ESETERE (SEGERIKE) 3

₁Ka mora' tsena, khosi Ahashuerushe a phahamisa Hamane oa Moakake, mora oa Hamadatha; a mo fa boemo bo kaholimo, bo fetang ba metsoalle eohle ea khosi. ₂Bahlanka bohle ba khosi ba ne ba obama ka pele ho Hamane, joalokaha khosi e laetse. Empa Moredekai ha aa ka a obamela Hamane.

₃Joale bahlanka ba khosi ba re ho Moredekai: “Ke ka baka la'ng ha u sa tsotelle taelo ea khosi?” ₄Ka letsatsi le leng le le leng ba 'na ba bua joalo le eena, empa a se ke a ba mamela. Kahoo ba bolella Hamane hore Moredekai o hana litaelo tsa khosi. Moredekai o ne a ile a ba bolella hore eena ke Mojuda. ₅Ha Hamane a tsebile hore Moredekai o hana ho mo obamela, a tlokoma ke khalefo, ₆'me a rera ho ripitla Bajuda bohle 'musong oa Ahashuerushe.

₇Ka selemo sa leshome le metso e 'meli sa puso ea Ahashuerushe, a laela hore ho laoloe ka lotho ho fumana hore na ho timetsa, ka tsatsi le le leng, lesika lohle la Moredekai ho tla etsoa ka letsatsi lefe la khoeli efe. Lotho ea supa letsatsi la leshome le metso e mene la khoeli ea Adare.

₈Eaba Hamane o re ho khosi Ahashuerushe: “Ho na le sechaba se hasa-hasaneng har'a lichaba tsohle tse 'musong oa hao. Melao ea batho bao e fapane haholo le ea lichaba tsohle tse ling, 'me bona ha ba tsotelle melao ea khosi. Ka baka lena, khosi e ke ke ea fumana molemo oa letho ka ho ba tlohela. ₉Haeba khosi e ka khahloa, a e ke e etse qeto ea ho ba timetsa. Ha e le 'na, ke tla eketsa lichelete tsa polokelo ea matlotlo ea khosi ka litalenta tsa silefera tse likete tse leshome.”

₁₀Eaba khosi e rola reng ea eona e neng e le letšoao, 'me ea e nea Hamane ka letsohong, hore a tiise ka letšoao la borena mangolo a tsoang Bajuda. ₁₁Khosi ea re ho Hamane: “Ipolokele chelete eo, 'me u etse ka sechaba seo kamoo u ratang.”

₁₂Ka letsatsi la leshome le metso e meraro la khoeli ea pele bangoli ba khosi ba bitsoa; 'me, ho ea ka litaelo tsa Hamane, ba ngolla balaoli le mahosana a naha e 'ngoe le e 'ngoe ho tloha India ho ea fihla Ethiopia, mangolo lebitsong la khosi Ahashuerushe; e ne e le linaha tse lekholo le mashome a mabeli a metso e supileng, 'me mangolo a rometsoeng ho babusi ba lichaba tseo a ne a ngotsoe ka lipuo tsa habo tsona. ₁₃Mangolo ana a romeloa ka lititimi hohle 'musong oa Ahashuerushe, ho ripitla leloko lohle la Bajuda tsatsing le le leng, la khoeli ea leshome le metso e 'meli, e leng Adare, le ho hapa ling tsohle tsa bona.