BARUKE 4

₁Ke Buka ea melao ea Molimo,

le Molao o hlolang ka bosafeleng.

Bohle ba itšoarellang ka bona

ba tla phela,

athe ba bo furallang ba tla shoa.

₂Boea sekoele, uena Jakobo,

bo kakatlele,

tsamaea leseling la bona,

u tobile khanyeng ea bona.

₃Se leselle e mong tlotla ea hao,

se leselle sechaba sesele

menono ea hao.

₄Re lehlohonolo, rona bana ba Iseraele,

hobane tse khahlang Molimo

re li senoletsoe!

₅Khothalang, lona sechaba sa ka,

lona khopotso ea Iseraele!

₆Le rekisitsoe ho balichaba,

empa e seng hore le timetsoe.

Le phephelitse khalefo ea Molimo,

ka hona le neetsoe matsohong a lira.

₇Le qhololitse 'Mopi oa lona

ka ho nyehela bademona mahlabelo,

ho fapana le Molimo.

₈Le lebetse Molimo oa bosafeleng

ea le fepileng,

le soabisitse Jerusalema

ea le holisitseng,

₉eo eitseng ha a bona khalefo

ea Molimo e le oela holimo, a re:

“Mamelang, lona baahisani le Sione,

Molimo o nkimelitse

ka masisa-pelo a maholo,

₁₀Ke bone bara le barali ba ka

ba khanneloa kholehong,

eo Oa bosafeleng a ba pitlileng

ka eona.

₁₁Ke ba holisitse ka thabo;

empa ka meokho le masisa-pelo

ka ba lebella ha ba tsamaea.

₁₂Ho se be motho ea ntlepang litšeho,

'na mohlolohali ea furaletsoeng

ke ba bangata.

Ke jeoa ke bolutu ka baka la libe

tsa bana ba ka,

ba ileng ba tlola Molao oa Molimo;

₁₃ba latola taelo tsa hae,

ba hana le ho tsamaea

ka tsela tsa melao ea hae

le ho kena tselaneng tsa kholiso

tsa toka ea hae.

₁₄“Ba ke ba tle koano,

baahisani le Sione!

Ba ke ba ikhopotse kholeho

ea bara le barali ba ka,

eo Oa bosafeleng a ba pitlileng ka

eona.

₁₅O ba neeletse sechaba se tsoang hole,

sechaba se hlaha, sa puo esele,

se sa hlompheng leqheku,

se sa hauheleng ngoana;

₁₆se hapile bara, baratuoa

ba mohlolohali,

sa mo siea a inotši, a se na barali.

₁₇'Me 'na, nka le hlaha thusong joang?

₁₈Ea le lihetseng litlokotsi tsena,

ke eena ea tla le ephola

liatleng tsa lira tsa lona.

₁₉Tsamaeang, bana ba ka,

itsamaeleng ka tsela ea lona;

hobane 'na ke setse ke inotši.

₂₀Ke hlobotse seaparo sa khotso,

ke apere tse mahoashe tsa ho kopa;

ke tla hoeletsa ho Oa bosafeleng

bophelo ba ka bohle.

₂₁“Khothalang, bana ba ka,

le hoeletse ho Molimo;

o tla le ephola hlorisong

le liatleng tsa lira.

₂₂Ke tšepile hore pholoho ea lona

e tla tsoa ho Oa bosafeleng,

ke tletsoe ke thabo e tsoang

ho Ea halalelang

ka baka la mohau oo le tla o etsetsoa

kapele-pele

ke Oa bosafeleng, Mopholosi oa lona.

₂₃Ka masisa-pelo le meokho

ka le lebella ha le tsamaea,

empa Molimo o tla le khutlisetsa

ho 'na ka thabo le nyakallo e sa feleng.

₂₄Joalokaha baahisani le Sione

ba bone kholeho ea lona,

ka mokhoa o tšoanang

kapele-pele ba tla bona

pholoho ea lona e tsoang ho Molimo,

ea tla le etela ka tlotla e kholo

le ka khanya ea Oa bosafeleng.

₂₅Bana ba ka, mamellang khalefo

ea Molimo e le oetseng holimo.

Sera se u hlorisitse;

empa kapele-pele u tla bona

timetso ea sona,

'me u tla se hata molala.

₂₆Bana ba ka ba bokolitsoeng

ba tsamaile ka litsela tsa makukuno,

ba sheshennoe joaloka mohlape

o hapiloeng ke lira.

₂₇“Khothalang, bana ba ka,

le hoeletse ho Molimo;

ea le pitlileng tjena o tla le hopola.

₂₈Joalokaha e bile morero oa lona

ho balehela thoko le Molimo,

etlare ha le khutla,

le 'matle ka thahasello

e fetang ea pele haleshome;

₂₉hobane ea le lihetseng litlokotsi tsena

o tla le sitsa ka thabo e sa feleng

ka ho le pholosa.”

₃₀Khothala, uena Jerusalema:

ea u reileng lebitso lena o tla u tšelisa.

₃₁Ho malimabe ba u entseng hampe

'me ba thabetseng ho oa ha hao!

₃₂Ho malimabe metse eo bana ba hao

ba entsoeng makhoba ho eona,

ho malimabe motse o hapileng

bana ba hao!

₃₃Joalokaha motse ona o ile oa thabela

ho oa ha hao

'me oa nyakallela ho ripitloa ha hao,

ka mokhoa o tšoanang o tla soaba

mohla o fetoloang lesupi.

₃₄Ke tla o amoha boithoriso

bo bakoang ke bongata

ba baahi ba oona,

boikhohomoso ba oona bo tla fetoha

masisa-pelo.

₃₅Ka matsatsi a mangata

mollo o tsoang ho Oa bosafeleng

o tla theohela holim'a oona;

bademona ba tla aha ho oona

ka mengoaha.

₃₆Talima nq'a Bochabela,

uena Jerusalema,

u bone thabo e u tlelang

e e-tsoa ho Molimo.

₃₇Bara ba hao, bao u ba lebeletseng

ha ba tsamaea, ke bao ba e-tla;

ba khutla ba khobokana

ba e-tsoa Bochabela le Bophirima,

ka taelo ea Ea halalelang,

ba ithabela tlotleng ea Molimo.