Lengolo ho Bajuda ba Egepeta
1“Litumeliso ho bana babo rona, Bajuda ba Egepeta! Bana babo bona, Bajuda ba Jerusalema le ba naheng ea Judea, ba ba lakaletsa khotso ea 'nete.
2“Eka Molimo a ka le sitsa ka tse molemo; a hopole selekane sa hae seo a se entseng le Aborahama le Isaka le Jakobo, bahlanka ba tšepahalang ba hae. 3A ke a le fe bohle takatso ea ho mo sebeletsa le ho etsa thato ea hae ka pelo eohle le ka boithatelo bo botle. 4A ke a bule lipelo tsa lona hore le utloisise Molao oa hae le litaelo tsa hae; 'me a le fe khotso. 5A ke a utloe lithapelo tsa lona, a le boelanye le eena; 'me a se le furalle ka nako ea mathata. 6Ke ena thapelo eo re le etsetsang eona hajoale.
7“Ha Demeteriose a ne a busa, selemong sa lekholo le mashome a tšeletseng a metso e robileng mono o le mong, rona Bajuda ra le ngolla hore re litsietsing le mathateng, a re oetseng holimo lilemong tseo, hoba Jasone le batho ba hae ba eke naha e halalelang le 'muso oa eona. 8Ba chesa lemati le leholo la Tempele 'me ba tšolla mali a se nang molato. Eaba re rapela Morena, 'me ra utluoa; ra nyehela ka sehlabelo le ka phofo e thumisehileng, ra bontša mabone ka Sehalalelong, 'me ra bea bohobe bo halalelang. 9Re le ngolla hape ho le mema ho etsa mokete oa Maphephe khoeling ea Kiseleve; selemong sa lekholo le mashome a robeli a metso e robileng meno e 'meli.”
Lengolo ho Arisetobulose: Lefu la khosi Antiokose
10“Batho ba Jerusalema le ba Juda, lekhotla la baholo le Judase ba lumelisa Arisetobulose, eo e leng moeletsi oa khosi Potolemea le oa leloko la baprista ba tlotsitsoeng, le Bajuda ba Egepeta, 'me ba ba lakaletsa bophelo bo botle.
11“Kaha re pholositsoe ke Molimo likotsing tse kholo, re mo leboha haholo re le batho ba ikemiselitseng ho loantša khosi. 12Ke eena ka sebele ea lelekileng lira motseng o halalelang. 13Khosi Antiokose, molaoli oa tsona, ha a ne a ile Peresiea a e-na le mphi e bonahalang e le e sitoang ho hloloa, a ripitloa le batho ba hae ba le ka tempeleng ea Nanea, ka ho thetsoa ke baprista ba Nanea. 14Khosi Antiokose, a e-na le metsoalle ea hae, a fihla bakeng seo, eka o tla nyala molimo oo o motšehali, a tle a tsebe ho inkela bongata ba matlotlo a tempele joaloka mpho ea lechato. 15Eitse ha baprista ba Nanea ba a hlahisitse, eena le banna ba seng bakae ba kena ka har'a tempele. Joale hang hoba Antiokose a kene, baprista ba koala tempele. 16Ba bula monyako o patehileng ka siling, 'me ha hlaha ba tlepetsang khosi le batho ba eona ka majoe; eaba baprista baa ba tsekolla, ba ba khaola lihlooho 'me ba li akhella batho ba kantle. 17A ho bokoe Molimo nthong tsohle, ea neelaneng ka ba khopo!”
Mollo o chesa sehlabelo sa Nehemia
18“Kaha re lekhatheng la ho etsa mokete oa Tlhoekiso ea Tempele ka la mashome a mabeli a metso e mehlano la khoeli ea Kiseleve, re ikutloile re tlamehile ho le tsebisa; e le hore le lona le tle le etse mokete oo, joalokaha le etsa oa Maphephe le oa mollo o ileng oa tuka ha Nehemia, mohahi oa Tempele le aletare, a nyehela ka mahlabelo. 19Eitse ha bo-ntat'a rona ba isoa Peresiea, baprista ba lokileng ba mehleng eo ba nka ka sekhukhu mollo o neng o le aletareng, ba o pata lelumeleng le neng le se na metsi, 'me ba o boloka moo hantle, hoo sebaka seo se sa kang sa tsejoa ke batho. 20Ha ho se ho fetile lilemo tse ngata, ha ho khahlile Molimo, Nehemia, moromuoa oa khosi ea Peresiea, a fihla 'me a laela hore bao e leng litloholo tsa baprista ba neng ba patile mollo ba ee ho o batla. Joale ha ba khutla ba bolela hore ba sitiloe ho fumana mollo, haese ntho e kang metsi a hoamileng, a ba laela hore ba ee ho kha, ba a tlise. 21Ha tsohle tse hlokahalang bakeng sa mahlabelo li se li beiloe aletareng, eaba Nehemia o re baprista ba tšele metsi ao holim'a patsi le linyehelo tse neng li le holim'a eona. 22Ba etsa joalo; 'me kamorao ho nakoana ha letsatsi le neng le patiloe ke maru le boetse le chaba, ha tuka khanare ea mollo, hoo bohle ba ileng ba makala. 23Eitse ha sehlabelo se ntse se chesoa, baprista ba rapela, bona le batho bohle ba teng, Jonathane a qala 'me ba bang ba araba hammoho le Nehemia.
Thapelo
24“Thapelo ena e bile joana: ‘Morena, Morena Molimo, 'Mopi oa lintho tsohle, ea tšabehang 'me ea matla, ea nang le toka 'me ea lereko; uena u inotši u leng khosi, u leng ea molemo, 25uena u inotši u leng mohau, uena u inotši u leng ea lokileng, ea matla 'ohle, oa bosafeleng, ke uena ea pholosang Iseraele bobeng bohle, ea ileng a khetha bo-ntat'a rona 'me ua ba halaletsa. 26Ak'u amohele sehlabelo sena bakeng sa sechaba sohle sa hao sa Iseraele, u sireletse seabo sa hao 'me u se hlohonolofatse. 27Phutha batho ba habo rona ba qhalakaneng; lopolla bao e leng makhoba a balichaba, 'me u talime ba nyelisoang 'me ba nyonngoang; e le hore balichaba ba tle ba tsebe hore u Molimo oa rona. 28Otla ba re hateletseng 'me ba re hlekefetsang ka boikhohomoso. 29Khomaretsa sechaba sa hao Qalong ea hao e halalelang, joalokaha Moshe a boletse.’ ”
Khosi ea Peresiea e tsebisoa taba ea mollo
30“Eaba baprista ba bina lifela. 31Hoba linyehelo tsa sehlabelo li chesoe kaofela, Nehemia a laela hore metsi a neng a setse a tšeloe holim'a majoe a maholo. 32Ha etsoa joalo, 'me ha hlaha lelakabe ho 'ona; empa la metsoa ke khanya e tsoang aletareng e mabapa le 'ona.
33“Eitse ha tsena li qala ho tsebahala, khosi ea Baperesiea ea tlaleheloa hore, sebakeng seo baprista ba isitsoeng kholehong ba neng ba patile mollo ho sona, ho hlahile metsi, ao ka 'ona Nehemia le ba neng ba e-na le eena, ba ileng ba chesa linyehelo tsa sehlabelo. 34Khosi ea romela batho ho batlisisa bonnete ba taba eo; ba lika-liketsa sebaka sena ka motero, ho se etsa qalo e halalelang. 35Khosi ea ba ea fumana phaello e ngata ka eona, 'me ea atisa ho nea karolo e 'ngoe ea lichelete ho balebeli bao a ba siileng teng. 36Batho ba Nehemia ba bitsa metsi ao ‘nefetare’ ke ho re tlhoekiso; empa ba bangata ba a bitsa ‘nafeta’.”
