BAKOLOSE 4

₁Lōna beng ba makhoba, tšoarang makhoba a lōna hantle, le ka toka. Tsebang hore le lōna le na le Morena leholimong.

₂Tiisetsang thapelong ka phalimeho le ka teboho. ₃Le rōna le re rapelle, hore Molimo a tle a re fumantše monyetla oa ho phatlalatsa lentsoe la hae, re bolele sephiri sa Kreste, seo ke leng litlamong ka baka la sona. ₄Nthapelleng hore ke se senole, joalokaha ke tlamehile ho bua. ₅E-bang seli ho ba kantle, le sebelise monyetla oo le o fumanang. ₆Kamehla lipolelo tsa lōna e be tse mosa, tse nokiloeng ka letsoai, 'me le ithute ho araba motho ka mong hantle.

₇Tikikose, ngoan'abo rōna ea ratehang, mosebeletsi ea tšepahalang oa Morena le molekane oa rōna oa bohlanka, o tla le tsebisa tsohle tsa ka. ₈Ke ka lona lebaka lena ke mo rōmelang ho lōna, hore le tle le tsebe tsa rōna, 'me a khothatse lipelo tsa lōna. ₉O tsamaea le Onesimose, ngoan'abo rōna ea tšepahalang, ea ratehang, eo e leng mohahabo lōna. Ba tla le tsebisa tsohle tsa koano.

₁₀Le lumelisoa ke Arisetarekose eo re leng litlamong le eena, le Mareka motsoal'a Baranabase, eo le seng le fumane litaelo tse amanang le eena. Mo amoheleng, haeba a ka tla ho lōna. ₁₁Hape le lumelisoa ke Jesu ea bitsoang Jusetose. Bao ke bona feela ho Bajuda ba sebelelitseng 'Muso oa Molimo hammoho le 'na, ba ntšelisitseng haholo. ₁₂Le lumelisoa ke Epafarase, mohahabo lōna, mohlanka oa Kreste Jesu. Kamehla o le rapella ka matla, hore le eme le tiile, le phethehile, le amohetse ka ho tlala thato eohle ea Molimo. ₁₃Ke paka hore o sebelitse ka thata ka baka la lōna, le la ba Laodisea, le la ba Hirapolese. ₁₄Luka, ngaka e ratehang, le Demase, baa le lumelisa. ₁₅Lumelisang balumeli ba Laodisea, le Numefa, le kereke e phuthehelang tlung ea hae.

₁₆Ha le se le balile lengolo lena, le le fetisetse ho ba kereke e Laodisea ba le bale; le lōna le bale le tsoang Laodisea.

₁₇Le be le re ho Arekipose: “Hlokomela ho phetha mosebetsi oa Morena, oo u o abetsoeng.”

₁₈Tumeliso ena e ngotsoe ke 'na Paulosi, ka letsoho la ka. Se lebaleng hore ke litlamong. Mohau o ke o be le lōna.