Morena o tla timetsa lichaba tsa Kanana
1“Mamela, uena Iseraele. Kajeno u tla tšela Jorodane, u e'o hlōla lichaba tse kholo, tse u fetang ka matla, tse nang le metse e meholo ea liqhobosheane tse fihlang marung. 2Kamoo le ba tsebang kateng, Baanake ke sechaba sa batho ba liqhobane, ba balelele, bao le utloileng ho buuoa ka bona, ho thoe: ‘Ke mang ea ka emang kapele ho Baanake?’ 3Ka baka leo he, kajeno tseba hore Morena Molimo oa lōna, ke eena ea le eteletseng pele, ke eena mollo o chesang. O tla ba timetsa, a le hlōlele bona. Le tla ba leleka, le ba timetse kapele, joalokaha Morena a buile ho lōna.
4“Hoba Morena a ba leleke kapele ho lōna, le se ke la re ka lipelong tsa lōna: ‘Ke ka baka la ho loka ha ka Morena a mphihlisitseng naheng ena hore e be ea ka.’ Ke ka lebaka la bokhopo ba lichaba tsena, Morena a li lelekang kapele ho lōna. 5Hase ka baka la ho loka ha lōna, kapa ka baka la ho loka ha lipelo tsa lōna naha ena e tlang ho ba ea lōna, empa ke ka baka la bokhopo ba lichaba tsena Morena a li lelekang kapele ho lōna, e le hore Morena a phethahatse tšepiso eo a neng a e hlapanyetse bo-ntat'a lōna Aborahama, le Isaka, le Jakobo.
6“Ka baka lena he, tsebang hore Morena Molimo oa lōna, ha a le nee naha ena e ntle ka baka la ho loka ha lōna, hobane le sechaba se manganga.”
Namane ea khauta
(Phal. 31:18 – 32:35)
7“Le hopole, 'me le se ke la lebala kamoo le ileng la halefisa Morena Molimo oa lōna kateng, ha le le lehoatateng. Ho tloha mohla le tsoang naheng ea Egepeta, ho fihlela le ba le fihla sebakeng sena le 'nile la fetohela Morena. 8Leha le le Horebe le ne le halefise Morena; Morena a le halefela hoo a neng a batle a le timetsa, 9ha ke ne ke nyolohetse thabeng ho amohela matlapa, e leng matlapa a selekane seo Morena a se entseng le lōna, 'me ka lula thabeng ka matsatsi a mashome a mane, le ka masiu a mashome a mane, ke sa je, ke sa noe metsi. 10Morena a 'nea matlapa a mabeli a ngotsoeng ke monoana oa Molimo. Holim'a 'ona ho ne ho ngotsoe mantsoe 'ohle ao Morena a neng a a bue ho lōna, holim'a thaba, a le kahar'a mollo, mohla le neng le phuthehile. 11Hoba ho fete matsatsi a mashome a mane le masiu a mashome a mane, Morena a 'nea matlapa a mabeli, e leng matlapa a selekane.
12“Morena a re ho 'na: ‘Ema, u tlohe mona, u theohe kapele, hobane sechaba sa hao, seo o se ntšitseng naheng ea Egepeta, se entse bobe. Se khelohile ka potlako tseleng eo ke se laetseng ho tsamaea ka eona. Se se se ipōpetse molimo ka khauta.’
13“Eaba Morena o re ho 'na: ‘Ke bone sechaba sena; bona, ke sechaba se manganga! 14Ntlohelle ke se timetse, ke hlakole lebitso la sona katlas'a leholimo. Uena ke tla u etsa sechaba se matla, se seholo ho feta sena.’
15“Ka tsamaea, ka theoha thabeng e neng e ntse e tuka mollo, ke nkile matlapa a mabeli a selekane. 16Ka talima, ka bona hore le sitetsoe Morena Molimo oa lōna, le ipōtse namane ka khauta, 'me ka potlako le khelohile tsela eo Morena a le laetseng eona. 17Ka baka lena ke ile ka nka matlapa a mabeli, ka a ptjatlanya fatše, ka a pshatla moo le ntseng le bona.
18“Eaba ke itihela fatše, kapele ho Morena. Ka matsatsi a mashome a mane, le ka masiu a mashome a mane, joaloka khetlo la pele, ha kea ka ka ja, leha e le ho noa metsi, ka baka la sebe seo le se entseng ka ho etsa bobe mahlong a Morena, 'me la mo halefisa. 19Ke ne ke tšaba bohale ba Morena, le khalefo eo a neng a le halefetse ka eona, hoo a neng a rata ho le timetsa. Empa le mohlang oo Morena a 'mamela. 20Morena o ne a halefetse Arone, hoo a neng a batle a mo timetsa, empa le mohlang oo ke ne ke rapelle Arone. 21Ka nka ntho eo le entseng sebe ka eona, e leng namane eo le neng le e bōpile, ka e chesa ka mollo, ka e sila, ea e-ba thuèthuè joaloka lerōle, ka e qhalla ka nōkaneng e theohang thabeng.
22“Hape ha le le Tabera, le Masa, le Kiborote-Hatafa, le teng le ne le halefise Morena.
23“Ha le le Kadeshe-Barenea a le rōma, a re ho lōna: ‘Nyolohang, le e'o hapa naha eo ke le neileng eona.’ Le teng le ne le fetohele taelo ea Morena Molimo oa lōna, 'me la se ke la mo kholoa leha e le ho mo mamela. 24Haesale ke le tseba, le 'nile la fetohela Morena.
25“Eaba ke itihela fatše, kapele ho Morena, ka matsatsi a mashome a mane, le ka masiu a mashome a mane, hobane Morena o ne a re oa le timetsa. 26Ka rapela Morena, ka re: ‘Oho, Morena Molimo, se ke ua timetsa sechaba sa hao, seo e leng lefa la hao, seo u se lopolotseng ka boholo ba hao, ua se ntša Egepetsa ka letsoho la hao le matla. 27Hopola bahlanka ba hao bo-Aborahama, le Isaka, le Jakobo. Se ke ua natsa manganga a sona, kapa bokhopo ba sona, kapa sebe sa sona; 28esere baahi ba naha eo u se ntšitseng ho eona ba re: Kahobane Morena a sitiloe ho fihlisa sechaba sena naheng eo a neng a se hlapanyelitse eona, kapa kahobane a se hloile, o ile a se ntša Egepeta ho tla se bolaela lehoatateng mona. 29Empa ke sechaba sa hao le lefa la hao; ke sechaba seo u se ntšitseng ka matla a maholo, le ka letsoho la hao le otlolohileng.’
