1Lentsoe la Morena la boela la fihla ho 'na, la re: 2“Uena ngoan'a motho, binela Tire koli-ea-malla. 3Bolella Tire, o re: ‘Uena ea lutseng likoung tsa leoatle, ea hoebang le lichaba tse ahileng mabōpong a leoatle, Morena Molimo o bua tjena:
“ ‘U ile ua ikalatisa, oa re:
“Botle ba ka bo hloka sekoli!”
4Meeli ea hao e har'a maoatle,
bahahi ba hao ba ritile botle ba hao.
5Khopo tsa hao
ba li haha sa sekepe se setle,
ba li haha ka phaena e tsoang Senire;
ba nka likedare tse tsoang Lebanone,
ba u etsetsa thupa
tsa ho thakhōlla liseile.
6Ka fate tsa eike tse tsoang Bashane
ba etsa masokoana,
ba a etsetsa uena;
ka fate tsa kipere tse tsoang Kitime
ba etsa sethala,
ba se etsetsa uena,
ba u khabisa ka manaka a tlou.
7Liseile tsa hao ba li entse ka lene,
lene e hōmiloeng, e tsoang Egepeta,
e bile ke eona mokhelè oa hao;
masira a hao a maputsoa, a perese
ke a tsoang mabōpong a Elisha.
8Basoki ba hao
ba tsoa Sidone le Arefade,
basesisi ba hao ba bohlale
ke ba Tire.
9Litsebi tsa mesebetsi
tse tsoang Gebale,
li ne li le teng
ho thiba matlere a hao.
Likepe tsohle le basesisi ba tsona
li ne li e-tla ho tla hoeba le uena.
10“ ‘Banna ba Peresiea,
le banna ba Lōde le Pute,
e n'e le bahlabani ba mabōtho a hao;
lithèbè le katiba tsa bona tsa tšepe
ba li fanyeha maboteng a hao,
ba li fanyeha, ba o tlōtla ka tsona.
11Banna ba Arefade
le banna ba Heleke
ba sireletsa marako a hao kahohle;
banna ba Gamade
ba lebela litora tsa hao,
ba fanyeha lithèbè tsa bona
ho pota mabota,
botle ba hao
bo phethahatsoa ke bona.
12“ ‘Motse oa Tarashishe oa hoeba le uena ka baka la bongata ba motlotlo a hao; thepa ea hao ea khoebo ba e ananya ka silefera le tšepe le lekapa le loto.
13“ ‘Jafane le Tubale le Mesheke le tsona tsa hoeba le uena; tsa ananya thepa ea hao ka makhoba le ka lintho tse entsoeng ka lethose.
14“ ‘Ba morabe oa Togarema ba ananya thepa ea hao ka lipere tse palangoang le tsa ntoa le ka limmeile.
15“ ‘Banna ba Dedane ba ne ba hoeba le uena; le ba linaha tse mabōpong a leoatle ba ne ba hoeba le uena, ba u lefa ka manaka a tlou le ka mapolanka a motsoeri.
16“ ‘Baarame le bona ba ne ba hoeba le uena ka baka la bongata ba thepa eo u neng u e etsa; ba ananya thepa eo ea hao ka majoe a bohlokoa a matala, le ka masela a perese, le a hōmiloeng, le ka lene e ntle, le ka likhetla, le ka majoe a bohlokoa a mafubelu.
17“ ‘Ba morabe oa Juda le Baiseraele ba ne ba hoeba le uena, ba ananya koro e tsoang Minete, le phofo le mahe a linotši, le ole, le litlolo ka thepa ea hao.
18“ ‘Ka baka la bongata ba thepa ea hao le ba matlotlo a hao, Damaseka le eona e ne e hoeba le uena, 'me e ananya thepa ea hao ka veine e tsoang Helebone, le boea ba linku bo tsoang Sahare.
19“ ‘Baahi ba Dane le ba Jafane ba tsoang Usale, ba ne ba reka thepa ea hao, ba e ananya ka tšepe le ka linōko le ka ntšoè.
20“ ‘Dedane e ne e hoeba ka litleleki.
21“ ‘Maarabia le mahosana a Kedare a ne a hoeba le uena, a u rekisetsa likonyana le lipheleu le lipoli.
22“ ‘Bahoebi ba Sheba le ba Rama ba ne ba hoeba le uena, 'me thepa ea hao ba e ananya ka linōko tse monko o monate, le ka majoe a bohlokoa, le ka khauta.
23“ ‘Ba tsoang Harane le Kane le Edene, le bahoebi ba Sheba le ba Ashure le ba Kilemade, ba ne ba hoeba le uena. 24Batho bana ke bona ba neng ba hoeba le uena ka lintho tse ntle-ntle: ka masela a maputsoa le a hōmiloeng, le ka liaparo tse ntle, tse mebala-bala, tse nang le lifoofo.
25“ ‘Ka likepe tsa Tarashishe,
kepe tsa khoebo,
thepa ea hao ea khoebo
e n'e thōthoa;
ua ba joaloka sekepe bolibeng,
u tletse meqeqeko ea tsa khoebo.
26Basoki ba hao ba u isa maoatleng,
ba u isa maoatleng a sabaletseng:
Empa moea oa bochabela
o tla u thua,
o u etse litsekana har'a boliba!
27Matlotlo a hao le thepa ea khoebo,
bo-ralikepe le basesisi ba hao,
malala a hao
a thibang likepe matlere,
bahoebi ba hao bohle le bahlabani,
le batho bohle ba kahare ho uena,
ba tla teba bolibeng ba leoatle,
mohl'a koluoa ea ho thueha ha hao.
28Naha tse bōpong la leoatle
li tla reketla,
li reketle ha basesisi ba hao ba hōoa!
29Basoki bohle
ba tla tlohela likepe tsa bona,
bo-ralikepe
le basebetsi bohle ba tsona,
a tla li theoha,
ba eme holim'a lebōpo.
30Ba tla hōoeletsa haholo ba tlerohe,
ba lle habohlōkō, ba u llele,
ba itšèlè ka lerōle holim'a lihlooho,
ba ipitike le holim'a molora.
31Lihlooho tsa bona ba tla li beola,
ba li beole, ba li beolele uena,
ba apere aparo tse mahoashe.
Ba tla u llela ka pelo tse bohlōkō,
bofifi ba bona e be ba mahlomola.
32Lillong tseo tsa bona tsa bofifi,
ba tla u binela koli-ea-malla,
ba re: “Ke motse ofe
o kil'a timetsoa sa Tire,
oa timeletsoa bolibeng ba leoatle?”
33Ha thepa ea hao
e n'e tšela maoatle,
u n'u fepa machaba-chaba,
ua khōrisa;
ka bongata-ngata ba matlotlo a hao,
ka bongata-ngata
ba thepa ea hao ea khoebo,
khosi tsa lefatše u il'a li ruisa.
34Joale u thuehetse har'a maoatle,
ua teba har'a boliba ba metsi;
thepa eohle ea hao ea khoebo,
le bohle ba neng ba le ho uena,
tsena tsohle li tebile 'moho le uena.
35Batho bohle
ba ahileng mabōpong a leoatle,
pheletso ena ea hao e ba tšositse;
likhosi tsa bona li tetemisa lirōpe,
fahleho tsa tsona
li tsunkantsoe ke letsoalo.
36Bahoebi ba machaba
ba u nyekoletsa melomo;
pheletso ea hao ruri ea tšabeha,
ha u sa tla ba teng kamehla eohle!’ ”
