Mohlabani oa sebele oa Jesu Kreste
1Joale uena ngoan'aka, u matlafale ka mohau oa Kreste Jesu. 2Tseo u li utloileng ho 'na pel'a lipaki tse ngata, u li bee matsohong a batho ba tšepahalang, ba ka tsebang ho li ruta ba bang. 3U mamelle mahlōkō le 'na joaloka mohlabani oa sebele oa Kreste Jesu. 4Ha ho ea hlabanang ea ka itšitisang ka litaba tsa bophelo bona, haeba a rata ho khahlisa molaoli ea mo thotseng. 5Ea kenelang phehisano ea lipapali le eena a ke ke a fumana moqhaka oa tlhōlo, haeba a sa bapale ho ea ka melao ea teng. 6Sehoai ke sona se lokelang ho shoama pele. 7Nahana ka seo ke se bolelang, 'me Morena o tla u fa kutloisiso ea tsena tsohle.
8Hopola Jesu Kreste, setlōhōlō sa Davida, ea tsohileng bafung, ho ea ka molaetsa o molemo oa ka 9oo ke hlōkōfatsoang ka baka la oona, ke bileng ke leng litlamong joaloka sesenyi. Empa lentsoe la Molimo lona ha lea tlangoa. 10Kahoo ke mamella tseo tsohle ka baka la bakhethoa, hore le bona ba tle ba fumane pholoho 'moho le tlōtla e sa feleng ka Kreste Jesu.
11Lentsoe lena ke la 'nete, le reng:
“Haeba re shoele le eena,
re tla phela le eena;
12haeba re mamella,
re tla busa le eena;
haeba re mo latola,
le eena o tla re latola;
13haeba re sa tšepahale,
eena o tla 'ne a tšepahale
hobane ha a ka ke a fetoha.”
Mosebeletsi ea amohelehang
14U 'ne u ba hopotse tsena, 'me pel'a Molimo u ipiletse ho bona hore ba se ke ba ngangisana ka mantsoe, e leng ho sa thuseng letho, haese ho timetsa ba mametseng. 15Etsa ka matla ho ba ea amohelehang ho Molimo, mosebeletsi ea ke keng a hlajoa ke lihlong, ea rutang lentsoe la 'nete ka ho otloloha. 16Sesefa lipolelo tse sa hlompheng, tsa lefeela, hobane li khelosa batho bolumeling le ho feta. 17Lipolelo tsa bona li tla kèka joaloka mofetše. Har'a bona ho na le Hemenaiose le Filetose, 18ba khelohileng 'nete, ba ferekanyang tumelo ea ba bang, ka ho re tsoho ea bafu e se e ile ea e-ba teng. 19Leha ho le joalo, mothèo o tiileng, oo Molimo a o entseng, o ntse o tsitsitse, o ngotsoe mantsoe ana: “Morena o tseba bao e leng ba hae,” le ana: “Bohle ba rapelang Morena ba hlōbōhe bokhopo.”
20Ka tlung e kholo ha ho fumanoe lipitsa tsa khauta le tsa silefera feela, empa le tsona tsa lehong le tsa letsopa; tse ling ke tsa mesebetsi e khethehileng, tse ling ke tsa mesebetsi ea kamehla. 21Ekare ha motho a itlhoekisa ho tsena, e tla ba pitsa ea mesebetsi e khethehileng, e halalelitsoeng, e nang le thuso ho mong'a eona, e lokiselitsoeng mesebetsi eohle e molemo.
22Phema litakatso tsa bocha, u habe ho loka, tumelo, lerato le khotso, 'moho le bohle ba rapelang Morena ka lipelo tse hloekileng. 23Hana likhang tsa bothoto, tse se nang kelello, etsoe u tseba hore li tsoala lintoa. 24Mohlanka oa Morena ha a tšoanele ho loana, empa eka khona a be mosa ho bohle, a tsebe ho ruta, a be le mamello. 25A rute bahanyetsi ka bonolo. Mohlomong Molimo a ka ba fa hore ba bake, ba tsebe 'nete, 26ba hlaphoheloe, 'me ba phonyohe lerabeng la Diabolosi ea ba tšoasitseng hore ba etse thato ea hae.
