2 BO-MAKABEA 8

₁Judase Makabea, 'moho le balekane ba hae, ba ne ba kena ka sekhukhu ka metsaneng, ba bitsa ba moloko oa habo bona, ba ikopanya le ba neng ba tiiselitse tumelong ea Sejuda. Joale ba phutha banna ba ka etsang likete tse tšeletseng. ₂Ba rapela Morena hore a talime sechaba sa hae se hataketsoeng ke bohle, 'me a hauhele Tempele e silafalitsoeng ke ba khopo; ₃le hore a utloele motse o ntseng o ripitloa bohloko, o leng lekhatheng la ho batalatsoa. A ke a utloe lentsoe la mali a hoeletsang ho eena; ₄a hopole polao e hlokang toka ea bana ba se nang molato, le linyefolo tseo ho nyefoloang Lebitso la hae le halalelang ka tsona, 'me a bontše lehloeo la hae la bokhopo.

₅Eitse ha Makabea a khobokantse makhotla a hae, balichaba ba sitoa ho mo hlola; hobane khalefo ea Morena e ne e se e fetohile mohau bakeng sa Bajuda. ₆Eaba o tsometsa metse le metsana 'me oa e chesa; a hapa libaka tsa bohlokoa, a phalalisa lira tse ngata-ngata. ₇Hangata o ne a futuha nakong e fanang ka monyetla e leng ea bosiu. Setumo sa bonatla ba hae sa tlala kahohle.

₈Eitse ha Filipi a hlokomela hore Judase o ntse a ipha matla hanyane ka hanyane, le hore o atleha hangata-ngata, a ngolla Potolemea, molaoli oa Siria e Kholo le Fenisia, a mo kopa hore a mo thuse litabeng tsa khosi. ₉Kapele-pele Potolemea a romela Nikanore, mora oa Paterokolose, e mong oa metsoalle ea hae e khethehileng, hoba a mo nee mphi ea bahlabani ba ka fetang likete tse mashome a mabeli ba tsoang lichabeng tse fapakaneng, ka taelo ea ho ea felisa sechaba sohle sa Bajuda. A mo tlatsa ka Gorgiase, eo e neng e le molaoli ea nang le tsebo e kholo ea litaba tsa ntoa. ₁₀Nikanore o ne a ikemiselitse ho bokellela khosi, ka ho rekisa Bajuda ba tla tšoaroa ntoeng, chelete ea litalenta tse kete tse peli, e leng lekhetho leo khosi e neng e tlamehile ho le ntšetsa Baroma. ₁₁Ka hona a romela hang metseng e lebopong la leoatle, ho mema batho ba tla tla reka makhoba a Bajuda, a tšepisa hore ho tla rekoa makhoba a mashome a robong ka talenta e le 'ngoe, a sa lemohe hore boiphetetso ba Ea matla 'ohle bo mo setse morao.

₁₂Joale Judase a utloa hore Nikanore o ntse a e-tla. Eare ha a tsebisa Bajuda ba neng ba e-na le eena hore sera se haufi, makoala le batho ba sa tšepeng toka ea Molimo, ba shamoha, ba ikela libakeng tse ling. ₁₄Empa bohle ba bang ba rekisa tsohle tse neng li ba saletse, 'me ba kopa Morena hore a ba lopolle ho Nikanore ea khopo, ea ba rekisitseng e le makhoba ntoa e e-s'o qale le ho qala; ₁₅'me ha e se ka baka la bona, e mpe e be ka baka la Selekane seo a se entseng le bo-ntat'a bona le ka baka la Lebitso le halalelang 'me le tlotlehang la Ea ba khethileng ho ba ba hae. ₁₆Makabea a ba a phutha ba neng ba ntse ba e-na le eena, e le banna ba ka etsang likete tse tšeletseng, a ba khothaletsa ho se tšabe lira; ba se ke ba tšosoa ke balichaba bao ba bangatahali, ba ba futuhelang ka ntle ho toka, ba mpe ba loane senna. ₁₇A ba bolella hore ba se ke ba lebala sekhobo seo bao ba ileng ba se tlisetsa Qalo e halalelang ba sa natse melao; ba hopole le tlhokofatso ea baahi ba Jerusalema, le pheliso ea meetlo ea boholo-holo. ₁₈A eketsa, a re: “Bona ba tšepile libetsa tsa bona le bonatla ba bona; empa rona re tšepile Molimo ea matla 'ohle, eo, ka ho oma ka hlooho, a ka lihelang fatše bao ba re futuhelang, esita le lefatše lohle.”

₁₉Ho feta moo, a ba hopotsa lithuso tsa Molimo mehleng ea bo-ntat'a bona: kamoo, tlas'a Saneheribe, ba likete tse lekholo le mashome a robeli a metso e mehlano ba ileng ba timetsoa kateng. ₂₀A ba hopotsa le ntoa eo ba ileng ba e loana le Bagalata, naheng ea Babilona: Bajuda bao, kaofela, ba neng ba le likete tse robeli 'me ba thusa Bamasedonia, ba likete tse 'ne, joale ha ba e hlanaka 'me Bamasedonia ba tsielehile, ba likete tse robeli bao ba bolaea banna ba lireng ba likete tse lekholo le mashome a mabeli, ka thuso eo ba e fumaneng ho Ea leholimong; ba ba ba ikhapela thepa e ngata.

₂₁Joale ba khothatsoa ke lipolelo tsena, 'me ba ikemisetsa ho shoela melao le naha ea habo bona. Eaba Judase o arola mabotho likarolo tse 'ne. ₂₂A bea bana babo, Simone, Josefa le Jonathane, e mong le e mong molaoli oa karolo e le 'ngoe, e leng banna ba sekete le makholo a mahlano. ₂₃Ho feta moo a laela Eleasare ho ba balla Buka e halalelang; a ba fa lepetjo le reng: “Thuso ea Molimo”, a ba a etella pele eena ka sebele karolo ea pele ea mphi, 'me ba futuhelana le Nikanore.

₂₄Ka ho ba le Ea matla 'ohle e le mothusi oa bona, ba bolaea lira tse fetang likete tse robong; ba kobesa 'me ba holofatsa boholo ba banna ba mphi ea Nikanore, ba ba qhala kaofela. ₂₅Ba nka chelete ea ba neng ba tlile ho tla ba reka. Eitse ha ba se ba ba phalaliselitse hole, ba khutla ka lebaka la nako; ₂₆hobane e ne e le letsatsi le eteletseng Sabatha pele, 'me ka hona ba se ke ba ba pheella phalalisong. ₂₇Ha ba bokeletse libetsa tsa lira, 'me ba hlobolisitse babolauoa lintho tsa bona, ba qala ho ketekela Sabatha, ba boka Morena. Ba mo leboha haholo, hobane o ne a ba pholositse letsatsing leo e le qaleho ea ho ba etsetsa mohau. ₂₈Eaba, ka morao ho Sabatha, ba abela ba neng ba hlokofalitsoe le bahlolohali le likhutsana karolo e 'ngoe ea khapo, 'me bona le bana ba bona ba arolelana ho setseng. ₂₉Hoba ba qete, ba ile ba etsa thapelo e kholo ea sechaba sohle ho kopa Morena ea mohau ho boelana ka ho tlala le bahlanka ba hae.

₃₀Ha Bajuda ba ntse ba futuhelana le bahlabani ba Timothea le Bakidese, ba bolaea ba fetang likete tse mashome a mabeli, 'me ba ikhapela liqhobosheane tse phahameng. Ba arolelana khapo e ngata-ngata, ba e etsa likarolo tse lekanang, e 'ngoe bakeng sa bona, tse ling bakeng sa ba hlokofalitsoeng le likhutsana le bahlolohali, esita le ba tsofetseng. ₃₁Ba bokella libetsa tsa lira, ba li boloka ka hloko libakeng tse tšoanelehang; 'me ho setseng ha khapo ba ho tlisa Jerusalema. ₃₂Ba fenetha molaoli oa makhotla a Timothea, motho ea khopo ka ho fetisisa, ea neng a ile a bakela Bajuda mahlomola a mangata. ₃₃Eitse ha ba etsa mokete oa tlholo, motseng o moholo oa naha ea habo bona, ba chesa ba ileng ba chesa mamati a Tempele, bao hammoho le Kalisethenese, ba neng ba ipatile ka tlung e 'nyane; ba fumana phetetso e lokelang bokhopo ba bona.

₃₄Joale senokoane sane sa motho, Nikanore, ea neng a memetse bahoebi ba sekete ho tla reka Bajuda, ₃₅a kokobetsoa, ka thuso ea Morena, ke bona bao a neng a ba nyelisa. A hlobola seaparo sa hae sa tlotla, a ba a baleha har'a naha eka ke lekhoba le thobileng, a tsamaea a le mong, 'me a ba lehlohonolo ho fihla Antiokia, hoba makhotla 'ohle a hae a ripitloe. ₃₆Eena eo ea neng a tšepisitse ho ntšetsa Baroma lekhetho ka chelete ea thekiso ea baahi ba Jerusalema bao a tlileng ho ba tšoara, joale a bolela phatlalatsa hore Bajuda ba na le Moloaneli; 'me ka hona Bajuda ba ke ke ba hlahisoa kotsi, ka baka la hobane ba latela melao e beiloeng ke eena.