Boholo ba Morena
1“Ka baka leo, ratang Morena Molimo oa lōna, le bōlōke li taelo tsa hae, le litemoso tsa hae, le likahlōlo tsa hae, le melao ea hae kamehla. 2Tsebang kajeno, hobane ha ke bue le bana ba lōna, ba sa kang ba tseba, 'me ba sa kang ba bona khalemelo ea Morena Molimo oa lōna, le boholo ba hae, le letsoho la hae le matla, le otlolohileng; 3ba sa kang ba bona lipotšo tsohle, le liketso tsa hae, tseo a li entseng naheng ea Egepeta, ho Faro, khosi ea Egepeta, le naheng eohle ea hae; 4le seo a se entseng ho bahlabani ba Egepeta, le ho lipere tsa bona, le likariki tsa bona tsa ntoa, kamoo a entseng hore metsi a Leoatle la Lehlaka a li pupetse, ha ba ne ba ba phalalisa. Morena o ile a ba timetsa ho fihlela kajeno. 5Tsebang seo a le etselitseng sona, ha le le lehoatateng, ho fihlela le fihla sebakeng sena; 6le seo a se entseng ho Datane, le ho Abirame, bara ba Eliabe, mora oa Rubene, kamoo lefatše le ileng la ahlama kateng, 'me la ba metsa hammoho le tsohle tsa bona, le litente tsa bona, le tsohle tse phelang, tseo ba neng ba tsamaea le tsona, sechabeng sa Iseraele. 7Empa le bone mesebetsi eohle e meholo ea Morena, eo a e entseng.”
Mahlohonolo a naha eo ba e tšepisitsoeng
8“Ka baka lena, le bōlōke melao eohle eo ke le laelang eona kajeno, e le hore le tle le matlafale, le kene, le hape naha eo le tla e rua, hore e be ea lōna; 9le tle le phele halelele naheng eo Morena a hlapanyelitseng bo-ntat'a lōna hore o tla ba nea eona le litlōhōlō tsa bona, e leng naha e phallang lebese le mahe a linotši.
10“Naha eo le kenang ho eona, hore e be ea lōna, ha e tšoane le naha ea Egepeta, moo le tsoang teng, moo le neng le jala peō ea lōna teng, le e noesetsa, joalokaha le noesetsa serapa sa meroho. 11Empa naha eo le tšelelang ho eona hore e be ea lōna, ke naha ea maralla, le likhohlo, e noesetsoang ke lipula tse tsoeng leholimong. 12Ke naha eo Morena Molimo oa lōna, a e baballang. Kamehla Morena Molimo oa lōna, o e beile leihlo ho tloha ha selemo se thoasa, ho fihlela ha se fela.
13“Ha le mamela ka hloko melao ea ka, eo ke le laelang eona kajeno, le rata Morena Molimo oa lōna, le mo sebeletsa ka lipelo tsa lōna tsohle, le ka moea oa lōna oohle; 14ke tla nesetsa naha ea lōna pula ka nako ea eona, e leng lipula tsa selemo, le lipula tsa hoetla, hore le tle le kotule koro ea lōna, le veine ea lōna e ncha, le ole ea lōna. 15Ke tla melisetsa likhomo tsa lōna joang naheng ea lōna, 'me le tla ja, le khōre. 16Itlhokomeleng, esere lipelo tsa lōna tsa thetseha, la kheloha, la sebeletsa melimo e meng, 'me la e khumamela. 17Khalefo ea Morena e tla le tlokomela, a thibe maholimo hore ho se ne pula, naha e hloke kotulo, lōna le shoe kapele naheng e ntle, eo Morena a le neang eona.
18“Ka baka lena, le bōlōke mantsoe ana a ka ka lipelong tsa lōna, le ka meeeng ea lōna, le a tlamelle matsohong a lōna e le pontšo, a be joaloka sekōla liphatleng tsa lōna. 19Le tla a ruta bana ba lōna, le bue ka 'ona ha le lutse ka matlung a lōna, leha le tsamaea tseleng, leha le paqame, leha le tsoha. 20Le a ngole likoseneng tsa mamati a lōna, le holim'a likhoro tsa metse ea lona, 21e le hore ha feela leholimo le lefatše li sa ntse li le teng, lōna, le bana ba lōna le tle le phele halelele, naheng eo Morena a e hlapanyelitseng bo-ntat'a lōna hore o tla ba nea eona.
22“Ha le ka la bōlōka ka hloko melao ena eohle, eo ke le laelang eona, la e phetha, la rata Morena Molimo oa lōna, la tsamaea litseleng tsohle tsa hae, 'me la mo khomarela; 23Morena o tla leleka lichaba tsena tsohle kapele ho lōna, le falatse lichaba tse kholo ho le feta, tse matla ho le feta. 24Sebaka se seng le se seng seo le tla tsamaea ho sona, e tla ba sa lōna. Meeli ea lōna e tla tloha lehoatateng, le Lebanone, le ho tloha Nōkeng, e leng nōka ea Euferatese, ho ea fihla leoatleng le ka bophirimela. 25Ha ho motho ea tla tseba ho ema kapele ho lōna. Hohle moo le tla tsamaea teng, Morena Molimo oa lōna, o tla etsa hore ba le tšabe, ba phakhasele joalokaha a le tšepisitse.
26“Bonang, kajeno ke bea kapele ho lōna thōhako le tlhohonolofatso. 27E tla ba tlhohonolofatso haeba le mamela melao ea Morena Molimo oa lōna, eo ke le laelang eona kajeno; 28e be thōhako haeba le sa mamele melao ea Morena Molimo oa lōna, eo ke le laelang eona kajeno, 'me le latela melimo e meng, eo le sa kang la e tseba. 29Ha Morena Molimo oa lōna, a le fihlisa naheng eo le kenang ho eona ho e hapa, le tle le hlohonolofatse thaba ea Gerisime, 'me le rōhake thaba ea Ebale. 30Lithaba tsena li kamose oane ho Jorodane, tseleng e ka bophirimela, naheng ea Bakanana ba ahileng phuleng, malebana le Gilegale, pel'a lieike tsa More. 31Le lokela ho tšela nōka ea Jorodane ha le kena ho ea hapa naha eo Morena Molimo oa lōna, a le neang eona. E tla ba ea lōna, le ahe ho eona. 32Le hlokomele ho phetha melao eohle, le litaelo tsohle tseo ke li beang kapele ho lōna kajeno.”
