Tšepiso ea hore Morena o tla khutla
1Baratuoa, lengolo lena leo ke le ngollang lona joale, e se e le la bobeli. Ho 'ona a mabeli ke ne ke tsosa maikutlo a lōna a hloekileng ka ho le hopotsa. 2Hopolang hè tse neng li boleloe e sa le pele ke baporofeta ba halalelang, le litaelo tse tsoang ho Morena le Mopholosi oa rōna, tseo le neng le li neoe ke baapostola ba lōna.
3Pele ho tsohle tsebang hona: Mehleng ea bofelo ho tla tla basomi ba laoloang ke litakatso tsa bona, ba some, 4ba re: “E kae tšepiso ea hore o tla khutla? Haesale bo-ntat'a rōna ba ithoballa, lintho tsohle li ntse li tšoana le mohla li hloloang.” 5Ka ho rialo ba tla be ba itebatsa ka boomo hore, khale-khale, ka taelo ea Molimo, maholimo a bile teng, le lefatše le ntšitsoeng metsing, le ntseng le le har'a metsi. 6Ke ka metsi ana lefatše la mehleng eo le ileng la koaheloa, 'me la timela. 7Empa ha e le maholimo le lefatše la kajeno, li bōlōketsoe ho chesoa, ho ea ka eona taelo eo, mohl'a letsatsi la kahlōlo, ha ho timetsoa batho ba khopo.
8Feela, baratuoa, ntho eo le sa tšoanelang ho e lebala ke ena: Ho Morena letsatsi le le leng le joaloka lilemo tse sekete, 'me le lilemo tse sekete li joaloka letsatsi le le leng. 9Morena ha a liehe ho phethahatsa litšepiso tsa hae, joalokaha ba bang ba lekanya hore oa lieha. Empa oa le mamella, hobane ha a rate ha ho ka timela leha a le mong, empa o rata hore bohle ba bake.
10Letsatsi la Morena le tla fihla joaloka lesholu. Mohlang oo maholimo a tla fela ka lerata le tšabehang. Lintho li tla qhibilisoa ke mocheso, 'me lefatše le tsohle tse ho lona li tla felisoa.
11Ha e le moo lintho tsohle li tla felisoa joalo, lōna eka khona le halalele haholo metsamaong le borapeling ba lōna, 12ha le ntse le lebeletse letsatsi la Molimo, 'me le etsa hore le tle ka potlako; e leng leo ka lona maholimo a tla felisoa ka mollo, 'me lintho li qhibilisoe ke mocheso. 13Ka ho ea ka tšepiso ea Molimo, re lebeletse maholimo a macha le lefatše le lecha, moo ho loka ho ahileng teng.
14Ka baka leo, baratuoa, ha le ntse le lebeletse tseo, etsang ka matla hore Molimo a le fumane le se na letheba leha e le sekoli, le e-na le khotso. 15Talimang mamello ea Morena oa rōna e le pholoho ea lōna, kamoo le eena Paulosi, ngoan'abo rōna ea ratehang, a le ngoletseng kateng, ka bohlale boo a bo neiloeng. 16Mangolong 'ohle a hae, a amanang le litaba tsena, o bua joalo. Ho 'ona ho teng tse thata ho utloisisoa, tseo ba sa rutehang le ba fokolang likelellong ba li sothang, joalokaha ba etsa Mangolong a mang, 'me ba ee timelong.
17Joale lōna baratuoa, erekaha le lemositsoe e sa le pele, itlhokomeleng, le se ke la hoheloa ke batho ba khopo, ba khelohileng, la tloha la lahleheloa ke ho tiea ha lōna. 18Le mpe le hōle mohaung le tsebong ea Jesu Kreste, Morena le Mopholosi oa rōna. Ho eena e be tlōtla joale le kamehla eohle. A ho be joalo!
