Davida e-ba khosi ea ba morabe oa Juda
1Ha tsena li fetile, Davida a botsa Morena, a re: “Na nka nyolohela ho o mong oa metse ea Juda?”
Morena a re ho eena: “Nyoloha.”
Davida a re: “Ke nyolohele ho ofe?”
Morena a re: “Nyolohela Heborone.”
2Eaba Davida o nyolohela Heborone, a e-na le basali ba hae ba babeli, Ahinoame oa Mojesereele, le Abikaele eo e neng e le mohats'a mofu Nabale oa Mokaramele. 3Davida a nyoloha le banna ba neng ba e-na le eena; monna ka mong a nyoloha le lelapa la hae, 'me ba aha metseng ea Heborone. 4Banna ba Juda ba fihla hona moo, ba tlotsa Davida hore e be khosi ea morabe oa Juda.
Davida o rōmela molaetsa Jabeshe-Gileade
Ha tsebisoa Davida, ha thoe: “Banna ba Jabeshe-Gileade ke bona ba epetseng Saule.”
5Eaba Davida o rōma maqōsa ho banna ba Jabeshe-Gileade, o re ho bona: “Morena a ke a le hlohonolofatse, hobane le bontšitse botšepehi ho mong'a lōna, e leng Saule, la mo epela. 6E se eka le lōna Morena a ka le bontša lerato la hae le botšepehi ba hae. Le 'na ke tla le buseletsa, hobane le entse ketso ena. 7Ka baka leo, matlafalang, le be bahale, hobane le hoja mong'a lōna Saule a shoele, ba morabe oa Juda ba se ba ntlotsitse hore ke be khosi ea bona.”
Ishe-Boshete e ba khosi ea Iseraele
8Joale Abinere, mora oa Nere, e leng molaoli oa mabōtho ao e neng e le a Saule, a nka Ishe-Boshete, mora oa Saule, a mo tšelisetsa Mahanaime. 9A 'mea hore e be khosi ea Gileade, le ea Ashehure, le ea Jesereele, le ea Efraime, le ea Benjamine, e, le ea naha eohle ea Iseraele.
10Ha Ishe-Boshete, mora oa Saule, a qala ho busa naha ea Iseraele, o ne a e-na le lilemo tse mashome a mane, 'me a busa ka lilemo tse peli. Ba morabe oa Juda ke bona feela ba ileng ba latela Davida. 11Davida a busa ba morabe oa Juda, a le Heborone, ka lilemo tse supileng le likhoeli tse tšeletseng.
Ntoa ea Gibeone
12Eaba Abinere, mora oa Nere, le bahlabani ba Ishe-Boshete, mora oa Saule, ba tloha Mahanaime, ba ea Gibeone. 13Joale bo-Joabe, mora oa Seruea, le bahlabani ba Davida, le bona ba tloha Heborone, ba ea kopana le bao pel'a letšana la Gibeone. Ba lula fatše; ba bang ka nq'ena ho letšana, ba bang ka nq'ane ho lona.
14Abinere a re ho Joabe: “E-re bahlankana ba eme, ba loane, re bone ba tla hlōla.”
Joabe a re: “Ho lokile!”
15Ba tla, 'me ba baloa; ba leshome le metso e 'meli ba morabe oa Benjamine e le ba Ishe-Boshete, mora oa Saule; ba leshome le metso e 'meli e le bahlanka ba Davida. 16Motho ka mong a menyana le oa hae, ba tšoarana ka lihlooho, ba hlabana ka lisabole likhōpong, eaba ba oela fatše kaofela, baa shoa. Ke ka baka leo sebaka seo se Gibeone se ileng sa reoa lebitso la Lebala la Lisabole.
Lefu la Asaele
17Mohl'a letsatsi leo ntoa ea e-ba e mahlo-mafubelu. Abinere le bahlabani ba Iseraele ba hlōloa ke bahlabani ba Davida.
18Bara ba bararo ba Seruea, e leng Joabe, le Abishai, le Asaele, ba ne ba le teng; Asaele a le lebelo joaloka khama ea naha. 19Asaele a phalalisa Abinere, a mo salama.
20Eaba Abinere oa hetla, 'me o re: “Asaele, na ke uena?”
Asaele a araba, a re: “Ke 'na!”
21Abinere a re ho eena: “Tlohela ho mphalalisa, u tšoare e mong oa bahlankana, u ikhapele seaparo sa hae sa ntoa.” Empa Asaele a se ke a tlohela ho mo ngoanyamisa.
22Abinere a boela a re ho Asaele: “Se k'a 'n'a 'ngoanyamisa! U batla hore ke tle be ke u bolaee? Nka shebana joang le ngoan'eno Joabe?”
23Ha Asaele a ntse a hana ho mo tlohela. Abinere a mo hlaba mpeng ka thekō ea lerumo, 'me lerumo la ba la ea hlaha kamorao, eaba o oela fatše, o shoela hona moo. Bohle ba ileng ba fihla sebakeng seo, seo Asaele a shoeletseng ho sona, ba ema tlekelele!
24Empa bo-Joabe le Abishai ba 'na ba phalalisa Abinere. Letsatsi la ba likella leralleng la Amma, e lebaneng le Gia e tseleng e eang lehoatateng la Gibeone.
Bo-Joabe le Abinere ba etsa khotso
25Bana ba Benjamine ba khōbōkana ho Abinere, ea e-ba sehlopha se le seng, ba ema holima leralla le leng. 26Joale Abinere a hōoeletsa Joabe, a re: “Le rata ha sabole e ntse e bolaea ho-ea-ho-ile? Ha u tsebe hore qetellong hoo ho tla tsoala lisuoa? U tla laela banna neneng, hore ba tlohele ho 'na ba ngoanyamisa bana babo bona?”
27Joabe a re: “Ke hlapanya ka Molimo ea phelang, hojane ua se ke ua bua, monna e mong le e mong o ne a ke ke a tlohela ho ngoanyamisa ngoan'abo ho fihlela ha bo e-sa.”
28Eaba Joabe o letsa lenaka, 'me batho bohle ba ema tlekelele! Ba se ke ba hlola ba phalalisa Baiseraele, 'me ba se ke ba hlola ba ba loantša.
29Abinere le banna ba hae ba qeta bosiu bohle ba ntse ba tsamaea khohlong ea Jorodane. Ba tšela Jorodane, ba tsamaea har'a Biterone eohle, ba ba ba ea fihla Mahanaime.
30Joabe a tlohela ho ngoanyamisa Abinere, a khōbōkanya sechaba sohle sa hae. Har'a bahlabani ba Davida ho ne ho le sieo Asaele le banna ba leshome le metso e robong. 31Empa bahlabani ba Davida ba ne ba bolaile ba morabe oa Benjamine, e leng bahlabani ba Abinere, ba makholo a mararo le mashome a tšeletseng. 32Ba nka setōpō sa Asaele, ba se epela ka lebitleng la ntat'ae, le neng le le Betlelehema. Bo-Joabe le bahlabani ba hae ba tsamaea bosiu bohle, ba fihla Heborone ha bo e-sa.
