'M'a bana le bana ba hae ba shoela tumelo
1Ho ne ho le teng hape bara ba supileng ba motho, ba ileng ba tšoaroa 'moho le 'm'a bona. Khosi ea laela hore ba khakhathoe ka lithupa le ka liphafa ho ba qobella ho ja nama ea kolobe e hanetsoeng ke Molao oa Moshe. 2Joale e mong oa bona lebitsong la bohle, a re: “U re batla'ng? U rata ho tseba'ng? Re ikemiselitse ho shoa ho e-na le ho tlola melao ea bo-ntat'a rona.”
3Eaba khosi Antiokose o tlaloa ke pelo, o laela hore lipane tsa ho halika le lipitsa tse kholo li besoe. 4Eitse ha li chesa, a laela hore ea buileng lebitsong la ba bang a pongoe leleme, a buuoe letlalo la hlooho, a khaoloe matsoho le maoto, bana babo le 'm'ae ba ntse ba shebile. 5Joale ha litho tsa hae li se li ponngoe kaofela, khosi ea laela hore a tlisoe a sa ntse a phela, mollong, a tle a halikoe ka pitseng. Ha mosi o ntse o nyoloha paneng, ba bang 'moho le 'm'a bana bana ba khothaletsana ho shoa senna, ba re: 6“Morena Molimo oa re talima, 'me ruri oa re hauhela, joalokaha Moshe sefeleng seo ho sona a hlahatsang bakoenehi pepeneneng a boletse, a re: ‘Morena o tla hauhela bahlanka ba hae.’ ”
7Eaba ha oa pele a faletse ka mokhoa ona, oa bobeli a tlisoa tlhokofatsong. Hoba a tlosoe letlalo la hlooho le meriri, a botsoa hore na a ka rata ho ja kolobe, pele a hlokofatsoa ka ho pongoa litho tsa 'mele, se seng le se seng. 8Empa eena a araba ka puo ea habo, a re: “Che!” Ka hona, joaloka oa pele, a mamella litlhokofatso tse tšoanang. 9Ha a le lekhatheng la ho neela moea, a re: “Uena ea khopo ka ho fetisisa, u re amoha bophelo ba hona joale; empa Khosi ea leholimo le lefatše, eena o tla re tsosa hore re tle re be le bophelo bo sa feleng, rona ba shoelang melao ea hae.”
10Ka mora' eo, ha hlokofatsoa oa boraro. Ha ho thoe a hlahise leleme, a le ntša hang, a otlolla le matsoho a sa tšabe letho; 11a ba a bua ka sebete, a re: “Matsoho ana ke a fuoe ke Ea leholimong; empa ka baka la melao ea hae, ha ke a natse; hobane ke tšepa hore ke tla a fumana hape ho eena.” 12Khosi le ba neng ba e-na le eona ba makalla matla a mohlankana eo, ha ba bona kamoo a neng a sa tsotelle ho hlokofatsoa kateng.
13Hoba eo a shoe, ha hlokofatsoa le oa bone, ka sehloho se tšoanang. 14Ha a le lekhatheng la ho shoa, a re: “Ho molemo ho bolaoa ke batho, empa e le ka tšepo e tsoang ho Molimo, ea ho tsosoa ke eena; athe ha e le uena, ha u ka ke ua tsohela bophelo.”
15Ka morao ho moo, ha tlisoa 'me ha hlokofatsoa oa bohlano. 16Eaba eo o talima khosi, 'me a re: “U na le matla holim'a batho, leha le uena u le motho ea shoang; u etsa seo u se ratang. Empa se hopole hore moloko oa habo rona o furaletsoe ke Molimo. 17Bea butle; u sa tla bona boholo ba matla a hae, le kamoo a tla u hlokofatsa kateng, uena le litloholo tsa hao.”
18Ka mora' hae, ha tlisoa oa botšelela. Ha eo a le lekhatheng la ho shoa, a re: “Se ithetse ka mabaka a lefeela. Ke ka molato oa rona re hlokofatsoang joalo, hobane re sitetsoe Molimo; 'me libe tsa rona li re baketse tsena tse makatsang. 19Empa u se hopole hore u tla phonyoha kotlo, ha e le moo u lekile ho loantša Molimo.”
20Ha e le 'm'a bona, eena e bile motho ea babatsehang haholo, ea lokelang ho hopoloa le ho tumisoa ke bohle; hobane ka ho bea tšepo ea hae ho Morena, a mamella ka sebete ho bona bara ba hae ba supileng ba bolaoa ka nako ea letsatsi le le leng. 21A khothatsa e mong le e mong oa bona ka puo ea habo, a tletsoe ke maikutlo a khabane; a kopantse pelo ea bonna le monahano oa bosali, a re ho bona: 22“Ha ke tsebe hore na le hlahile joang ka popelong ea ka; hobane hase 'na ea le fileng moea le bophelo; hape hase 'na ea bopileng litho tsa e mong le e mong oa lona. 23Ke 'Mopi oa tsohle ea khobang motho tlhahong ea hae; ebile tlholeho ea lintho tsohle e tsoa ho eena. Ka lebaka lena, mohaung oa hae, o tla le buseletsa moea le bophelo, hobane le itela ka baka la melao ea hae.” 24Antiokose a hopola hore o nyelisitsoe, a ba a belaela ka hore e tla ke ebe o se a hlapaotsoe puong eo. Ke ka hona, eitseng ha e monyenyane a sa ntsane a phela, khosi e sa kang ea bua le eena ho mo khothatsa feela; empa ea ba ea mo tšepisa, ka ho hlapanya, hore e tla mo etsa morui, hoo a tla honoheloa ke batho, ha feela a ka furalla meetlo ea bo-ntat'ae; 'me e mo etse esita le motsoalle oa eona, e be e mo fe boikarabelo 'musong. 25Ere kaha mohlankana a ne a sa natse puo ena, Antiokose a bitsa 'm'ae, a mo khothaletsa ho eletsa moshanyana ho pholosa bophelo ba hae. 26Hoba khosi e mo kope ka makhetlo, a lumela. 27A inamela ka nq'a ka ho ngoana oa hae, a phoqa khosi e sehloho ka ho bua le eena ka puo ea habo, a re: “Ngoan'a ka, nkutloele bohloko, 'na ea u jarileng khoeli tse robong popelong, 'me ka u nyantša lemo tse tharo; ka ba ka u otla, ka u holisa ho fihlela u ba mokana. 28Kea u kopa, ngoan'a ka, talima leholimo le lefatše, u shebe tsohle tse ho tsona, u be u tsebe hore Molimo ha aa ka a li etsa ka lintho tse neng li se li bile teng pele; le oona moloko oa batho, ka mokhoa o tšoanang, o entsoe ke Molimo. 29U se ke ua tšaba sekebekoa sena; u mpe u ipakahatse u le oabo bana beno. Amohela lefu e le hore, ka mohau oa Molimo, ke tle ke tsebe ho boela ke u fumana hammoho le bona.”
30'M'ae a sa ntsane a bua, mohlankana a re: “Le sa emetse'ng? Ha ke mamele taelo ea khosi, ke mamela litaelo tsa Molao oo bo-ntat'a rona ba o neiloeng ke Moshe. 31Ha e le uena, moqapi oa bomalimabe bohle bo hlahelang Baheberu, u ke ke ua phonyoha liatleng tsa Molimo. 32Rona, ke ka baka la libe tsa rona, ha re oetsoe ke tse bohloko. 33Haeba Morena oa rona, ea phelang, o re halefetse nakoana, ho re khalemela le ho re laea, o tla boela a boelana le bahlanka ba hae. 34Empa uena, motho ea khopo, ea nyonyehang ho feta bohle, u se ke ua ikakasa feela, 'me ua ithetsa ka ho tšepa mafeela, ha u ntse u isa bahlanka ba Molimo letsoho; 35hobane ha u e-s'o pheme kahlolo ea Molimo ea matla 'ohle, ea bonang tsohle. 36Bana beso ba mameletse bohloko bo bokhutšoanyane, bo isang bophelong bo sa feleng, ba bolaoa ka baka la ho tšepahala ho Molimo tlas'a selekane sa hae; empa uena, ka kahlolo ea Molimo, u tla fumana kotlo e tšoanelehang ka baka la boikhohomoso ba hao. 37'Na, joaloka bana beso, ke nyehela ka 'mele oa ka le ka moea oa ka, bakeng sa melao ea bo-ntate. Ke ntse ke ipiletsa ho Molimo hore a phakise a hauhele sechaba sa habo rona; le hore uena, ka matšoenyeho le litlokotsi, u qobelloe ho bolela pepeneneng hore eena a inotši ke Molimo. 38Le teng ke rapella hore, ka 'na le bana beso, khalefo ea Ea matla 'ohle, e oetseng moloko oohle oa habo rona holimo, e khaotse.” 39Khosi ea tlaloa ke khalefo, hobane e hlabehile ke ho phoqoa, 'me ea mo hlokofatsa hampe, ho feta ba bang. 40Eaba moshanyana eo le eena o falla lefatšeng, a sa silafatsoa, a beile tšepo eohle ea hae ho Morena. 41Qetellong, ka mora' bara, 'm'a bona le eena a shoa joaloka bona. 42Ka tsena re qetile taba ea lijo tsa mahlabelo le ea litlhokofatso tsa Bajuda tse tšabehang.
