PHALLO 37

₁Besalele a etsa areka ka lithupa tsa sefate sa mositsane; bolelele ba eona e ne e le lisenthimethara tse lekholo le leshome, bophara ba eona e le lisenthimethara tse mashome a tšeletseng a metso e tšeletseng, 'me bophahamo ba eona e le lisenthimethara tse mashome a tšeletseng a metso e tšeletseng. ₂Eaba o e maneha khauta e hloekileng kantle le kahare, 'me a e etsetsa moqhaka oa khauta o e potolohang. ₃A e etsetsa mehele e mene ea khauta maotong a eona a mane: mehele e 'meli ka lehlakoreng la pele, le e meng e 'meli ka lehlakoreng la bobeli. ₄Ka lithupa tsa sefate sa mositsane a etsa mefeng e jarang, 'me a e maneha khauta. ₅Eaba o khoesa mefeng eo meheleng e mahlakoreng a areka, ho tle ho jaroe areka ka eona.

₆Joale a etsa sekoahelo sa tefelo ea sebe ka khauta e hloekileng; bolelele ba sona e ne e le lisenthimethara tse lekholo le leshome, bophara ba sona e le lisenthimethara tse mashome a tšeletseng a metso e tšeletseng. ₇A etsa likerubime tse peli tsa khauta; a li etsa ka khauta e thutsoeng, lintlheng tse peli tsa sekoahelo sa tefelo ea sebe. ₈Kerubime ea pele e ne e le ka ntlheng ena ea sekoahelo, kerubime ea bobeli e le ka ntlheng eane ea sona. Lintlheng tse peli tsa sekoahelo sa tefelo ea sebe a etsa likerubime. ₉Likerubime li ne li otlolletse mapheo e tsona holimo, li khurumelitse sekoahelo sa tefelo ea sebe ka mapheo a tsona, lifahleho tsa tsona li talimane; lifahleho tsa likerubime li talimile malebane le sekoahelo sa tefelo ea sebe.

₁₀A etsa tafole ka lithupa tsa sefate sa mositsane. Bolelele ba eona e ne e le lisenthimethara tse mashome a robong, bophara ba eona e le lisenthimethara tse mashome a mane a metso e mehlano, bophahamo ba eona e le lisenthimethara tse mashome a tšeletseng a metso e supileng. ₁₁Eaba o e maneha khauta e hloekileng, 'me a e etsetsa moqhaka oa khauta o e potolohang. ₁₂A e etsetsa molimako o bophara ba seatla ho e potoloha, le moqhaka oa khauta o pota-potang molimako oo oa eona. ₁₃A e etsetsa mehele e mene ea khauta, a hokela mehele eo lihukung tse 'ne tsa maoto a eona a mane. ₁₄Haufi le molimako ho ne ho e-na le mehele eo ho eona ho khoesoang mefeng e jarang tafole. ₁₅Ka lithupa tsa sefate sa mositsane a etsa mefeng e jarang tafole, a e maneha khauta. ₁₆Ka khauta e hloekileng a etsa lijana tse tla beoa holim'a tafole: mafiso, le mafisoana, le linoelo, le mepotjoana e sebelisoang ha ho nyeheloa.

₁₇A etsa seluloana sa lebone ka khauta e hloekileng. Seluloana seo sa lebone a se etsa ka khauta e thutsoeng. Malulo a sona, le lenono la sona, le likhakeletso tsa sona, le lipalesa tsa sona, le lithunthung tsa sona, tsa thulelloa ho sona. ₁₈Lenono la seluloana le ne le e-na le makala a tšeletseng: a mararo a le ka lehlakoreng la pele, a mang a mararo a le ka lehlakoreng la bobeli. ₁₉Lekaleng le leng ho ne ho e-na le likhakeletso tse tharo, tse kang tsa sefate sa perekisi se nang le lipalesa le lithunthung. Lekaleng le leng hape ho ne ho e-na le likhakeletso tse tharo, tse kang tsa sefate sa perekisi, se nang le lipalesa le lithunthung. Ha etsoa joalo makaleng a tšeletseng a tlohang lenonong la seluloana. ₂₀Seluloaneng ho ne ho e-na le likhakeletso tse 'ne, tse kang tsa sefate sa perekisi, se nang le lipalesa le lithunthung. ₂₁Ho ne ho e-na le palesa tlas'a manono a mabeli a sona, le palesa e 'ngoe hape tlas'a manono a mabeli a sona; le palesa e 'ngoe hape-hape tlas'a manono a mabeli a sona. Ha etsoa joalo makaleng a tšeletseng a tlohang lenonong la seluloana. ₂₂Lipalesa tsa sona, le manono a sona, li ne li thulelletsoe le seluloana, e le ntho e le 'ngoe, e entsoeng ka khauta e hloekileng, e thutsoeng.

₂₃A etsa mabone a sona a supileng, le matlao a sona, le lithotobolo tsa sona, ka khauta e hloekileng. ₂₄Seluloana sena, le tsohle tsa sona, a li etsa ka khauta e hloekileng, eo boima ba eona e leng likilo tse mashome a mararo a metso e mehlano.

₂₅A etsa aletare ea mokubetso ka lithupa tsa sefate sa mositsane. Bolelele ba eona e ne e le lisenthimethara tse mashome a mane a metso e mehlano, bophara ba eona e le lisenthimethara tse mashome a mane a metso e mehlano, e ne e e-na le mahlakore a mane a lekanang; bophahamo ba eona e le lisenthimethara tse mashome a robong. Manaka a eona a ne a entsoe ka thupa e le 'ngoe le aletare. ₂₆A e maneha khauta e hloekileng kaholimo, le ka mahlakoreng ho e potoloha, le manakeng a eona. A e etsetsa moqhaka oa khauta o e potolohang. ₂₇A e etsetsa mefitšane e 'meli ea khauta tlas'a moqhaka oa eona, holim'a lihuku tsa eona tse peli, le holim'a mahlakore a eona a mabeli. E tla ba moo ho khoesoang mefeng, hore aletare e tle e jaroe ka eona. ₂₈A etsa mefeng eo ka lithupa tsa sefate sa mositsane, 'me a e maneha khauta.

₂₉A etsa ole e tlotsang, e halalelang, le mokubetso o monko o monate, joalokaha ho etsa setsebi se tsoakang litlolo.