Mofumahali Fashiti o tlola taelo ea khosi
1Litaba tsena li etsahetse mehleng ea Ahashuerushe; Ahashuerushe eo a neng a busa linaha tse lekholo le mashome a mabeli a metso e supileng, ho tloha naheng ea India ho ea fihla naheng ea Ethiopia. 2Hona mehleng eo, ha khosi Ahashuerushe a lutse teroneng ea hae ea borena motseng oa Shushane, 3ka selemo sa boraro sa puso ea hae, a etsetsa metsoalle ea hae le ba tsoang lichabeng tse ling tsohle, mokete, mahosana a Baperesiea le a Bamede, le ba baholo ba babusi ba litikoloho ba le teng le bona. 4Joale a nka matsatsi a lekholo le mashome a robeli a ntse a ba bontša matlotlo a 'muso oa hae le khanya ea borui ba hae e thabisang mahlo.
5Ha matsatsi ana a mokete a se a fetile, khosi ea etsetsa balichaba ba neng ba ahile motseng oo mokete, o ileng oa qeta matsatsi a tšeletseng. O ne o tšoaretsoe mabaleng a ntlo ea khosi. 6Mabala a ne a khabisitsoe ka masira a masoeu le a maputsoa, a neng a leketlisitsoe likhoeleng tse tšoeu le tse khubelu, a tlameletsoe mefitšaneng e neng e entsoe ka khauta le silefera, 'me e hoketsoe litšieng tsa mahakoe a mafubelu le a masoeu. Litulo tse nang le mesamo li ne li entsoe ka khauta le silefera, li beiloe holim'a lebala le katiloeng ka emeralda le mahakoe a mafubelu le a masoeu. Litulo li ne li koahetsoe ka masela a matle-matle a homiloeng, a nang le lirosa ho potoloha. 7Ho ne ho e-na le linoelo tsa khauta le tsa silefera; 'me ho ne ho ka bohuoa mohope o khabisitsoeng ka daemane tse khubelu, o nong o ka rekisoa litalenta tse likete li mashome a mararo. Ho ne ho qhatsoa veine e monate ka bongata, ea mofuta o nooang ke khosi ka sebele. 8E mong le e mong o ne a ka noa kamoo a ratang kateng, ho ea ka thato ea khosi; hobane e ne e laetse bahlanka ba eona hore ba etsetse motho ka mong kamoo a ratang kateng.
9Mofumahali Fashiti le eena a etsetsa basali mokete ka tlung ea khosi Ahashuerushe.
10Ka letsatsi la bosupa, ha khosi e thabisitsoe ke ho noa veine, ea bitsa Hamane, Basane, Tharra, Borase, Satolta, Abatasa le Tharaba, e leng mahaole a supileng a neng a sebeletsa khosi Ahashuerushe. 11Ea a laela hore a tlise mofumahali ka pele ho khosi, hore eona e mo lulise teroneng, e mo roese mofapahlooho, 'me e bontše matona a eona le ba lichaba tse ling botle ba hae; hobane o ne a le motle ruri. 12Empa mofumahali Fashiti a hana ho tla le mahaole. Ka baka lena, khosi ea khopisoa, ea ba ea halefa. 13Joale ea re ho metsoalle ea eona: “Le utloile seo Fashiti a se buileng. Bolelang molao bakeng sa taba ea mofuta oo, 'me le ahlole.”
14Eaba ho atamela Arkasaeose, Sarsathaeose le Maleseare, matona a Baperesiea le a Bamede, a neng a lula haufi-ufi le khosi e le batho ba ka sehloohong. 15Ba e tsebisa hore na ho ea ka molao e ka khona mofumahali Fashiti a etsoe joang, kaha a sa phetha litaelo tsa khosi tse rometsoeng ho eena ka mahaole.
16Eaba Mukaeose o araba a le ka pele ho khosi le mahosana, o re: “Mofumahali Fashiti ha a ea siteloa khosi feela, empa o sitetsoe le mahosana 'ohle, le babusi bohle ba linaha tsa khosi. 17(Hobane khosi e ne e ba phetetse lipolelo tsa mofumahali, e boletse kamoo a arabileng khosi kateng.) 18Ka ho ea ka mokhoa oo ka oona a arabileng khosi Ahashuerushe, ka mokhoa o joalo mafumahali 'ohle a mang a matona a Baperesiea le a Bamede, hoba a utloe tsa karabo ea mofumahali ho khosi, a ke ke a tšaba ho hlahisetsa banna ba bona tlhomphollo e tšoanang. 19Haeba khosi e ka khahloa, e ke e ntše taelo ea bokhosi, e tla ngoloa melaong ea Peresiea le ea Media. Ho se nkoe bohato bo bong! 'Me mofumahali a se ke a hlola a atamela ho khosi, e tla fana ka litokelo tsa hae tsa bofumahali ho mosali e mong e motle ho mo feta. 20Ho phatlalatsoe molao o beiloeng ke khosi, hore o phethoe 'musong oohle oa eona. Ka tsela ena basali bohle ba tla hlompha banna ba bona, ebang banna bao ke mafutsana kapa barui.”
21Keletso ena ea thabisa khosi le mahosana, 'me khosi ea etsa kamoo Mukaeose a elelitseng kateng. 22Eaba khosi e romela mangolo linaheng tsohle tsa 'muso oa eona, e le a ngotsoeng lipuong tsohle tsa linaha tseo, e le hore banna ba hlonepshoe malapeng a bona.
