Libe tsa Jerusalema
1Lentsoe la Morena la fihla ho 'na, la re: 2“Uena ngoan'a motho, na motse oo u tla o ahlōla? Na u tla ahlōla motse oo oa babolai? U o supise manyala 'ohle a oona; 3ebe u re: ‘Morena Molimo o bua tjena: Uena motse o itlisetsang timelo ka ho tšolla mali, o itšilafatsang ka ho rapela melingoana ea bohata, nako ea hao ea tla. 4U molato ka baka la mali ao u a tšolotseng; u itšilafalitse ka ho iketsetsa melingoana ea bohata. U khutsufalitse matsatsi a hao, 'me qetello ea lilemo tsa hao e se e fihlile. Ka baka lena, ke tla u etsa sekhobo ho balichaba, ke u etse sesomo linaheng tsohle. 5Uena motse o tummeng ka bokhopo, o tletseng meferefere, u tla songoa ke ba haufi le ba hōle.
6“ ‘Bona kamoo e mong le e mong oa mahosana a Iseraele, ao e leng baahi ba hao, a sebelisang matla a hae ho tšolla mali kateng! 7Baahi ba hao ba nyelisa bo-ntat'a bona le bo-'m'a bona, ba hatella molichaba, ba hlorisa khutsana le mohlolohali. 8U hlompholotse lintho tsa ka tse halalelang, ua silafatsa Lisabatha tsa ka. 9Baahi ba hao ba etseletsa ba bang, e le hore ba tle ba tsebe ho ba bolaea. Ba bang ba bona ba ja mahlabelo a etselitsoeng melimo ea bohata. Ba bang ba phethahatsa litakatso tsa bona tsa nama. 10Ba bang ba robala le basali ba bo-ntat'a bona, ba bang ba robala le basali ba silafetseng ke lehatlelo. 11Ba bang ba feba le basali ba banna ba ahelaneng le bona, ba bang ba silafatsa lingoetsi tsa bona ka ho feba le tsona, ba bang ba robala le likhaitseli tsa bona, tse tsoang mathekeng a bo-ntat'a bona. 12Ba bang ba amohetse tjotjo hore ba tle ba tšolle mali, ba bang ba iphumanela tsoala e fetang tekanyo, ba fumana phaello ka ho hanyapetsa ba bang, 'me joale ba ntebetse, ho rialo Morena Molimo.
13“ ‘Ruri ke tla u otlela phaello eo u e entseng, ke u otlele le mali ao u a tšolotseng. 14Na u tla hle u tiisetse, kapa u be sebete mohla ke u otlang? Ke 'na Morena ea buileng, 'me ke tla etsa kamoo ke buileng kateng. 15Ke tla u qhalanyetsa har'a balichaba, ke u qhalanyetse le linaheng tse ling, 'me ke felise ho silafala ha hao. 16U itšilafalitse mahlong a balichaba, 'me u tla tseba hore ke 'na Morena.’ ”
Sebōpi sa Molimo se hloekisang
17Eaba lentsoe la Morena le fihla ho 'na, le re: 18“Uena ngoan'a motho, ho 'na ba ntlo ea Iseraele ba fetohile manya; bohle ke lethose feela, le lekapakapa, le tšepe, le loto tse kahar'a sebōpi; ke manya feela a silefera. 19Ka baka lena, Morena Molimo o bua tjena: ‘Kahobane lōna bohle le fetohile manya, ke tla le khōbōkanya Jerusalema. 20Joalokaha batho ba bokella silefera, le lethose, le tšepe, le loto, le lekapakapa ka sebōping ho li qhibilisa ka mollo, le 'na ke tla le khōbōkanya kahar'a motse ke halefile, khalefo ea ka e tlōkōma, ke le tlohele hona teng, le qhibilihe. 21Ruri ke tla le khōbōkanya, ke le butsoele ka khalefo ea ka e tlōkōmang, 'me le qhibilihele hona moo. 22Joalokaha silefera e qhibilisetsoa ka sebōping, le lōna le tla qhibilisetsoa hona moo Jerusalema, 'me le tla tseba hore ke 'na Morena ea hlatselitseng khalefo ea ka holim'a lōna.’ ”
Libe tsa baetapele ba Iseraele
23Lentsoe la Morena la boela la fihla ho 'na, la re: 24“Uena ngoan'a motho, bolella naha ena, u re: ‘U naha e e-s'o ka e neloa ke pula, kapa mafafatsane nakong ena eo ke halefileng ka eona.’ 25Kahare ho naha ena ho na le morero oa sekhukhu, o reroang ke baporofeta. Ba puruma joaloka tau ha e harola nyamatsane. Ba bolaea batho, ba nke maruo a bona le thepa ea bona ea bohlokoa, 'me basali ba bangata ba fetohe bahlolohali. 26Baprista ba bona ba tlōtse melao ea ka, ba silafatsa lintho tsa ka tse halalelang. Le hoja ba tseba, ha ba khetholle ntho e halalelang ho e sa halaleleng; ha ba rute batho ho khetholla se hloekileng ho se sa hloekang. Ha ba tsotelle ho boloka Lisabatha tsa ka, kahoo baa ntlontlolla. 27Mahosana a bona a joaloka liphiri tse harolang liphoofolo tseo li li bolaileng. A tšolla mali, a bolaea batho hore a tle a ithuise ka mano. 28Baporofeta ba bona ba ntlafatsa liketso tsena ka ho ba bolella lipono tsa leshano le bonohe ba bohata, ba re: ‘Morena Molimo o bua tjena,’ empa Morena a sa ka a bua joalo. 29Baahi ba naha ena ba hatella batho, baa utsoa, ba sōtla mofutsana le mohloki, ba hlōkōfatsa molichaba, ha ba ba sebeletse ka toka.
30“Ke ile ka batla motho har'a bona ea neng a ka tsosa lerako, a ema kapele ho 'na likheong tsa lona ho sireletsa naha ena hore ke se ke ka e timetsa, empa ha kea ka ka fumana le ea mong. 31Ka baka leo, ke ile ka hlatsetsa khalefo ea ka holim'a bona, ka ba timetsa ka khalefo ea ka e tukang malakabe, ka ba nea kotlo e lokelang liketso tsa bona, ho rialo Morena.”
