Amose o bontšoa serōtō se tletseng litholoana
1Hape Morena Molimo a mpontša sena: E ne e le serōtō se tšetseng litholoana tse butsoitseng. 2A mpotsa, a re: “Amose, u bona'ng?”
Ka mo araba, ka re: “Ke bona serōtō se tšetseng litholoana tse butsoitseng.”
Eaba Morena o re ho 'na: “Nako ea ho fela ha sechaba sa ka sa Iseraele e fihlile, 'me ha nka ke ka hlola ke se hauhela. 3Mohlang oo,” ho rialo Morena Molimo, “lipina tse binoang ka tlung ea bokhosi li tla fetoha liboko. Litōpō tse ngata-ngata li tla rapalla kahohle, ho khutsitse tuu!”
Ho timetsoa ha Baiseraele
4Lōna ba hatakelang bahloki,
utloang mona!
Lōna ba timetsang mafutsana,
mafutsana a naha ena.
5Le ntse le re:
“Khoeli e ncha
e tla ea neneng fifing,
re tsoe re rekisa mabele a rōna?
Tsatsi la Sabatha le tla feta neneng,
re tsoe re bapatsa ka koro ea rōna?
Re ntse re fokotsa tekanyo
re nyolla thèko,
re qhekella bareki
ka likala tsa rōna tse sa nepahalang?
6Re reka mafutsana ka silefera,
re ananya mohloki ka meqathatso,
re rekisa koro le litlhōka tsa eona?”
7Morena, eena eo Jakobo a ithorisang ka eena, o ikanne, a re: “Ha nka ke ka lebala le e 'ngoe ea liketso tsa bona.
8“Na naha eohle
ha e na ho thōthōmela,
le bohle ba ahileng ho eona
ba bokolle?
Naha eohle e tla kōkōmōha,
e kōkōmōhe joaloka Nile,
e b'e 'ne e hlōkōlèhè,
e nt'o bohlela
joaloka nōka ea Egepeta.
9“Mohlang oo,”
ho rialo Morena Molimo,
“ke tla liketsa letsatsi
har'a mp'a motšeare,
fifi le koahele lefatše
motšeare o moholo.
10Mekete ea lōna e khethehileng
ke tla e fetola,
ke e fetole, ke e etse ea bofifi,
le lipina tsa lōna tsohle
e be koli-ea-malla.
Bohle ke tla ba apesa,
ke ba apese tse mahoashe,
ke ba kute, ke ba beole lekorana.
Nako eo e tla ka ea ho lla,
ho llela mora ea inotši,
qetello ea eona
e ke tsatsi la mahlomola.
11“Matsatsi aa tla,”
ho rialo Morena Molimo,
“ao ka 'ona ke tla lihela
naha ena sekoboto,
e seng sekoboto
sa ho hloka lijo feela,
leha e le lenyora
la ho nyoreloa metsi;
e tla ba sa ho hlōlōheloa
lentsoe la Morena,
empa lentsoe leo
ha ba ka ke ba le utloa.
12Batho ba tla lelera
le maoatle 'ohle,
ba phaqōle
ho tloha lebōea ho ea bochabela,
ba ntse ba batla lentsoe la Morena,
empa ha ba ka ke ba le fumana.
13“Mohl'a tsatsi leo,
pabala tsa baroetsana
le tsa bahlankana,
li tla akheha, li akhehisoe ke lenyora.
14Ba hlapanyang
ka melingoana ea Samaria,
kapa ba reng:
‘Ka molimo oa hao, ea phelang,
uena Dane,’
kapa ba reng:
‘Ka molimo ea phelang,
molimo oa Beeresheba,’
ba tla oa, ba sa tl'o hlola ba tsoha.”
