Sabole ea Morena
1Lentsoe la Morena la fihla ho 'na, la re: 2“Uena ngoan'a motho, talima Jerusalema, u nyatse libaka tse halalelang. Porofetela naha ea Iseraele. 3U bolelle naha eo ea Iseraele, u re: ‘Morena o bua tjena: Bona, kea u loantša, 'me ke tla tsomula sabole ea ka selateng sa eona, ke bolaee baahi ba hao ba lokileng le ba khopo. 4Erekaha ke tla bolaea ba lokileng le ba khopo, sabole ea ka e tla tsoa selateng sa eona, e bolaee batho bohle, ho tloha boroa ho isa lebōea. 5Batho bohle ba tla tseba hore ke 'na Morena, ea ntšitseng sabole ea ka selateng sa eona, 'me ha e ka ke ea hlola e khutlela ka ho sona.’
6“Ka baka lena, feheloa uena ngoan'a motho! Feheloa ka pelo e bohlōkō le ka masoabi a maholo moo ba ntseng ba u bona. 7E tle ere ha ba u botsa, ba re: ‘U fehelloa'ng?’ uena u tle u ba arabe, u re: ‘Ke ka baka la litaba tse tlang. Lipelo tsohle li tla qhibiliha, matsoho 'ohle a fokole, sebete sohle se fele, le mangoele 'ohle a otlane ke letsoalo.’ Taba tsena lia tla! Li tla phethahatsoa, ho rialo Morena Molimo.”
8Lentsoe la Morena la boela la fihla ho 'na, la re: 9“Uena ngoan'a motho, porofeta, u re: ‘Morena o bua tjena:
“ ‘Sabole ke eo! Sabole ke eo!
E leolitsoe ea ba ea tšōtsoa.
10E leolitsoe hore e tl'e etse mofela,
ea tšōtsoa
hore e phatsime sa lehalima!
“ ‘Na re lokela ho nyakalla, re thabe?
Chaba sa ka se ile sa nyelisa,
sa nyelisa likotlo le likeletso tsohle.
11“ ‘Sabole e ntšitsoe,
e ntšelitsoe ho tšōtsoa,
hore e tšoaroe,
e tiee ka letsohong;
e leolitsoe ea ba ea tšōtsoa,
hore e neoe 'molai ka letsohong.
12Bokolla, u hōoeletse,
uena ngoan'a motho,
hoba sabole e tlela sechaba sa ka,
e tlela mahosana a Iseraele.
Matšabeho a tlisoang ke sabole
a tla oela sechaba sa ka holimo,
a oele le mahosana a sona holimo.
Soaba, u kebise hlooho ea hao!
13“ ‘Chaba sena sa ka
ke se bea tekong;
haeba se fela se hana ho baka,
tsena tsohle li tla etsahala ho sona,
ho rialo Morena Molimo.’
14“Porofeta, ngoan'a motho,
u b'u ope liatla,
sabole e hlathe habeli,
e hlathe hararo,
sabole ea ho ba bolaea
e ba etsa mofela,
e ba etselitse sakana-la-nkope.
15Ke beile sabole
khorong tsohle tsa bona,
hore pelo tsa bona
li tle li nyahame,
ba bangata ba bona
ba khōthōmetsehe, ba oe.
Jo! e tsekema joaloka lehalima,
e tšotselitsoe hore e tl'e bolaee.
16Uena sabole e bohale,
hlatha ka ho le letona,
u hlathe ka ho le letšehali,
hohle mo u shebileng teng u hlathe.
17Le 'na liatla tsa ka ke tla li opa,
ebe khalefo ea ka ea kokobela.
Ke 'na Morena ea buileng.”
Sabole ea khosi ea Babilona
18Lentsoe la Morena la boela la fihla ho 'na, la re: 19“Uena ngoan'a motho, etsa litsela tse peli, tseo sabole ea khosi ea Babilona e tla tla ka tsona. Bobeli ba litsela tseo li qale naheng e le 'ngoe. U etse letšoao le bontšang moo tsela e khelohelang motseng teng. 20U etse tsela e le 'ngoe eo khosi e tla futuhela motse oa Raba oa Baamone ka eona, le e 'ngoe eo khosi e tla futuhela motse oa Juda le motse o hahelelitsoeng oa Jerusalema ka eona. 21Khosi ea Babilona e tla emisa mateanong a litsela, e emise mateanong a tsela tse peli ho batla tsela. E tla laola ka ho etsa lōtho ka metsu, e botse melimo ea eona ea lelapa, e hlahlobe sebete sa phoofolo e hlabiloeng. 22Motsu o ka letsohong la eona le letona o tla supa Jerusalema, moo khosi e tla isa litšetlo teng, e laele hore ho bolaoe, ho hlajoe mokhosi oa ntoa, ho beoe litšetlo likhorong tsa motse, ho hahoe marako, ho etsetsoe motse thibella. 23Sechaba sa Jerusalema ha se ka ke sa kholoa taba ena ka baka la lilekane tseo se li entseng. Empa boporofeta bona ke bo se hopotsang libe tsa sona, le ho se hlokomelisa hore se tla thōpuoa.
24“Ka baka lena, Morena Molimo o bua tjena: ‘Kahobane le entse hore ke se ke ka lebala libe tsa lōna ka ho mphetohela, 'me libe tseo tsa lōna li pepesitsoe ke liketso tsohle tsa lōna; kahobane le entse hore ke se ke ka le lebala, le tla isoa bothōpuoeng.
25“ ‘Uena khosana e silafetseng, e khopo ea Iseraele, letsatsi la kotlo ea hao le se le fihlile, 'me bophelo ba hao bo khopo bo tla fela! 26Kahoo Morena Molimo o bua tjena: Rōla moqhaka, u rōle le oona mofapahlooho. Litaba ha li sa tla ema joaloka pele: Ba ikokobelitseng ba tla phahamisoa, empa ba iphahamisitseng ba tla kokobetsoa. 27Lesupi! Lesupi! Motse ona ke tla o etsa lesupi! Ha o ka ke oa tsosoa ho fihlela eo e leng mong'a oona a fihla, ebe ke mo nea oona.’
Sabole le Baamone
28“Uena ngoan'a motho, porofeta, u re: ‘Morena Molimo o bua tjena ka Baamone le mahlapa a bona:
“ ‘Sabole! Sabole!
E ntšitsoe selateng ho bolaea,
ea tšōtsoa hore e timetse,
e phatsime sa lehalima.
29Lipono tsa lōna ke tsa bohata,
bonohe ba lōna ke ba leshano,
bo reng ka sabole le hlathe,
le hlathe melala ea ba babe,
le hlathe le ea ba khopo,
ba fihletsoeng ke pheletso ea bona,
bokhopo ba bona ebe boa fela.
30Busetsa sabole selateng sa eona,
ke tla u ahlōlela naheng ea heno,
naheng eo u tsoaletsoeng ho eona.
31Ke tla hlatsa khalefo ea ka,
ke e hlatsetse holim'a hao,
bohale ba ka bo tuke malakabe,
ke neelane ka uena ho ba sehlōhō,
bao e leng litsebi tsa ho timetsa.
32U tla chesoa ke mollo, u b'u timele,
mali a hao
a tšolleloe naheng ea heno;
ha u ka ke ua hlola u sa hopoloa,
hobane 'na ke leng Morena,
ke buile.’ ”
