Taelo ea hore ho tsamauoe
1Morena a bua ho Moshe, a re: “Tloha sebakeng sena, uena le sechaba seo u se nyolotseng naheng ea Egepeta, u se ise naheng eo ke ileng ka hlapanyetsa Aborahama, le Isaka, le Jakobo, ka re: ‘Ke tla e nea litlōhōlō tsa hao.’ 2Ke tla rōmela lengeloi ho u etella pele, 'me ke tla leleka Bakanana, le Baamore, le Bahete, le Baperise, le Bahife, le Bajebuse. 3Ke naha e phallang lebese le mahe a linotši, empa 'na ha ke na ho nyoloha le lōna, hobane le sechaba se manganga, esere ka tšoha ke le timetsa tseleng.”
4Eare ha sechaba se utloa mantsoe ana a bohlōkō, sa lla, 'me ha se ke ha e-ba ea roalang mekhabiso ea hae. 5Eaba Morena o re ho Moshe: “Bolella bana ba Iseraele, u re: ‘Le sechaba se manganga; ha nka ka ba har'a lōna motsotsoana o le mong feela, nka le timetsa. Joale rōlang mekhabiso ea lōna, ke tle ke tsebe hore na ke etsa eng ho lōna.’ ” 6Ka baka leo, bana ba Iseraele ha baa ka ba hlola ba roala mekhabiso ea bona, ho qala ha ba le thabeng ea Horebe.
Tente ea Morena
7Moshe o ne a ee a nke Tente, ebe o e hloma kathōko ho liahelo, hojana le tsona, 'me a e bitse Tente ea Morena. Joale bohle ba neng ba batla ho tseba thato ea Morena, ba ne ba ee ba ee Tenteng eo, e leng Tente ea Morena, e neng e le kathōko ho liahelo. 8Ha Moshe a e-ea Tenteng eo, sechaba sohle se ne se ee se raohe, motho ka mong a eme monyakong oa tente ea hae, a talime Moshe ho fihlela a kena ka Tenteng. 9Kamehla ha Moshe a kena ka Tenteng, leru le lopaletseng le ne le ee le theohe, le eme monyakong oa Tente eo; ebe Morena o bua le Moshe. 10Batho bohle ba ne ba ee ba bone leru le lopaletseng le eme monyakong oa Tente, 'me bohle ba ne ba ee ba raohe, ba khumame, motho ka mong monyakong oa tente ea hae. 11Morena o ne a ee a bue le Moshe, lifahleho li talimane, joalokaha motho a bua le motsoalle oa hae. Moshe o ne a ee a khutlele liahelong, empa lehlahana la hae Joshua, mora oa Nune, oa mohlankana, eena o ne a sa ke be a tsoe ka Tenteng.
Morena o tšepisa ho ba le sechaba sa hae
12Eaba Moshe o re ho Morena: “Bona, u itse ho 'na: ‘Nyolla sechaba sena,’ empa ha u e-s'o mpolelle hore na u tla nthōma le mang, le hoja uena u itse: ‘Ke tseba lebitso la hao, 'me ke bile ke u hauhetse.’ 13Haeba u nkhauhetse, joale kea u rapela: ak'u mpontše litsela tsa hao, kea u rapela, ke tle ke u tsebe; u tle u fele u nkhauhele. Ak'u hopole hore batho bana ke sechaba sa hao!”
14Morena a re: “'Na, ka sebele sa ka, ke tla tsamaea le uena, ke e'o u phomotsa.”
15Moshe a re ho eena: “Haeba uena ka sebele u sa tsamaee le 'na, u se ke ua re tlosa mona. 16Hona joale ho tla tsejoa ka'ng hore u nkhauhetse, 'na le sechaba see sa hao? Na hase ka ho tsamaea le rōna, e le hore 'na le sechaba see re tle re khethehe har'a lichaba tsohle tsa lefatše?”
17Morena a re ho Moshe: “Ntho ena eo u e buileng, le eona ke tla e etsa, hobane ke u hauhetse, 'me ke tseba lebitso la hao.”
18Moshe a re: “Ak'u mpontše tlōtla ea hao, kea u rapela!”
19Morena a re: “Ke tla u bontša botle ba ka bo halimang, ke be ke phatlalatse lebitso la Morena kapele ho uena. Ke tla hauhela eo ke ratang ho mo hauhela, ke utloele bohlōkō eo ke ratang ho mo utloela bohlōkō.” 20Morena a boela a re: “Ha u ka ke ua tseba ho bona sefahleho sa ka, hobane motho a ke ke a mpona, eaba oa phela.”
21Morena a nt'o re: “Bona, ho na le sebaka pel'a ka mona. Uena u tla ema holim'a lefika. 22Etlare ha tlōtla ea ka e feta, ke tla u kenya lepatsong la lefika, ke u koahele ka seatla sa ka, ho fihlela ke ba ke feta. 23Joale ke tla tlosa seatla sa ka, 'me u tla bona sekotlo sa ka, empa sefahleho sa ka sona se ke ke sa bonoa.”
