1“Oho Morena ea matla 'ohle, Molimo oa Iseraele, ke pelo e litlallong le moea o tepeletseng tse hoeletsang ho uena: 2Ak'u re mamele, oho Morena, 'me u re hauhele, hobane re entse libe pontšeng ea hao. 3Uena u lutse teroneng ea hao ka bosafeleng, athe rona re ntse re timela ho ea ho ile. 4Morena ea matla 'ohle, Molimo oa Iseraele, u tle u mpe u utloe thapelo ea ba timelang ba Iseraele, bana ba ba entseng libe pontšeng ea hao, ba sa kang ba mamela lentsoe la Morena Molimo oa bona: ka hona litlokotsi li re khomaretse. 5Ak'u lebale makhopo a bo-ntat'a rona; empa nakong ea joale, u se lebale matla a letsoho la hao le Lebitso la hao, 6hobane u Morena Molimo oa rona, 'me re tla u rorisa, uena Morena. 7Etsoe u kentse tšabo ea hao lipelong tsa rona, re tle re rapele Lebitso la hao. Re tla u rorisa kholehong, hobane re qheletse thoko le lipelo tsa rona bokhopo bohle ba bo-ntat'a rona, ba ileng ba etsa libe pontšeng ea hao. 8Le kajeno re ntse re le kholehong, moo u re qhalantseng teng ho ba sekhobo le thohako, re jere kotlo ea makhopo 'ohle a bo-ntat'a rona, ba ileng ba furalla Morena Molimo oa bona.”
Lithoko tsa Bohlale
9Mamela melao ea bophelo,
uena Iseraele,
sekeha tsebe, u ithute maele!
10Ho tla ka'ng, Iseraele,
hore u be fatšeng la lira,
u tsofalle naheng ea basele,
11u be sesila ke bafu,
'me u baloe le ba Qalong ea bafu?
12Ke hobane u furaletse
seliba sa Bohlale!
13Hoja u tsamaea tseleng ea Molimo,
u ka be u lutse khotsong ea kamehla.
14Ithute moo maele a leng teng,
moo matla a leng teng,
moo kutloisiso e leng teng,
u tle u tsebe le teng
moo litšiu tse telele
le bophelo li leng teng,
le moo mahlo a khanyang thabo
le khotso teng.
15Ke mang ea kileng a fumana
moo Bohlale bo ahileng teng,
ke mang ea kileng a sibolla
matlotlo a bona?
16A kae mahosana a lichaba,
ba kae ba busang le libatana tsa lefatše,
17ba bapalisang linonyana tsa leholimo,
ba bokellang silefera le khauta,
tseo batho ba beileng tšepo ea bona
ho tsona,
bao leruo la bona le se nang moeli,
18ba sebetsang silefera ka makhethe,
bao mesebetsi ea bona
e ke keng ea lekanngoa?
19Ba nyametse,
ba theohetse Qalong ea bafu.
Ba bang ba nkile libaka tsa bona,
20ba bacha ba bone letsatsi
'me ba phela lefatšeng,
empa tsela ea tsebo ba se ke ba e tseba,
21leha e le hona ho utloisisa
tselana tsa eona.
Le bara ba bona ha baa ka ba e fihlela,
ba hlahlathela thoko le tsela ea eona.
22Ha ho ea kileng a utloa
ka Bohlale Kanana,
leha e le ho bo bona Themane.
23Bara ba Agare ba fuputsang
mahlale a lefatše,
bahoebi ba Merane le ba Themane,
bo-ralipale le bafuputsi ba mahlale,
ha baa ka ba tseba tsela ea Bohlale,
leha e le hona ho fumana
tselana tsa bona.
24Iseraele, e kholo hakaakang
ntlo ea Molimo,
se batsi hakaakang sebaka
se taolong ea hae!
25Se seholo, ha se na moeli,
se phahame, se ke ke sa lekanngoa,
26Ho sona ho hlahile liqhobane,
tse neng li tumme
mehleng ea boholo-holo,
tse emeng ka litlhako,
bahlabani ba sebele.
27Empa Molimo ha aa ka a li khetha,
ha aa ka a li abela tsela ea tsebo.
28Tsa timela ke ho hloka maele,
tsa timela ka baka la booatla ba tsona.
29Ke mang ea kileng a nyolohela
leholimong ho ea lata Bohlale,
a theoha le bona marung?
30Ke mang ea kileng a tšela leoatle
ho bo fumana,
a khutla a bo rekile
ka khauta e ntle-ntle?
31Ha ho ea ka tsebang tsela ea bona,
ha ho ea ka elelloang tselana tsa bona.
32Empa Ea tsebang tsohle
oa bo tseba,
o bo hlalohanya ka kutloisiso ea hae,
eena ea hlotseng lefatše
ho ba teng kamehla,
a le tlatsa liphoofolo tse maoto-mane,
33a romele leseli, le ee,
a le bitse, le mamele ka thothomelo.
34Linaleli li khanya ka nako tsa tsona,
li nyakaletse;
35oa li bitsa,
'me li re: Ke rona bana!
li khanyetsa Moetsi oa tsona
ka nyakallo.
36Ke eena Molimo oa rona,
ha ho e mong ea ka bapisoang le eena.
37O hlalohanya litsela tsohle tsa tsebo,
o fane ka eona ho Jakobo,
mohlanka oa hae,
ho Iseraele, moratuoa oa hae.
38Ka hona Bohlale
ba bonahala lefatšeng,
'me ba phela har'a batho:
