2 BO-MAKABEA 11

₁Nakoana ka morao ho mona, Lisiase, moalosi le mong ka khosi, eo litaba tsa 'muso li neng li le matsohong a hae, ka ho soabisoa ke se etsahetseng, ₂a khobokanya bahlabani ba likete tse mashome a robeli le lebotho lohle la bapalami. A ea futuhela Bajuda, a rerile ho etsa Jerusalema motse oa Bagerike; ₃le ho khafisa Tempele, joaloka litempele tse ling tsa balichaba; le ho rekisetsa boprista bo boholo ea ntšang chelete e ngata ho feta ba bang, selemo le selemo. ₄O ne a sa hopole ho hang matla a Molimo, empa pelo ea hae e tletse boikhohomoso ka baka la likete tse mashome-shome tsa bahlabani ba litaaso ba hae, le likete-kete tsa bapalami ba hae, le litlou tse mashome a robeli tsa hae. ₅A kena Judea, a atamela Bete-Sure, e leng qhobosheane e hole le Jerusalema, sebaka se ka etsang likilomethara tse mashome a mabeli a metso e supileng, 'me a teela motse oo hare ka thata.

₆Eitse ha Makabea le batho ba hae ba utloa hore Lisiase o thibella liqhobosheane, bona le sechaba sohle ba kopa Morena ka lillo le menyepetsi hore a romele lengeloi le molemo ho tla pholosa Iseraele. ₇Makabea ka seteetee a nka lihlomo pele ho bohle, a khothaletsa ba bang ho ipea kotsing le eena, ho phallela bana babo bona; 'me bohle hammoho, ba tsamaea le eena ba le mafolo-folo. ₈Eitse hoba ba qete ho tsoa Jerusalema, ha hlaha mopalami ea ba eteletseng pele, a apere tse tšoeu, a tsoka libetsa tsa khauta. ₉Eaba bohle hammoho ba boka Molimo ea mohau; 'me ba ikutloa ba tletsoe ke sebete hoo ba neng ba ikitlaelelitse ho phunyeletsa e seng bathong feela, empa esita le liphoofolong tse hlaha, le marakong a litšepe. ₁₀Joale ba tsoela pele ba hlometse, le teng ba e-na le mothusi ea tsoang leholimong, hobane Morena o ne a ba hauhetse. ₁₁Joaloka litau ba khorohela lira, ba rinya tse likete li leshome le motso o mong tsa tsona le bapalami ba sekete le makholo a tšeletseng, 'me ba phalalisa bahlabani bohle ba setseng. ₁₂Bongata ba bona ba baleha ba kobesitsoe, ba se ba se na libetsa. Le eena Lisiase a pholoha feela ka baka la ho baleha ka mokhoa o tlontlollang.

₁₃Lisiase e ne e se motho ea hlokang kutloisiso. Ka hona a inahana ka ho hloloa hoo ha hae, a ba a bona hore Baheberu ba sitoa ho fenngoa, hobane ba tlatsitsoe ke Molimo ea matla. ₁₄Joale a romela ho bona, ho ba behela hore ba boelane le eena ka tsela e nang le toka; a ba a eketsa ka hore o tla kholisa khosi ho ba motsoalle oa bona. ₁₅Makabea a ananela kopo ea Lisiase, a shebile molemo oa bohle; 'me eng le eng eo Makabea a ileng a e kopa ka mangolo ho Lisiase malokana le Bajuda, khosi ea e ananela.

₁₆Lengolo leo Lisiase a ileng a le ngolla Bajuda le ne le re: “Lisiase o lumelisa sechaba sa Bajuda. ₁₇Johanne le Abosalome, ba romiloeng ke lona, hoba ba 'nee lengolo la lona, leo kopi ea lona e hlomathisitsoeng mona, ba ile ba kopa karabo lintlheng tse hlalositsoeng teng. ₁₈Joale tsohle tse neng li tšoanetse ho tsebisoa khosi, ka e tlalehela tsona; athe tseo ke neng ke e-na le matla ho tsona, ka li ananela. ₁₉Ka hona, haeba le ka ipoloka le tšepahala ho 'muso, ke tla leka ho sebelisana le lona le ka nako e tlang. ₂₀Ha e le mabapi le lintlhanyana tse ling, ke kopile baromuoa ba lona le baromuoa ba ka ho buisana ka tsona le lona. ₂₁Salang ka khotso. Selemong sa lekholo le mashome a mane a metso e robeli, letsatsing la mashome a mabeli a metso e mene la khoeli ea Diosekorose.”

₂₂Lengolo la khosi le ne le re: “Khosi Antiokose o lumelisa Lisiase, ngoan'abo. ₂₃Ha e le moo ntat'a rona a re siile ho nkeloa balimong, re rata hore baahi ba 'muso oa rona ba se ke ba khathatsoa tsamaisong ea litaba tse boikarabelong ba bona. ₂₄Joale, re utloile hore Bajuda ba hanne ho sokolohela meetlong ea Bagerike kamoo ntate a neng a lakalitse kateng, ba mpa ba khetha ho boloka mokhoa oa ho phela oo e leng oa bona, 'me ba kopa hore ba lumelloe ho 'na ba latela melao ea habo bona. ₂₅Ka ho rata hore sechaba sena se be khotsong joaloka tse ling, re laetse hore Tempele e busetsoe ho Bajuda 'me ba iphelele ka ho ea ka meetlo ea bo-ntat'a bona. ₂₆U tla be u entse hantle ka hona ho romela motho ho bona le ho boelana le bona; e le hore, ha ba se ba tsebile seo e leng thato ea rona, ba boele ba be le tšepo, 'me ba 'ne ba tsamaise ka khotso litaba tse boikarabelong ba bona.”

₂₇Lengolo la khosi ho Bajuda, lona le ne le re: “Khosi Antiokose o lumelisa Lekhotla la baholo la Bajuda, le Bajuda bohle. ₂₈Haeba le phela hantle, ho joalokaha re lakatsa. Le rona re phela hantle. ₂₉Menelaose o re tsebisitse takatso ea lona ea ho boela ha habo lona, ho phetha mesebetsi ea lona. ₃₀Bohle ba tlang ho khutlela hae pele ho letsatsi la mashome a mararo la khoeli ea Santhikose, ke tla ba tšoarela ka ho tlala. ₃₁Bajuda ba tla ba le tokelo ea ho ja lijo tse lumeletsoeng ke meetlo ea habo bona le ho latela melao ea habo bona, joaloka pele. Ha ho ea tla tšoenngoa ka tsela efe kapa efe, ka lebaka la lintho tseo a li entseng ka ho hloka tsebo. ₃₂Hape ke rometse Menelaose ho khutsisa matsoalo a lona. ₃₃Salang ka khotso. Selemong sa lekholo le mashome a mane a metso e robeli, letsatsing la leshome le metso e mehlano la khoeli ea Santhikose.”

₃₄Baroma le bona ba romela ho Bajuda lengolo le reng: “Kintuse Memmiuse le Tituse Maniuse, ba lebitsong la Baroma, ba lumelisa sechaba sa Bajuda. ₃₅Tsohle tseo Lisiase, mong ka khosi, a le lumeletseng tsona, le rona re lumellane le tsona. ₃₆Empa malokana le tseo a nahaneng hore li lebisoe ho khosi, romelang motho ho rona hang hoba le li hlahlobe, e le hore re li hlalosetse khosi, ka mokhoa o le lokelang; hobane re ea Antiokia. ₃₇Ka hona, phakisang ho re romela maqosa, hore re tle re tsebe maikutlo a lona. ₃₈Salang ka khotso. Selemong sa lekholo le mashome a mane a metso e robeli, letsatsing la leshome le metso e mehlano la khoeli ea Santhikose.”