2 PETROSE 1

₁'Na Simone Petrose, mohlanka le moapostola oa Jesu Kreste, ke lumelisa ba amohetseng tumelo ea bohlokoa joaloka rōna, ka baka la ho loka ha Jesu Kreste, Molimo le Mopholosi oa rōna, ke re: ₂Le ke le ekeletsoe mohau le khotso ka ho tseba Molimo le Jesu, Morena oa rōna.

₃Matla a hae a bomolimo a re neile lintho tsohle tseo e leng tsa bophelo le tsa borapeli, ka ho re fa tsebo e tletseng ea ea re bitsitseng ka tlōtla ea hae le ka matla a hae. ₄Ka tsena o re neile lintho tsa bohlokoa, tse kholo, tseo a neng a re tšepisitse tsona, e le hore ka tsona le tle le be le kabelo bomolimong ba hae, 'me le phonyohe bokhopong bo teng lefatšeng, bo bakoang ke litakatso tse mpe.

₅Ka baka lena, lekang ka matla ho eketsa tse khabane tumelong ea lōna, le eketse tsebo, ho tse khabane tsa lōna, ₆'me tsebong ea lōna le eketse boitšoaro, boitšoarong le eketse mamello, mamellong le eketse borapeli, ₇borapeling le eketse setsoalle sa boena, 'me setsoalleng sa boena le eketse lerato. ₈Ha le e-na le tsena ka bongata, ha le sa tla ba batho ba se nang thuso, ba nyōpileng tsebong ea Morena oa rōna Jesu Kreste. ₉Ea se nang tsena ke sefofu se phōphōletsang lefifing, ebile o lebetse le hore nakong e fetileng o ile a hlatsuoa libe tsa hae.

₁₀Ka baka leo, bana beso, itekeng ka matla hore pitso le khetho ea lōna e tiee. Ka ho etsa joalo, ha le ka ke la hlola le oela phosong. ₁₁Ka mokhoa o joalo le tla neoa tokelo e tletseng ea ho kena 'Musong o sa feleng oa Jesu Kreste, Morena le Mopholosi oa rōna.

₁₂Ke ka baka lena, ke ikemiselitseng ho le hopotsa lintho tsena kamehla, le hoja le li tseba, le bile le tiisitsoe 'neteng eo le seng le e-na le eona. ₁₃Ke fumana ho lokela hore, ha ke sa ntsane ke phela, ke 'ne ke le tsose ka ho le hopotsa, ₁₄hobane kea tseba hore haufinyane ke tla falla bophelong bona, joalokaha Morena oa rōna Jesu Kreste a ntsebisitse. ₁₅Hape ke tla leka kahohle hore, ha ke se ke faletse, le tle le 'ne le hopole lithuto tsena kamehla.

₁₆Ha re le tsebisa tsa matla a Morena oa rōna Jesu Kreste le tsa ho tla ha hae, re ne re sa bue ka litšōmo tse qapiloeng ka bohlale, empa re ne re bua re le lipaki tse boneng botlōtlehi ba hae. ₁₇O ne a amohele hlompho le tlōtla e tsoang ho Molimo Ntate, ha lentsoe le tsoang boholong bo tlōtlehang ba Molimo, le re: “Enoa ke Mora oa ka eo ke mo ratang, ea nkhahlang.” ₁₈Lentsoe lena ra na ra le utloa le e-tsoa leholimong, re e-na le eena thabeng e halalelang.

₁₉Re bile re na le lentsoe la baporofeta, le tšepahalang haholo, leo e ka bang hantle hore le le ele hloko, hobane le joaloka lebone le khanyang lefifing, ho fihlela mesong ea Letsatsi lela, mohla Mphatlalatsane e chabelang lipelong tsa lōna. ₂₀Empa tsebang sena pele: Ha ho ea ka hlalosang boporofeta bo Mangolong a halalelang ka boeena feela, ₂₁hobane ha ho e-s'o be boporofeta bo kileng ba tla ka thato ea motho le ka mohla, empa e bile ka ho susumetsoa ke Moea o Halalelang batho ba ileng ba bolela tse tsoang ho Molimo.