ESETERE (SEGERIKE) B

₁Kopi ea lengolo leo ke ena: “Khosi e Kholo, Ahashuerushe, o ngolla babusi le mahosana a linaha tse lekholo le mashome a mabeli a metso e supileng, ho tloha India ho ea fihla Ethiopia, litaba tsena tse latelang:

₂“Ke le 'musi oa lichaba tse ngata le morena oa lefatše lohle, ha kea ka ka ikhohomosa ka baka la matla a ka, empa kamehla ka busa ka mosa le ka molemo; ka ikemisetsa ho hlophela babusuoa ba ka hore ba phele ho se na likhathatso, 'musong oa ka ho phelisanoe, ho tsamauoe ho se thibelo ka ho phatlalla ha oona, 'me ho hlongoe khotso, e leng ntho eo batho bohle ba e nyoretsoeng.

₃“Ha ke botsa baeletsi ba ka hore na seo se ka fihleloa joang, monna ea seli ka ho fetisisa, ea ipakileng a e-na le maikutlo a matle a sa fetoheng, le botšepehi bo tsitsitseng, eo a seng a bile a hloeletse setulong sa bobeli 'musong, e leng Hamane, ₄o ile a re bontša hore, har'a lichaba tsohle tse lefatšeng, ho hasane sechaba se itseng se hloileng batho, se nang le melao e fapaneng le ea lichaba tse ling, se sa khaotseng ho hana melao ea khosi; 'me ka hona batho bao ba sitisa 'muso o tlamahanyang bohle, oo re o okametseng ka mokhoa o nepahetseng ho se khoao.

₅“Joale re utloisisa hore sechaba sena, sona feela, se itšatalalitse ho hanyetsa batho bohle, 'me se ikhethile ka ho latela melao eo e seng ea habo rona, le hore se talima puso ea rona hampe 'me se etsa liketso tse mpehali, le hona hore 'muso o sitoe ho tiea. ₆Ka baka leo re laetse hore bao le ba supisitsoeng ka lengolo ke Hamane, ea fuoeng boikarabelo litabeng tsa rona, 'me eo e leng ntat'a rona oa bobeli, bohle 'moho le basali le bana ba bona, ba felisoe tu! ka sabole ea lira tsa bona, ho se qenehelo kapa mohau, ka letsatsi la leshome le metso e mene la khoeli ea leshome le metso e 'meli, e leng ea Adare, ea monongoaha. ₇Ka tsela ena bahanyetsi ba rona ba maobane le kajeno ba tla shoa lefu la matsoho ka tsatsi le le leng, e le hore ka nako e tlang puso ea rona e be e tsitsitseng 'me e tiileng ho ea ho ile.”