1Erekaha le tsositsoe bafung le Kreste, batlang lintho tse holimo, moo Kreste a lutseng ka letsohong le letona la Molimo. 2Thahasellang lintho tse holimo, e seng tse lefatšeng, 3hobane le shoele, 'me bophelo ba lōna bo patehile le Kreste ho Molimo. 4Mohla Kreste eo e leng bophelo ba lōna a bonahatsoang, le lōna le tla bonahatsoa le eena ka tlōtla.
5Ha ho le joalo, bolaeang litakatso tsa lōna tsa lefatše, e leng bohlola, tse litšila, litakatso tse mpe, tsa bokhopo, le meharo, hobane meharo ke ho sebeletsa molimo oa bohata. 6Ka baka la tse joalo bohale ba Molimo bo tlela ba sa mo mameleng. 7Pele le lōna le ne le phela ho ea ka litakatso tse joalo, 8empa kajeno lahlang tsena tsohle: bohale, le khalefo, le lōnya. Bonyefoli le lipolelo tse hlabisang lihlong li se tsoe melomong ea lōna. 9Le se ke la bolellana mashano, hobane le hlobotse botho ba lōna ba khale le mesebetsi ea bona. 10Le apere botho bo bocha bo nehafatsoang hore bo tšoane le 'Mōpi, le tle le be le tsebo ea 'nete. 11Kahoo ha ho sa le molichaba kapa Mojuda, ea bōlōtseng kapa ea sa bōllang, ea hlaha, ea tala, lekhoba le molokolohi, empa ho na le Kreste feela; ke eena tsohle, 'me o ho bohle.
12Kaha le le bakhethoa ba Molimo, ba halalelitsoeng, ba ratoang ke eena, e-bang le kutloelo-bohlōkō, le mosa, le boikokobetso, le bonolo, le boiphapanyo. 13Ha e mong a lla ka e mong le mamellane, 'me le tšoarelane joalokaha le Morena a le tšoaretse. 14Holim'a tsena tsohle, e-bang le lerato, e leng lona le tlamahanyang tsohle hore li phethehe.
15Khotso ea Kreste e ke e buse lipelo tsa lōna. Ke ka khotso ena Molimo a le bitselitseng ho ba 'mele o le mong. Lebohang ke hona. 16Lentsoe la Kreste le ahe ka ho lōna ka menono eohle ea lona. Rutanang, 'me le eletsane ka bohlale bohle. Ka lipelo tse tletseng teboho, binelang Molimo lipesalema, lifela le lipina tse halalelang. 17Eng kapa eng eo le e etsang kapa le e bolelang, le e etse lebitsong la Morena Jesu, 'me ka eena le lebohe Molimo Ntat'a lōna.
Bophelo bo bocha le ho phelisana ha batho
18Lōna basali, ikokobeletseng banna ba lōna joalokaha e le tšoanelo, ka baka la Morena.
19Lōna banna, ratang basali ba lōna, 'me le se ke la ba hlonamela.
20Lōna bana, mamelang batsoali ba lōna linthong tsohle, hobane hona ho khahlisa Morena.
21Lōna batsoali, le se ke la khentša bana ba lōna, esere ba nyahama lipelo.
22Lōna makhoba, mamelang beng ba lōna ba lefatše linthong tsohle. Hona le se ke la ho etsa feela ha ba le teng, joaloka ba ratang ho khahlisa batho, le mpe le ho etse ka botšepehi, ka ho tšaba Morena. 23Sohle seo le se etsang, le se etse ka lipelo tsohle tsa lōna, joaloka hoja le se etsetsa Morena, e seng batho. 24Tsebang hore Morena o tla le putsa ka ho le etsa majalefa a hae. Morena eo le mo sebeletsang ke Kreste. 25Ha e le ea etsang ho sa lokang, o tla amohela moputso oa ho se loke, kaha Molimo ha a ee ka tšobotsi.
