Petrose o behéla kereke e Jerusalema
1Baapostola le balumeli ba neng ba le Judea ba utloa hore le balichaba ba amohetse lentsoe la Molimo. 2Eare ha Petrose a nyolohetse Jerusalema, ba bōlōtseng, e leng Bajuda, ba mo tsekisa, 3ba re: “U kene ha banna ba maqai, ua ja le bona!”
4Petrose a qala ho ba qaqisetsa tsohle ka ho hlahlamana, a re: 5“Ke ne ke rapela ke le motseng oa Jopo, 'me ka bona pono. Ha theoha ntho e 'ngoe e kang lesela le leholo le tsoang leholimong, le lepeletsoang, le tšoeroe ka liqola tse 'ne, 'me ea tla ho 'na. 6Ha ke talimisisa ka ho eona, ka bona liphoofolo tsa lefatše tse maoto-mane, le libatana, le lihahabi, le linonyana tse fofang. 7Ka utloa le lentsoe le re ho 'na: ‘Petrose, ema, u hlabe, u je!’
8“Eaba ke re: ‘Che, le khale, Morena! Hobane ka hanong la ka ha ho e-s'o ka ho kena letho le ilehang, kapa le sa hloekang.’
9“Lentsoe le tsoang leholimong la bua khetlo la bobeli, la re: ‘Tseo Molimo a li hloekisitseng, u se ke ua re lia ileha.’ 10Hona ha etsahala ka makhetlo a mararo, eaba tsohle li nkeloa hape leholimong.
11“Bonang, hang-hang ha fihla banna ba bararo tlung eo ke neng ke le ka ho eona, ba rōmiloeng ho 'na, ba e-tsoa Sesaria. 12Moea oa re ho 'na ke tsamaee le bona ke sa qea-qee ka letho. Le bana beso bana ba tšeletseng ba ea le 'na, 'me ra kena ka tlung ea monna eo. 13A re tsebisa kamoo a ileng a bona lengeloi le eme ka tlung ea hae kateng, le re: ‘Rōmela Jopo, u bitse Simone ea bitsoang Petrose. 14O tla u bolella mantsoe a tla u pholosa, uena le lelapa la hao lohle.’
15“Eare ke sa qala ho bua, Moea o Halalelang oa theohela holim'a bona, joaloka ho rōna, qalehong. 16Joale ka hopola polelo ea Morena, kamoo a itseng kateng: ‘Johanne o fela a kolobelitse ka metsi, empa lōna le tla kolobetsoa ka Moea o Halalelang.’ 17Ka baka leo, ha Molimo a ba neile mpho e lekanang le eo a e neileng rōna ba lumelang ho Morena Jesu Kreste, 'na ke ne ke le mang nka thibelang Molimo?”
18Eare ha ba utloa tsena, ba thōla. Joale ba tlotlisa Molimo, ba re: “Efela le balichaba Molimo o ba neile pako e isang bophelong.”
Kereke e Antiokia
19Balumeli ba neng ba qhalantsoe ke tlhoriso e bileng teng ho Setefane, ba fetela Fenisia, le Sipera, le Antiokia, ba sa bolelle motho lentsoe la Molimo, haese Bajuda feela. 20Empa ba bang ba bona e ne e le matsoalloa a Sipera le ba Sirene, bao eitseng ha ba fihla Antiokia ba bua le bahedene, ba ba ruta molaetsa o molemo oa Jesu Kreste. 21Letsoho la Morena le ne le e-na le bona, 'me palo e kholo ea ba lumelang ea sokolohela ho Morena.
22Joale taba ena ea fihla tsebeng tsa kereke, Jerusalema, 'me ba rōmela Baranabase, Antiokia. 23Ha a fihla, 'me a bona mohau oa Molimo, a thaba, a khothaletsa bohle hore ba khomarele Morena ka pelo tse tiileng, 24kahobane e ne e le monna ea molemo, ea tletseng Moea o Halalelang le tumelo. Eaba letšoelehali le sokolohela ho Morena.
25Joale Baranabase a ea Tarasuse ho ea batla Saule, 26'me hoba a mo fumane, a mo tlisa Antiokia. Ha fela selemo se tletseng ba ntse ba phutheha le kereke, ba ruta letšoelehali. Ke hona Antiokia moo barutuoa ba qalileng ho bitsoa Bakreste teng.
27Matsatsing ao baporofeta ba bang ba theoha Jerusalema, ba ea Antiokia. 28E mong oa bona ea bitsoang Agabuse, a ema, a lupa ka Moea o Halalelang hore ho se ho tla ba le tlala e kholo lefatšeng lohle; ea fela ea e-ba teng mehleng ea ha ho ne ho busa Tlelaudiose. 29Eaba barutuoa ba rera ho rōmela lithuso ho balumeli ba ahileng Judea, ho ea kamoo e mong le e mong oa bona a ka khonang kateng. 30Ba fela ba etsa joalo, ba li rōmela ho baholo ka Baranabase le Saule.
