Khosana le Mekete e Halalelang
1“ ‘Morena Molimo o bua tjena: Khoro ea lebala le kahare e talimileng bochabela e koaloe ka matsatsi a tšeletseng a mosebetsi, empa ka letsatsi la Sabatha e tla buloa, e be e buloe le mohl'a khoeli e thoasitseng. 2Khosana e busang e tla kena ka lethule le kantle la khoro eo, ebe e ema pel'a litšiea tsa khoro. Baprista ba tla e etsetsa nyehelo ea secheso, le nyehelo ea teboho. Khosana e tla khumama lethuleng la khoro, e nt'o tsoa, empa khoro ha e ka ke ea koaloa ho fihlela mantsiboea. 3Ka mokhoa o joalo, ka Lisabatha le ha khoeli e thoasitse, sechaba se tla khumamela Morena se le monyako oa khoro.
4“ ‘Ka letsatsi la Sabatha nyehelo ea secheso eo khosana e tla e etsetsa Morena, e tla ba likonyana tse tšeletseng tse se nang sepha, le pheleu e se nang sepha. 5Bakeng sa pheleu ka 'ngoe eo ho nyeheloang ka eona, khosana e tla etsa nyehelo ea lijo tse etsang boima ba likilo tse leshome le metso e tšeletseng; bakeng sa konyana ka 'ngoe eo ho nyeheloang ka eona khosana e tla etsa nyehelo ea lijo kamoo e ka ratang kateng, e be e etse le nyehelo ea lilethara tse tharo tsa ole ea mohloaare bakeng sa nyehelo ka 'ngoe ea lijo. 6Mohl'a khoeli e thoasitseng, khosana e tla nyehela ka pohoana e se nang sepha, le ka likonyana tse tšeletseng, tse se nang sepha, le ka pheleu e se nang sepha. 7Bakeng sa pohoana eo ho nyeheloang ka eona, khosana e tla etsa nyehelo ea lijo tse etsang boima ba likilo tse leshome le metso e tšeletseng, le bakeng sa pheleu eo ho nyeheloang ka eona e etse nyehelo e kaalo. Bakeng sa likonyana tseo ho nyeheloang ka tsona e tla etsa nyehelo ea lijo kamoo e ka ratang kateng, e be e etse le nyehelo ea lilethara tse tharo tsa ole ea mohloaare bakeng sa nyehelo ka 'ngoe ea lijo. 8Ha khosana e kena, e tla kena ka lethule la khoro, 'me ha e e-tsoa, e tsoe ka lona lethule leo.
9“ ‘Ha sechaba se e-tla pel'a Morena, mohl'a mekete e halalelang, motho ea keneng ka khoro e ka lebōea ho tla khumamela Morena, ha a e-tsoa o tla tsoa ka khoro e ka boroa; ea keneng ka khoro e ka boroa, ha a e-tsoa o tla tsoa ka khoro e ka lebōea. Ha ho motho ea tla tsoa ka khoro eo a keneng ka eona; e mong le e mong o tla tsoa ka khoro e talimaneng le eo a keneng ka eona. 10Ha sechaba se kena, khosana le eona e tla kena, ha se e-tsoa, le eona e tsoe.
11“ ‘Mohl'a mekete e halalelang le e khethehileng, bakeng sa pohoana eo ho nyeheloang ka eona ho tla etsoa le nyehelo ea lijo tse etsang boima ba likilo tse leshome le metso e tšeletseng; le bakeng sa pheleu eo ho nyeheloang ka eona ho tla etsoa nyehelo ea lijo tse etsang boima ba likilo tse leshome le metso e tšeletseng. Empa bakeng sa nyehelo ea likonyana ho tla etsoa nyehelo ea lijo ho ea kamoo motho a ka ratang kateng, ho be ho etsoe le nyehelo ea lilethara tse tharo tsa ole ea mohloaare bakeng sa lijo tse etsang boima ba likilo tse leshome le metso e tšeletseng. 12Ha khosana e etsetsa Morena nyehelo ea boithaopo, e ka ba nyehelo ea secheso kapa nyehelo ea teboho, khosana e tla buleloa khoro e ka bochabela, ebe e etsa nyehelo ea secheso le nyehelo ea eona ea teboho joalokaha e etsa ka letsatsi la Sabatha. Ha e qetile e tla tsoa, ebe khoro ea koaloa.
Nyehelo ea letsatsi ka leng
13“ ‘Ka letsatsi le leng le le leng, hoseng ho hong le ho hong, u tla nyehella Morena ka konyana e nang le selemo, e se nang sepha, e leng nyehelo ea secheso. 14Hoseng ho hong le ho hong u tla etsa nyehelo ea lijo tse etsang boima ba likeramo tse peli, le ea lethara ea ole e tla luba phofo e thumisehileng ea nyehelo. Nyehelo ena ea lijo e etsetsoang Morena, ke taelo ea kamehla eohle. 15Ka mokhoa o joalo hoseng ho hong le ho hong ho tla etsoa nyehelo ea konyana, le ea lijo, le ea ole, e le nyehelo ea secheso ea kamehla eohle.
Khosana le naha
16“ ‘Morena Molimo o bua tjena: Ha khosana e e-fa e mong oa bara ba eona mpho e tsoang lefeng la eona, mpho eo e tla ba lefa la mora eo oa eona le la litlōhōlō tsa hae. 17Empa haeba khosana e e-fa e mong oa bahlanka ba eona mpho e tsoang lefeng la eona, mpho eo e tla ba ea mohlanka eo ho fihlela mohl'a selemo sa tokoloho. Kamorao ho moo mpho eo e tla khutlela ho khosana, hobane lefa le eona le jeoa ke bara ba eona feela. 18Khosana ha ea lokela ho nka letho lefeng la sechaba ka ho se hatella. E tla abela bara ba eona lefa leo e leng la eona, e le hore ho se be motho oa sechaba sa ka ea ka falatsoang.’ ”
Mekhoro ea Tempele
19Joale monna eo a 'ntša ka monyako o lehlakoreng la khoro, a nkisa likamoreng tse halalelang, tse talimileng lebōea, e leng tsa baprista, 'me a mpontša sebaka se ka bophirimela. 20Eaba o re ho 'na: “Sebaka sena ke seo ho sona baprista ba tla phehela nyehelo ea tefelo ea sebe, le nyehelo e tlosang molato. Ke moo ba tla phehela le nyehelo ea lijo teng, e le hore ba se ke ba li ntšetsa lebaleng le kantle, esere ba halaletsa sechaba.”
21A nkisa lebaleng le kantle, a mpotisa le lihuku tse 'ne tsa lona, 'me hukung e 'ngoe le e 'ngoe ka bona lebala. 22Lihukung tse 'ne tsa lebala ka leng ho ne ho e-na le mabala a mang a manyenyane. Lebala ka leng le ne le etsa bolelele ba limethara tse mashome a mabeli, le bophara ba limethara tse leshome le metso e mehlano, 'me bone ba 'ona a ne a lekana. 23Lebala le leng le le leng la mabala ana a mane le ne le pota-potiloe ke lerako la majoe, le nang le maifo a haheletsoeng ho lona. 24Monna eo a re ho 'na: “Ena ke mekhoro eo ba sebeletsang ka Tempeleng ba tla phehela mahlabelo a secheso a sechaba ka ho eona.”
