Nōka e kollang Tempeleng
1Eaba monna eo o nkhutlisetsa monyako oa Tempele, 'me ka bona metsi a phalla, a e-tsoa katlase ho monyako oa Tempele, a phallela bochabela, kaha Tempele e ne e talimile bochabela. Metsi a ne a phalla a e-tsoa katlas'a lehlakore le ka boroa ho monyako oa Tempele, ka boroa ho aletare. 2Joale a 'ntša ka khoro e ka lebōea, a mpotisa kantle ho ea fihla horong e kantle, e talimileng bochabela, 'me metsi a ne a phalla, a e-tsoa ka lehlakoreng le ka boroa.
3Monna eo a leba bochabela, ka letsohong la hae a tšoere khoele e methang. Eaba o metha limethara tse makholo a mahlano, a nt'o ntšelisa metsing a neng a fihla maqaqailaneng. 4A boela a metha limethara tse makholo a mahlano, a ntšelisa metsing a neng a se a fihla mangoeleng. A metha hape limethara tse makholo a mahlano, a ntšelisa metsing a neng a se a fihla thekeng. 5A boela a metha limethara tse makholo a mahlano. Joale e ne e se e le nōka eo motho a ke keng a e tšela, hobane metsi a ne a se a kōkōmōhile, a le mangata hoo motho a ka sesang kahar'a 'ona, e se e le nōka eo motho a ke keng a e tšela. 6Eaba o re ho 'na: “Uena ngoan'a motho, na tsee ua li bona?”
Joale a nkhutlisetsa lebōpong la nōka. 7Ha ke fihla lebōpong moo, ka bona lifate tse ngata, tse metseng mabōpong a nōka. 8Eaba o re ho 'na: “Metsi ana a phallela bochabela, a theohele khohlong ea Jorodane, a e'o kena Leoatleng la Letsoai. Hoba a kene leoatle, a hlapolla letsoai, ebe metsi a leoatle aa hloeka.
9“Hohle moo nōka a phallelang teng ho tla phela libōpuoa ka mefuta eohle ea tsona. Ho tla ba le boieane ba litlhapi, hobane metsi ao a phallelang leoatle a hlapolla letsoai, ebe metsi a leoatle aa hloeka. Kahoo hohle moo metsi a phallelang teng, libōpuoa tsohle li tla phela. 10Batšoasi ba lithlapi ba tla ema lebōpong la leoatle ho tloha Ene-Gedi ho ea fihla Ene-Egelaime. Ho tla ba le moo ba anehang matlōoa teng. Litlhapi tsa teng e tla ba tsa mefuta eohle, tse tšoanang le tsa Leoatle le Leholo. 11Empa metsi a mekhoabo le a mehlaka a ke ke a hlapoloha, a tla 'ne a be letsoai. 12Lifate tsa mefuta eohle tsa litholoana li tla mela mabōpong a nōka. Mahlaku a tsona a ke ke a pona, li tla beha litholoana kamehla. Li tla beha ka khoeli e 'ngoe le e 'ngoe, hobane li noesetsoa ke metsi a tsoang Sehalalelong. Litholoana tsa tsona li tla jeoa, mahlaku a tsona a phekole.”
Meeli ea naha
13Morena Molimo o bua tjena: “Ena ke meeli eo ka eona le tla arolela merabe e leshome le metso e 'meli ea Iseraele naha, hore e be lefa. Josefa eena o tla abeloa likarolo tse peli. 14Le e arolelane ka ho lekana. Naha ena e tla ba lefa la lōna, hobane ke ne ke hlapanyetse baholo-holo ba lōna hore ke tla ba nea eona.
15“Meeli ea naha e tla ba tjena: Ka lebōea moeli o tla tloha Leoatleng le Leholo, o ikhōhle ka tsela e eang Hetelone, o fete le lekhalong la Hamate, o e'o fihla Sedade; 16o tlohe Berota le Siberaime, pakeng tsa Damaseka le Hamate, o e'o fihla Hasere-Hatekone, e moeling oa Haurane. 17Kahoo moeli o tla tloha leoatle o e'o fihla Hasere-Enane, moeling o ka lebōea ho Damaseka le Hamate. Ona e tla ba oona moeli o ka lebōea.
18“Ka bochabela moeli o tla tloha pakeng tsa Haurane le Damaseka, o ikhōhle ka Jorodane, pakeng tsa Gileade le naha ea Iseraele, o e'o fihla leoatleng le ka bochabela, o fihle le Tamare. Ona e tla ba oona moeli o ka bochabela.
19“Ka boroa moeli o tla tloha Tamare o e'o fihla metsing a Meriba-Kadeshe, o ikhōhle ka naha ea Egepeta, o e'o fihla Leoatleng le Leholo. Ona e tla ba oona moeli o ka boroa.
20“Ka bophirimela Leoatle le Leholo e tla ba lona moeli ho ea fihla lekhalong la Hamate. Ona e tla ba oona moeli o ka bophirimela.
21“Le tla arolelana naha ena joalo, ho ea ka merabe ea Iseraele. 22Le e arolelane e le lefa la lōna, le la balichaba ba ahileng har'a lōna, bao bana ba bona ba tsoaletsoeng naheng ena. Le ba talime e le matsoalloa a naha ea Iseraele, 'me le ba abele lefa 'moho le ba merabe ea Iseraele. 23Le abele molichaba lefa morabeng ofe kapa ofe oo a hileng har'a oona,” ho rialo Morena Molimo.
