Toro e makatsang ea Moredekai
1Selemong sa bobeli sa puso ea Ahashuerushe, Khosi e Kholo, letsatsing la pele la khoeli ea Nisane, Moredekai, mora oa Jaire, mora oa Shimei, mora oa Kishe, oa leloko la Benjamine, a ba le toro. 2Moredekai e ne e le Mojuda ea ahileng motseng oa Shushane, motho e moholo ea sebetsang lekhotleng la khosi. 3E ne e le e mong oa bahapuoa bao Nebukadenesare, khosi ea Babilona, a neng a ba tlosa Jerusalema ba e-na le Jekonia, khosi ea Juda.
4Ena e bile toro ea hae. Ho ne ho e-na le lerata le mofere-fere, methoathoaretso le tšisinyeho ea lefatše, e le pherekano feela lefatšeng. 5Joale ha hlaha likhanyapa tse peli tse kholo, bobeli li itokiselitse ho loantšana, li roraka. 6Eitse ha li ntse li rora joalo, lichaba tsohle tsa itokisetsa ho loana le ho futuhela sechaba sa ba lokileng. 7E ne e le letsatsi la lefifi le la bofifi, la mathata le la matsoalo, la matlokotsi le la pherekano e tšabehang lefatšeng. 8Sechaba sohle sa ba lokileng sa ferekana, bohle ba tšohile limpe tse ba tjametseng, ba le lintšing tsa timelo. 9Eaba ba hoeletsa ho Molimo; 'me ka baka la sello sa bona, ha phalla noka e kholo, e metsi a mangata, empa joaloka hola e tsoa selibeng se senyenyane. 10Joale leseli la fihla 'me letsatsi la chaba; joale ba eisehang ba phahamisoa, ba ba ba metsa ba boemong.
11Eare ha Moredekai a phaphama torong ena, eo ka eona a boneng seo Molimo a hopotseng ho se etsa, haesale a e nahana, 'me letsatsi lohle a batla ka mekhoa eohle ho e utloisisa.
Moredekai o pholosa bophelo ba khosi Ahashuerushe
12Ka tsatsi le leng, ha Moredekai a phomola lepatlelong le pel'a ntlo ea borena, a e-na le mahaole a mabeli, Gabatha le Tharra, ba neng ba lebela hona teng, 13a ba utloa ba ntse ba buisana. A hloaea tsebe ho tseba hore na ba hopotse life, 'me a tseba hore ba rerile ho bolaea khosi Ahashuerushe; a ba a ea ho tsebisa khosi. 14Khosi ea botsisisa mahaole ao a mabeli; 'me eare hoba ba lumele molato, a tlosoa ho ea bolaoa.
15Khosi ea laela hore litaba tsena li ngoloe fatše, li se ke tsa lebaleha. Le eena Moredekai a li ngola joalo. 16Khosi ea laela hape hore Moredekai a tsoele pele ho sebetsa ka lekhotleng, eaba ea mo putsetsa hoo. 17Empa Hamane, mora oa Hamadatha, oa naha ea Akake, ea neng a tlotliloe haholo ke khosi, o ne a ipatlela monyetla oa ho ntša Moredekai le sechaba sa habo kotsi, ka baka la taba eo ea mahaole a mabeli a khosi.
