Egepeta e tšoantšoa le sefate sa kedare
1Ka letsatsi la pele la khoeli ea boraro selemong sa leshome le motso o mong, lentsoe la Morena la boela la fihla ho 'na, la re: 2“Uena ngoan'a motho, e-re ho Faro, khosi ea Egepeta, le ho sechaba sa hae:
“ ‘Boholo ba hao
bo ka tšoantšoa le ba mang?
3Bona Asiria eo
e n'e le kedare ea Lebanone,
e makala a matle, a thathaletseng;
e n'e phahame haholo,
e fihla marung,
e tsoile ka mahetla
har'a mahlaku a teteaneng.
4E n'e noesetsoa ke metsi a mangata,
liliba tse ka fatše
tsa e hōlisa haholo,
metsi a tsona a phalla
ho pota kutu ea eona,
makalana a tsona
a noesetsa lifate tsohle.
5Ka hona ea phahama
ho feta fate tsohle tsa moru,
mahlaku a eona a teteana haholo,
makala a eona le 'ona a lelefala,
a thathalla ka baka la metsi bongata.
6Nonyana tsohle
tsa hahela makaleng a eona,
batana tsohle
tsa tsoalla tlas'a makala a eona,
chaba tsohle tse kholo
tsa lula moriting oa eona.
7Boholo ba eona
bo ne bo khahleha haholo,
le makala a eona a le malelelehali,
hoba motso oa eona
o n'o le metsing a mangata.
8Kedare tsa rapa sa Molimo
li ne li sa e fete,
le fate tsa hoki
li sa ke makala a eona,
le lifate feela li sa ke makala a eona;
botle ba lifate tsa rapa sa Molimo
bo ne bo ke ke ba ka botle ba eona.
9Ke ile ka e khabisa
ka makala a mangata,
lefufa la ba la qeta
fate tsohle tsa Edene,
fate tse neng li metse
rapeng sa Molimo.
10“ ‘Ka baka lena, Morena Molimo o bua tjena: Kahobane kedare eo e ile ea iphahamisetsa holimo, ea tsoa ka mahetla har'a mahlaku a teteaneng, le kahobane e ne e ikhantša ka bophahamo ba eona, 11ke ile ka e leleka, ka neelana ka eona matsohong a eo e leng senatla har'a balichaba; eena o tla etsa seo a se ratang ka kedare eo ho ea ka bokhopo ba eona. 12Balichaba ba sehlōhō ho feta ba bang ba tla e rema, ba e tlohele hona moo. Mahlaku a eona a tla oela holim'a lithaba le ka likhohlong, makala a eona a robehele ka linōkeng tsohle tsa naha eo. Lichaba tsohle tsa lefatše li tla tloha moriting oa eona, li ikele. 13Linonyana tsohle tse fofang li tla sala sefateng seo se robehileng, libatana tsohle tsa naha li sale har'a makala a sona. 14Ka baka leo, ha ho sa tla ba le sefate sefe kapa sefe se metseng pel'a metsi se tla iphahamisa haholo, kapa se tla tsoa ka mahetla har'a mahlaku a teteaneng. Ha ho sefate se noesetsoang hantle se tla ke se be selelele hakaalo, hobane tsohle lia bolaoa, li theoleloa ka mpeng ea lefatše, har'a batho ba theohetseng mohohlong.
15“ ‘Morena Molimo u bua tjena: Mohl'a letsatsi leo ka lona kedare ena e neng e epeloa, ke ne ke apese liliba tsohle bofifi, ka koala mehloli ea tsona, metsi a tsona a khaotsa ho phalla. Ka etsa hore Lebanone le eona e llele kedare ena, 'me lifate tsohle tsa moru tsa omella. 16Ka etsa hore lichaba li thōthōmele ha li utloa molumo oa ho oa ha kedare eo, ha ke e lahlela ka lebitleng 'moho le ba theohelang mohohlong. Joale lifate tsohle tsa Edene, le tse ntle-ntle, tse khahlehang tsa Lebanone, tsohle tse noesetsoang, tse ka mohohlong, li tla thabela ho oa ha kedare eo. 17Balichaba bohle ba neng ba lula moriting oa sefate sena, ba thusana le sona, le bona ba ile lebitleng le sona, ho ba neng ba bolaoe ka sabole.
18“ ‘Ke sefe sa lifate tsa Edene se ka tšoantšoang le uena ka boholo le ka tlōtla? Empa u tla theohela lebitleng le lifate tsa Edene; u tla rapalla har'a maqai le har'a ba ileng ba bolaoa ka sabole.
“ ‘Enoa ke Faro le sechaba sa hae sohle, ho rialo Morena Molimo.’ ”
