1Pel'a Molimo le Kreste Jesu, eena ea tla ahlōla ba phelang le ba shoeleng, le ka baka la boiponahatso ba hae le ka 'Muso oa hae, ke ipiletsa ho uena, ke re: 2Phatlalatsa lentsoe, u pheelle ho le bolela, e-bang lea amoheloa kapa ha le amoheloe; nyatsa, khalemela, khothatsa, u ntse u ruta ka mamello eohle. 3Nako ea tla eo ka eona ba sa tl'ong ho mamella thuto ea 'nete, empa ho ea ka litakatso tsa bona ba tla ipōkellela baruti ba bangata, ba tlang ho ba bolella tse natefelang litsebe tsa bona. 4Ba tla ithiba litsebe hore ba se ke ba mamela 'nete, ba mamele litšōmo. 5Empa uena u itšoare linthong tsohle, u tiisetse matšoenyeho, u etse mosebetsi oa ho phatlalatsa molaetsa o mo, u phethe tšebetso ea hao hantle.
6Ha e le 'na ke se ke le lekhatheng la ho etsoa sehlabelo, 'me nako ea ho shoa ha ka e fihlile. 7Ke loanetse tsa Molimo senna, ke qetile thōta ea peiso, ke bōlōkile tumelo. 8Joale ke se ke beetsoe mofapahlooho oa ho loka, oo Morena, moahlōli ea lokileng, a tlang ho mputsa ka oona ka Letsatsi lela; e seng 'na feela, empa le bohle ba lebeletseng boiponahatso ba hae.
Litaelo tse neoang Timothea
9Potlakela ho tla ho 'na kapele, 10hobane Demase o ntahlile ka ho rata lefatše lena, 'me o iketse Thesalonika; Keresekese o ile Galatia; Tite o ile Dalamatia. 11Ke Luka feela ea setseng le 'na. Tloo le Mareka, hobane o nthusa haholo mosebetsing. 12Tikikose eena ke mo rōmile Efese. 13Ha u e-tla u ntlele le kobo eo ke e siileng Terōoase, ha Karapose; le libuka, haholo-holo tsa matlalo.
14Alekesandere, eo e leng lelala la lethose, o nkentse hampe haholo. Morena o tla mo nea moputso o lokelang liketso tsa hae. 15Le uena u itlhokomele, hobane o ile a hanyetsa lipolelo tsa rōna ka matla.
16Ha ke ne ke qala ho ikarabella khotla, ha ho ea kileng a nkemela, empa bohle ba ile ba ntšabella. E se eka ba ke ke ba ahlōleloa hoo. 17Empa Morena o ile a ba le 'na, a 'matlafatsa, hore ke tle ke phatlalatse molaetsa o molemo ka ho tlala, balichaba bohle ba tle ba o utloe. Ka lopolloa tleneng tsa tau. 18Morena o tla 'ne a ntopolle mesebetsing eohle e khopo, a mpholose, a nkise 'Musong oa hae oa leholimo. Tlōtla e ke e be ho eena kamehla le mehla. A ho be joalo!
Litumeliso tsa ho qetela
19Lumelisa Priseka le Akulase, le ba lelapa la Onesiforose. 20Erasetose o ile a sala Korinthe, athe Terofimose eena ke mo siile Mileta a kula. 21Potlakela ho tla e e-s'o be mariha. Eubulose, le Pudese, le Lenose, le Tlelaudia le bana babo rōna bohle baa u lumelisa.
22Morena a ke a be le moea oa hao. Mohau o ke o be le lōna.
