Bajuda ba timetsa lira
1Ka letsatsi la leshome le metso e meraro la Adare, e leng khoeli ea leshome le metso e 'meli, mangolo a neng a ngotsoe ke khosi a ne a fihlile. 2Tsatsing lona lena, ba loantšang Bajuda ba ile ba timetsoa. Ha ho motho ea kileng a ba ema kapele, ke ho ba tšaba. 3Babusi ba linaha le mahosana le bangoli ba khosi ba ne ba hlompha Bajuda, hobane ba ne ba tšaba Moredekai. 4Taelo ea khosi e ne e entse hore botumo ba hae bo phatlalle le 'muso oohle.
6Motseng oa Shushane, Bajuda ba bolaea banna ba makholo a mahlano, 7har'a bona ho e-na le Pharesanestane, Delfone, Phasga, 8Pharadatha, Barea, Sarbakha, 9Marmasima, Arufaeose, Arsaeose le Sabuthaeose, 10e leng bara ba leshome ba Hamane oa Moakake, mora oa Hamadatha, sera sa Bajuda; 'me ba hapa thepa ea bona. 11Ka lona letsatsi leo, khosi ea tlisetsoa palo ea batho ba bolailoeng Shushane.
12Joale khosi ea re ho Esetere: “Motseng oa Shushane Bajuda ba bolaile banna ba makholo a mahlano; linaheng tse ka mathoko, u lekanya hore na teng ba entse'ng? U sa tla kopa eng hape? E tla ananeloa.” 13Esetere a araba khosi, a re: “A ho ke ho lumelloe Bajuda hore le hosasane ba etse ka mokhoa o tšoanang, le hore ho fanyehoe litopo tsa bara ba leshome ba Hamane.” 14Khosi ea lumella hore ho etsoe joalo, 'me ea ntša taelo ea hore Bajuda ba motse ba fanyehe litopo tsa bara ba leshome ba Hamane. 15Joale ka la leshome le metso e mene la khoeli ea Adare, Bajuda ba Shushane ba khobokana, 'me ba bolaea banna ba makholo a mararo, empa ba se ke ba hapa thepa efe kapa efe.
16Ha e le Bajuda ba bang ba 'muso oa khosi, ba ile ba khobokana, ba sireletsana. Ba fumana phomolo ho ba ba loantšang. Efela ba ne ba bolaile batho ba likete li leshome le metso e mehlano, ka la leshome le metso e meraro la khoeli ea Adare, empa ba se ke ba hapa thepa efe kapa efe. 17Joale, ka la leshome le metso e mene la eona khoeli eo, ba phomola 'me ba hlola letsatsi leo la phomolo ba thabile 'me ba nyakaletse; 18athe Bajuda ba motse oa Shushane ba neng ba khobokane le ka la leshome le metso e mene ba sa phomole, bona ba hlola la leshome le metso e mehlano ba thabile 'me ba nyakaletse. 19Ka baka lena Bajuda ba linaheng tsohle tse ka mathoko ba keteka la leshome le metso e mene la khoeli ea Adare, e le letsatsi le monate, ba nyakaletse 'me ba abelana limpho. Empa ba ahileng metseng e meholo, bona ba keteka la leshome le metso e mehlano la Adare e le letsatsi le monate, la nyakallo, ka ho abelana limpho.
Mokete oa Purime
20Moredekai a ngola lintho tsena kaofela bukeng, eo a ileng a e romela ho Bajuda bohle ba ahileng 'musong oa Ahashuerushe, leha e le ba haufi kapa ba hole, 21ho ba laela hore ba keteke matsatsi ana a monate, e leng la leshome le metso e mene, le la leshome le metso e mehlano la Adare; 22hobane ke ka matsatsi ana Bajuda ba ileng ba phomola ho lira tsa bona. 'Me khoeli kaofela ea Adare, eo ka eona mahlomola a bona a ileng a fetoloa thabo, 'me nako ea tšiamo e ileng ea fetoloa letsatsi le monate, khoeli eo ba e keteke e le nako e ntle ea ho etsa mekete ea manyalo le nako ea nyakallo, le eona nako ea ho abelana limpho le metsoalle, le ea ho li abela mafutsana.
23Bajuda ba amohela ka thabo tseo Moredekai a ileng a ba ngolla tsona, 24tsa kamoo Hamane, mora oa Hamadatha, oa Masedonia, a ileng a ba loantša kateng, a ba a ntša taelo, 'me a laola ka lotho, ha a rerile ho ba ripitla; 25le hore kamoo a ileng a tla ho khosi kateng, ho bua le eona hore e laele hore Moredekai a fanyehoe; empa bomalimabe boo a neng a bo reretse Bajuda bo ile ba mo oela holimo, 'me a fanyehoa, eena 'moho le bana ba hae. 26Ka baka lena matsatsi ao a bitsoa hore ke a 'Purime', hobane puong ea Bajuda lentsoe lena le bolela 'Lilotho'. Ka baka la tsohle tse ngotsoeng lengolong lena, ka baka la tsohle tseo ba ileng ba li mamella, le ka baka la tsohle tse ileng tsa ba hlahela, 27Bajuda ba itlama, bona le litloholo tsa bona, le bohle ba tla ipitsa Bajuda, hore ba tla boloka matsatsi oa a beiloeng, ba sa fose le ka mohla. Matsatsi ana a tla nkuoa e le a khopotso, molokong o mong le o mong, metseng eohle, malapeng 'ohle le linaheng tsohle. 28Matsatsi ao a 'Purime' a tla ketekoa ka linako tsohle. A se ke a lebaloa ke litloholo tsa Bajuda!
29Mofumahali Esetere, morali oa Aminadabe, le Moredekai, oa Mojuda, ba ile ba ngola tsohle tseo ba li entseng, 'me ba tiisa lengolo le amanang le mokete oa 'Purime'. 30-31Moredekai le mofumahali Esetere ba ile ba nka boikarabello ba qeto eo, 'me ba itihela ka setotsoana morerong oo. 32Ka taelo ea hae, Esetere a etsa hore mokete oo o bolokoe ka ho sa eeng kae; 'me hoo ho ile ha ngoloa libukeng, hore ho se ke ha lebaloa.
