Bajuda ba laeloa ho itšireletsa
1Ka lona letsatsi leo, khosi Ahashuerushe a nea Esetere ling tsohle tsa Hamane, moetselletsi oa Bajuda. Ha e le Moredekai, a biletsoa tlung ea khosi, hobane Esetere o ne a ile a bolella khosi hore ke mong ka eena. 2Khosi ea nka reng eo a neng a e ntšitse monoaneng oa Hamane, 'me a e nea Moredekai. Eaba Esetere o bea Moredekai hore e be mookameli oa lintho tsohle tsa Hamane.
3Esetere a boela a bua le khosi, a itihela maotong a eona, a e kopa hore e nyopise bobe ba Hamane, le tsohle tseo a neng a li reretse Bajuda. 4Eaba khosi e supa Esetere ka lere la eona la khauta. Esetere a ema, a atamela pel'a khosi, 5'me a re: “Haeba e le ntho e ka u khahlang, 'me eba u nkhauhetse, a ho ke ho romeloe mangolo a hlakolang ane a neng a rometsoe ke Hamane, ao a neng a kile a a ngolla ho ripitla Bajuda ba 'muso oa hao. 6Nka tiisetsa joang ho bona bobe bo tla etsoa ho sechaba sa heso? 'Na nka pholosoa joang, ha ho timetsoa bang ka 'na bohle?”
7Khosi ea araba Esetere, e re: “Ha e le moo ke u neile ling tsohle tsa Hamane, 'me ke u khahlisitse ka ho laela hore a fanyehoe sefateng, hobane o ne a rerile ho timetsa Bajuda, joale u batla'ng hape? 8Ho ho lona ho ngola lebitsong la ka, kamoo le ratang kateng, le be le tiise lengolo ka reng ea ka ea letšoao; hobane tsohle tse ngotsoeng ka taelo ea khosi le ho tiisoa ka reng ea ka, ha li ka ke tsa hanyetsoa.”
9Ka letsatsi la mashome a mabeli a metso e meraro la khoeli ea pele, e leng ea Nisane, hona selemong seo, bangoli ba khosi ba bitsoa. Eaba ho ngolloa Bajuda ho ba tsebisa litaelo tse neiloeng baokameli le babusi ba linaha, ho tloha India ho ea fihla Ethiopia, e le linaha tse lekholo le mashome a mabeli a metso e supileng, 'me naha e 'ngoe le e 'ngoe ea ngolloa ka puo ea habo eona. 10Mangolo a ngoloa lebitsong la khosi, 'me a tiisoa ka reng ea eona. Mangolo ana a romelloa ka lititimi.
11Ka mangolo ana khosi ea laela Bajuda ho latela melao ea habo bona, motseng ofe kapa ofe, leha e le tabeng ea ho itšireletsa kapa ea ho etsa ka lira le bolantši ba bona ho ea ka boithatelo ba bona, 12'musong oohle oa Ahashuerushe, ka letsatsi le le leng, e leng la leshome le metso e meraro, khoeling ea leshome le metso e 'meli, e leng ea Adare.
