Ho timetsoa ha Baiseraele
1Lōna ba iketlileng le le Sione le malimabe,
le lōna ba tšabetseng
thabeng tsa Samaria;
lōna baetapele
ba chaba se kapele ho tse ling,
bao ntlo ea Iseraele
e phallelang ho bona!
2E-eang motseng oa Kalene
le e'o bona;
le tlohe moo,
le fetele Hamate e kholo,
le nt'o theohela motseng
oa Bafilesita oa Gate!
Na mebuso eo le e feta ka letho?
Na naha ea eona e kholo
ho feta ea lōna?
3Ha le lumele
hore tsatsi la koluoa le haufi,
empa ketso tsa lōna lia le atametsa,
li atametsa puso e sehlōhō!
4Le paqama
mealong e khabisitsoeng,
e khabisitsoeng ka manaka a tlou;
le kakalla tulong tsa lōna,
tulong tse butša-butša,
le ja nama ea likonyana e bonojoana,
le je le ea manamane a nontšitsoeng.
5Le letsa harepa tsa lōna
joaloka Davida,
pina tsa liletsa le li qapele seemeng.
6Veine ea lōna
le e noa ka mopotjoana,
le itlotse ka litlolo tsa bohlokoa,
empa ha le llele
ho timetsoa ha Josefa.
7Kahoo ke lōna ba pele
ba tla thōpuoa,
mekete ea lōna ea lijo e tla fela.
Morena o nyonya boikakaso ba Baiseraele
8Morena Molimo o se a ikanne, Morena Molimo oa mabōtho, o re:
“Ke nyonya boikakaso ba Jakobo,
ke hloile matlo a bokoele a hae;
ke tla neelana ka motse ona,
ke neelane ka tsohle tse ho oona.”
9Haeba ho ka sala banna ba leshome ka tlung e le 'ngoe, le bona ba tla shoa. 10Leha e mong oa bona, ea tšoanelang ho chesa litōpō, a ka tla li ntša ka tlung, 'me a botsa eo ebang o ntse a ipatile motšeo, a re: “Na ho sa na le e mong kantle ho uena?” Eo a araba, a re: “Che!” Ke moo eo a tla re: “Thōla! Ha rea tšoanela ho bitsa lebitso la Morena.”
11Morena ke eena ea laelang:
Ntlo e kholo o tla e pshatlaka,
e nyenyane le eona a e thuake.
12Na lipere li ka matha mafikeng?
Na pholo li ka lema leoatleng?
Empa lōna toka le e fetotse chefo,
tholoana ea ho loka
la e fetola leshokhoa.
13Lōna ba thabelang Lo-Dabare,
lōna le re:
“Na ha rea ikhapela Karanaime,
ra ikhapela eona ka matla a rōna?”
14Morena Molimo oa mabōtho o re:
“Lōna Baiseraele,
ke tla le phepheletsa sechaba,
se le hatelle
ho tloha Khalong la Hamate,
se le hatelle
ho ea fihla Khohlong ea Araba.”
