha Siruse, khosi ea Peresiea, a re laetse.”
4Joale sechaba sa naha eo sa nyahamisa baahi ba naha ea Juda lipelo, e le hore ba tle ba tšabe ho haba. 5Sechaba seo sa ntšetsa baeletsi ba khosi tjotjo, hore ba sitise morero oa Bajuda. Hona sa ho etsa ka nako eohle ea puso ea Siruse, khosi ea Peresiea, ho fihlela mehleng ea puso ea Dariuse, khosi ea Peresiea.
Ho tsosoa ha Jerusalema hoa hanyetsoa
6Ha Ahashuerushe a qala ho busa, bahanyetsi ba mo ngolla lengolo, leo ka lona ba qosang baahi ba naha ea Juda le ba Jerusalema.
7Le mehleng sa Aretaseresese, bo-Bishelame, le Miteredate, le Tabeele, le metsoalle eohle ea bona, ba ngolla Aretaseresese, khosi ea Peresiea, lengolo le ngotsoeng ka litlhaku tsa Searame, ka puo ea Searame.
8Bo-Rehume oa 'musisi, le Shimeshai oa mongoli, ba ngolla Aretaseresese lengolo le hanyetsang ho tsosoa ha Jerusalema. Le ne le ngotsoe ke 9bo-Rehume oa 'musisi, le Shimeshai oa mongoli, le metsoalle ea bona, le baahlōli, le maqosa, le baemeli ba linaha, le bahlanka ba 'muso, le Baereke, le baahi ba Babilona, le baahi ba Susa, e leng Baelame, 10le lichaba tse ling tsohle, tseo Asenapare ea tumileng, ea khabane, a neng a ile a li thōpa, a li bea metseng ea Samaria, le naheng eohle e ka bophirimela ho nōka ea Euferatese.
11Kopi ea lengolo leo ba ileng ba le ngola ke ena:
“Ho khosi Aretaseresese.
“Rōna, bahlanka ba hao, ba ahileng ka bophirimela ho nōka ea Euferatese, re re: 12Khosi a e ke e tsebe hore Bajuda ba tsoang moo ho uena, ba tlileng mona ho rōna, ba fihlile Jerusalema. Ba ntse ba tsosa motse ona oa mahlabaphieo, o khopo. Ba hahile mothèo, 'me ba se ba qetela ho haha marako.
13“Khosi a e ke e tsebe hore haeba motse ona o ka fela oa tsosoa, 'me marako a oona a phethoa, baahi ba oona ba ke ke ba hlola ba sa lefa lekhetho, le sethabatha, le lekhetho la thepa, 'me chelete ea khosi e tla fokotseha. 14Joale, erekaha re phela ka khosi, 'me re sa rate ho bona ha khosi e hlompholloa, ke ka lebaka lena re rōmelang khosi molaetsa ona, hore e tsebe, 15e tle e fuputse libukeng tsa liketsahalo tsa baholo-holo ba eona. Etlare ha u ntse u fuputsa, u tla fumana hore motse ona ke oa mahlabaphieo, o kotsi ho likhosi le linaha tsa tsona, le hore ka nako e fetileng motse ona o ile oa tsosa setsokotsane sa bohlabaphieo, 'me ke ka baka leo o ileng oa timetsoa. 16Joale, khosi, re u tsebisa hore haeba motse oo o ka fela oa tsosoa, 'me marako a oona a phethoa, u ke ke ua hlola u sa busa ka bophirimela ho nōka ea Euferatese.”
17Eaba khosi Aretaseresese o rōmela karabo ena ho bo-Rehume oa 'musisi, le Shimeshai oa mongoli, le ho metsoalle eohle ea bona e ahileng Samaria, le ho bohle ba ahileng ka bophirimela ho nōka ea Euferatese: “Khotso!
18“Re baletsoe lengolo la lōna ka mokhoa o hlakileng. 19Ke laetse hore ho fuputsoe, 'me ho fumanoe hore ka nako e fetileng motse ona o ile oa ikhōhōmōsetsa likhosi, oa tsosa bohlabaphieo le bofetoheli. 20Ho kile ha e-ba le likhosi tse matla, tse ileng tsa busa Jerusalema le naha eohle e ka bophirimela ho nōka ea Euferatese. Li ne li ntšetsoa lekhetho, le sethabathaba, le lekhetho la thepa. 21Laelang batho bao hore ba khaotse, motse oo o se ke oa tsosoa, ho fihlela 'na nka etsa taelo. 22Hlokomelang, le se ke la fosa taelo ena, esere bobe bona ba tōta, 'me ba hlahisetsa likhosi kotsi!”
23Hoba lengolo lena la khosi Aretaseresese le balloe bo-Rehume, le Shimeshai oa mongoli, le metsoalle ea bona, eaba ba potlakela Jerusalema ho Bajuda, ba fihla ba thibela mosebetsi oa bona ka likhōka, le ka ho ba khahlapetsa.
24Mosebetsi oa ho haha Tempele ea Morena, Jerusalema, oa khaotsa. Oa khaotsa joalo ho fihlela ka selemo sa bobeli sa puso ea Dariuse, khosi ea Peresiea.
