1Saule o ne a lumellana le polao ea Setefane.
Saule o hlorisa kereke
Ka tsatsi lona leo tlhoriso e kholo ea hlahela kereke e Jerusalema, 'me bohle, haese baapostola feela, ba qhalanela linaheng tsa Judea le Samaria. 2Banna ba tšabang Molimo ba epela setōpō sa Setefane, 'me ba mo llela haholo. 3Empa Saule eena a ripitla kereke, a kena ka tlung e 'ngoe le e 'ngoe, a hulanya banna le basali, a ba hlahlela chankaneng.
Molaetsa o molemo o boleloa Samaria
4Ha e le ba qhalantsoeng, ba ea kahohle ba ntse ba bolela molaetsa o molemo oa lentsoe la Molimo. 5Filipi a theohela motseng oa Samaria, a phatlalletsa batho ba teng tsa Kreste. 6Ka moea o le mong matšoele a èla hloko tse neng li boleloa ke Filipi; a mo mamela, 'me a bona mehlolo eo a e etsang. 7Ba bangata ba ne ba e-na le meea e litšila; ea tsoa ho bona e bokolla haholo. Le ba bangata ba ba shoeleng litho le ba liritsa ba folisoa. 8Thabo e kholo ea e-ba teng motseng oo.
9Monna e mong ea bitsoang Simone, ea neng a se a ntse a le motseng oo e le senohe, a makatsa batho ba Samaria, a ipolela hore eena ke mang-mang. 10Bohle ba ne ba mo mamela ka hloko, ho tloha ho e monyenyane ho isa ho e moholo, ba re: “Enoa ke Matla a Molimo a bitsoang a maholo.” 11Ba ne ba mo mamela ka hloko kahobane e ne e se e le khale a ba makatsa ka bonohe ba hae. 12Empa ha Filipi a se a ba boleletse molaetsa o molemo oa tsa 'Muso oa Molimo le tsa lebitso la Jesu Kreste, ba lumela, 'me ha kolobetsoa banna le basali. 13Simone le eena a lumela. Hoba a kolobetsoe, a khomarela Filipi, a bona mehlolo le liketso tse kholo, tse matla, tse etsahalang, 'me a hlolloa.
14Eare ha baapostola ba leng Jerusalema ba utloa hore Samaria e amohetse lentsoe la Molimo, ba rōma Petrose le Johanne teng. 15Bona ha ba fihla, ba rapella Basamaria hore ba amohele Moea o Halalelang, 16hobane o ne o e-s'o ka o theohela le ho ea mong oa bona, ba mpa ba kolobelitsoe feela ka lebitso la Morena Jesu. 17Eaba Petrose le Johanne ba ba bea matsoho, 'me ba amohela Moea o Halalelang.
18Ha Simone a bona hore Moea o Halalelang o neoa ka pèo ea matsoho a baapostola, a ba tlisetsa chelete, 19a re: “Le 'na mpheng matla ana, hore mang le mang eo ke 'meang matsoho a tle a amohele Moea o Halalelang.”
20Empa Petrose a re ho eena: “Tsam'o shoela koana le chelete ea hao! U lekanya hore mpho ea Molimo e rekoa ka chelete! 21Ha u na kabelo leha e le seabo tabeng ena, hobane pelo ea hao ha ea loka mahlong a Molimo. 22Ka baka leo, bakela bokhopo bona ba hao, 'me u rapele Morena hore mohlomong u tle u tšoareloe mohōpōlo oa pelo ea hao; 23etsoe ke bona hore u na le takatso e mpe, 'me u litlamong tsa bokhopo.”
24Simone a araba, a re: “Lōna a le ke le nthapelle ho Morena, hore ke se ke ka hlaheloa ke letho la tseo le li boletseng.”
25Hoba ba pake, 'me ba bolele lentsoe la Morena, ba khutlela Jerusalema, ba ntse ba phatlalatsa molaetsa o molemo metseng e mengata ea Basamaria.
Filipi le lehaole la Mokushe
26Lengeloi la Morena la bua ho Filipi, la re: “Tsamaea u ee nq'a boroa, tseleng e theohang Jerusalema e eang Gasa, e bolutu.” 27A ema, a tsamaea. Ho ne ho e-na le monna oa Mokushe oa lehaole, e le letona la Kandake, mofumahali oa Bakushe, le molisa oa matlotlo a hae 'ohle. O ne a tlile Jerusalema ho tla khumamela Molimo. 28Joale o ne a boela hae, a palame kariki ea hae, a bala bukeng ea moporofeta Esaea. 29Eaba Moea o Halalelang o re ho Filipi: “E-ea, u tsamaee le kariki eno.”
30Filipi a mathela ho eona, a mo utloa a bala bukeng ea moporofeta Esaea. A re ho eena: “Na u utloisisa seo u se balang?”
31Eena a re: “Nka utloisisa joang ho se motho ea ntlhalosetsang?” Eaba o kōpa Filipi hore a hloe, 'me a lule le eena.
32Temana ea Mangolo eo a neng a e bala e ne e le ena:
“O il'a isoa moo a il'o hlabeloa teng,
'me joaloka konyana e khutsitseng
e khutsitseng pel'a mokuti oa eona,
le eena ha ho letho leo a il'a le bua.
33A kokobetsoa, a hlokeloa toka.
Ke mang ea tla bolela lelōko la hae,
ha e le moo bophelo ba hae
bo felisitsoe lefatšeng?”
34Eaba lehaole le re ho Filipi: “Kea u botsa hle, moporofeta o bolela see ka mang? Na o bua ka eena, kapa ka e mong osele?” 35Joale Filipi a bua, a qala ka temana ena, a 'molella molaetsa o molemo oa Jesu.
36Ha ba ntse ba tsamaea tseleng, ba fihla moo metsi a leng teng, 'me lehaole la re: “Metsi ke ana! Nka thibeloa ke'ng hore ke kolobetsoe?”
37Filipi a re: “Haeba u lumela ka pelo ea hao eohle, hoo ho ka etsoa.”
La araba, la re: “Kea lumela hore Jesu Kreste ke Mora oa Molimo.” 38La laela hore kariki e emisoe. Filipi le lehaole ba theohela metsing hammoho, 'me Filipi a le kolobetsa. 39Hoba ba nyolohe metsing Moea oa Morena oa nka Filipi, 'me lehaole ha lea ka la hlola le 'mona; la tsoela pele leetong la lona le nyakaletse. 40Empa Filipi a iphumana a se a le Ashedode, a ntse a bolela molaetsa o molemo metseng eohle eo a fetang ho eona, ho fihlela a kena Sesaria.
