ESEKIELE 44

₁Eaba monna eo o nkhutlisetsa khorong e kantle ho Sehalalelo, e shebileng bochabela. Khoro eo e ne e koetsoe. ₂Morena a re ho 'na: “Khoro ena e tla lula e koetsoe; e ke ke ea ba ea buloa, 'me ha ho motho ea tla kena ka eona. E tla lula e koetsoe, hobane Morena Molimo oa Iseraele o kena ka eona. ₃Ke khosana feela e tla lula kahare ho eona, e jele lijo tsa eona pontšeng ea Morena. E tla kena ka tsela ea lethule la khoro, e be e tsoe ka eona.”

₄Joale monna eo a nkisa kapele ho Tempele, ra ea ka tsela ea khoro e ka leboea. Ka talima, 'me ka bona tlōtla ea Morena e tlala ka Tempeleng ea Morena; eaba ke itihela fatše ka sefahleho.

₅Morena a re ho 'na: “Uena ngoan'a motho, ela hloko, u talimisise, 'me u mamelisise tsohle tseo ke u bolellang tsona, e leng litaelo tsohle tsa Tempele ea Morena, le melao eohle ea eona. Ela hloko hore na ke bo-mang ba lumeletsoeng ho kena ka Tempeleng, le ka Sehalalelong, le ba sa lumelloang ho etsa joalo.

₆“Bolella bafetoheli, e leng ba ntlo ea Iseraele, u re: ‘Morena Molimo o bua tjena: Lōna ba ntlo ea Iseraele, manyala ana 'ohle a lōna a sa lekane! ₇Ka Sehalalelong sa ka le kentse balichaba ba sa bōllang lipelong le nameng; le silafalitse Tempele ea ka ha le 'nyehella ka lijo, ka mafura le ka mali, 'me le sentse selekane sa ka ka baka la manyala a lōna 'ohle. ₈Bakeng sa hore lōna le hlokomele lintho tsa ka tse halalelang, le khethile basele ho sebeletsa ka Sehalalelong sa ka.

₉“ ‘Morena Molimo o bua tjena: Ho se be molichaba ea sa bōllang pelong le nameng ea ka kenang ka Sehalalelong sa ka, esita leha e ka ba molichaba ofe kapa ofe ea phelang har'a bana ba Iseraele.

₁₀“ ‘Ha e le Balevi ba ileng ba emella hōle le 'na ha Baiseraele ba kheloha, ba khelosoa ho 'na ke ho latela melingoana ea bona ea bohata, ba tla otleloa bokhopo boo ba bona. ₁₁Empa ba tla 'ne ba sebeletse ka Sehalalelong sa ka, ba hlokomele likhoro tsa Tempele, 'me ba sebeletse ka ho eona. Ba tla hlaba liphoofolo tsa nyehelo ea secheso le tsa mahlabelo a etsetsoang sechaba, 'me ba eme kapele ho sona ba se sebeletse. ₁₂Kaha ba ile ba sebeletsa sechaba kapele ho melingoana ea sona ea bohata, 'me ba lihela ba ntlo ea Iseraele bokhopong, kahoo ke hlapantse hore ke tla ba otlela bokhopo boo ba bona, ho rialo Morena Molimo. ₁₃Ba ke ke ba atamela pel'a ka ho tla ntšebeletsa e le baprista, kapa ba atamela pel'a e 'ngoe feela ea lintho tsa ka tse halalelang, kapa tse halalelang ka ho fetisisa; ba tla jara lihlong tsa bona le manyala a bona ao ba a entseng. ₁₄Empa ke tla ba etsa basebeletsi ba Tempele, ba etse mesebetsi eohle ea eona, ba etse le tsohle tse lokelang ho etsoa ka ho eona.

₁₅“ ‘Ha e le baprista bao e leng Balevi, litlōhōlō tsa Sadoke, ba ileng ba sebeletsa ka Sehalalelong sa ka ha bana ba Iseraele ba mphuralla, ba tla atamela ho 'na ho tla ntšebeletsa, 'me ba eme kapele ho 'na ho nyehela ka mahlabelo a mafura le a mali, ho rialo Morena Molimo. ₁₆Bona ba tla kena ka Sehalalelong sa ka, ba atamele pel'a tafole ea ka ho ntšebeletsa le ho phetha tšebeletso ea ka.

₁₇“ ‘Ha ba kena ka likhoro tsa lebala le kahare, ba tla apara liaparo tsa lene; ba ke ke ba apara seaparo sefe kapa sefe sa boea, ha ba ntse ba sebeletsa likhorong tse lebala le kahare, kapa kahar'a Tempele. ₁₈Ba tla roala lituku tsa lene lihloohong tsa bona, ba tene le marikhoe a lene. Ba ke ke ba apara eng kapa eng e ka ba fufuletsang. ₁₉Ha ba tsoela lebaleng le kantle, moo sechaba se leng hona teng, ba tla hlobola liaparo tseo ba neng ba li apere ha ba sebeletsa, ba li siee ka likamoreng tse halalelang, ba apare lisele, e le hore ba se ke ba tlisetsa sechaba bomalimabe ha se ka ama liaparo tseo tsa bona.

₂₀“ ‘Ba se ke ba beola lihlooho tsa bona, kapa ba hōlisa moriri oa bona, ba mpe ba o fokotse feela. ₂₁Ho se be moprista ea tla noa veine ha a kena ka lebaleng le kahare. ₂₂Ba se ke ba nyala bahlolohali kapa basali ba hlaliloeng, empa ba nyale baroetsana bao e leng litlōhōlō tsa bana ba Iseraele, kapa bahlolohali ba baprista.

₂₃“ ‘Baprista ba tla ruta sechaba sa ka phapano pakeng tsa ntho e halalelang le e sa halaleleng, 'me ba etse hore ba khetholle e sa hloekang ho e hloekileng.

₂₄“ ‘Nyeoeng e 'ngoe le e 'ngoe baprista e tla ba bona baahlōli, 'me ba tla liha nyeoe ho ea ka melao ea ka. Ba tla boloka melao ea ka le litaelo tsa ka liphuthehong tsohle, ba halaletse Lisabatha tsa ka.

₂₅“ ‘Moprista a se ke a itšilafatsa ka ho atamela pel'a setōpō, haese feela setōpō sa ntat'ae, kapa sa 'm'ae, kapa sa mora oa hae, kapa sa morali oa hae, kapa sa ngoan'abo, kapa sa khaitselie e sa nyaloang. Tsena a ka itšilafatsa ka tsona. ₂₆Hoba a hloekisoe, o tla balloa matsatsi a supileng, ₂₇'me mohla a kenang ka lebaleng le kahare la Sehalalelo ho ea sebeletsa, o tla iketsetsa nyehelo ea sebe, ho rialo Morena Molimo.

₂₈“ ‘Baprista ba se ke ba e-ba le lefa le leng; ke 'na feela lefa la bona. Le se ke la ba nea leruo naheng ea Iseraele; ke 'na feela leruo la bona. ₂₉Ba tla ja nyehelo ea lijo, le mahlabelo, le nyehelo ea sebe, le nyehelo ea tefelo ea sebe, 'me lintho tsohle tse khethetsoeng Morena naheng ea Iseraele, e tla ba tsa bona. ₃₀Lilopotsiea tsohle le linyehelo tsohle, le mefuta eohle ea linyehelo, e tla ba tsa baprista. Le tla ba nea hlama ea lōna ea pele, malapa a lōna a tle a hlohonolofatsoe. ₃₁Baprista ba se ke ba e-ja letho le ichoeletseng ka bolona, kapa le harotsoeng ke libatana, ebang ke nonyana kapa phoofolo.