Baiseraele ba loana le Bamoabe
1Ka selemo sa leshome le metso e robeli sa puso ea Jehoshafate, khosi ea Juda, Jorame, mora oa Akabe, a qala ho busa naha ea Iseraele, a le Samaria. A busa ka lilemo tse leshome le metso e 'meli. 2A etsa bobe mahlong a Morena, le hoja bo sa ka ba ba bokaalo ka ba ntat'ae le ba 'm'ae. O ile a tlosa sefika sa Baale, seo ntat'ae a neng a se hlomme. 3Leha ho le joalo, a 'na a khomarela sebe seo Jeroboame, mora oa Nebate, a neng a etse hore Baiseraele ba siteloe Morena ka sona.
4Mesha, khosi ea Moabe, e ne e le morui oa linku. Ka selemo se seng le se seng o ne a ntšetsa khosi ea Iseraele lekhetho ka likonyana tse likete tse lekholo, le ka boea ba lipheleu tse likete tse lekholo. 5Empa hoba Akabe a shoe, khosi ea Moabe ea fetohela khosi ea Iseraele.
6Eaba khosi Jorame o tloha Samaria, o khōbōkanya mabōtho 'ohle a Iseraele. 7A rōmela molaetsa ho Jehoshafate, khosi ea Juda, a re: “Khosi ea Moabe e mphetohetse; na re tla ea le uena ho ea futuhela Bamoabe?”
Khosi ea Juda ea re: “Ke tla ea. Rōna le uena re ntho e le 'ngoe; sechaba sa ka ke sechaba sa hao, le lipere tsa ka ke lipere tsa hao.”
8Jehoshafate a ba a botsa, a re: “Re tla nka tsela efe ha re futuha?”
Jorame a araba, a re: “Re tla nka tsela ea lehoatata la Edomo.”
9Joale likhosi tsa Iseraele, le Juda, le Edomo, tsa tsamaea leeto la matsatsi a supileng, metsi a nooang ke bahlabani le liphoofolo a ba a fela.
10Eaba khosi ea Iseraele e re: “Jo! Morena o bitsitse likhosi tsena tse tharo ho tla neelana ka tsona matsohong a khosi ea Moabe!”
11Joale Jehoshafate a re: “Na moporofeta oa Morena ha a eo moo, eo re ka reng a re botsetse ho Morena?”
E mong oa bahlanka ba khosi ea Iseraele a araba, a re: “Elisha, mora oa Shafate, o teng mona. Ke eena eo e neng e le mosebeletsi oa Elia.”
12Jehoshafate a re: “Elisha ke moporofeta oa Morena.” Eaba likhosi tsa Iseraele, le Juda, le Edomo, li theohela ho eena.
13Elisha a re ho khosi ea Iseraele: “U nkene ka'ng? Tsamaea, u e'o botsa baporofeta ba ntat'ao, le baporofeta ba 'm'ao!”
Empa khosi ea Iseraele ea re ho eena: “Che, ke Morena ea bitsitseng likhosi tsena tse tharo ho tla neelana ka tsona matsohong a khosi ea Moabe.”
14Elisha a re: “Ka Morena oa mabōtho, ea phelang, eo ke mo sebeletsang, hoja e ne e se ka baka la hobane ke hlompha Jehoshafate, khosi ea Juda, le ho u sheba ke ne nke ke ka u sheba. 15Ntlisetseng seletsi sa harepa!”
Eare ha seletsi se ntse se letsa harepa ea sona, matla a Morena a theohela holim'a Elisha, 16'me a re: “Morena o bua tjena: ‘Cheka mekoti kahar'a khohlo ena.’ 17Hape Morena o bua tjena: ‘Le ke ke la bona moea kapa pula, empa khohlo ena eona e tla tlala metsi, e le hore le tle le noe, lōna le liphoofolo tsa lōna, le lipelesa tsa lōna.’ 18Mahlong a Morena hona ke ntho e nyenyane, hobane Morena o tla neelana ka Bamoabe matsohong a lōna. 19Le tla timetsa metse eohle e nang le liqhobosheane, le metse eohle ea litlètlè le rèmè le lifate tsohle tse ntle, le kate liliba tsohle, le senye le masimo a matle ka ho hasanya majoe har'a 'ona.”
20Ka la hosasane, ka nako ea ha ho etsoa nyehelo ea lijo, ba bona metsi a hlaha, a e-tsoa nq'a Edomo, 'me naha ea tlala metsi.
21Ha Bamoabe bohle ba utloa hore likhosi li nyolohile ho tla ba futuhela, ba khōbōkanya bohle ba neng ba ka nka lihlomo, ho tloha ho ba banyenyane, ho ea fihla ho ba baholo, 'me ba fihla ba hloma meeling. 22Ba tsoha e sa le ka malungoalungoana, 'me ha letsatsi le phatsima holim'a metsi, Bamoabe ba bona metsi a kapele ho bona a le mafubelu, a re tlere! 23Eaba ba re: “Hona ke mali! Ruri likhosi tsena li loantšane, tsa bolaeana. He! Bamoabe, lelobelo ke leo!”
24Ha Bamoabe ba fihla liahelong tsa Baiseraele, Baiseraele ba raoha, ba futuhela Bamoabe, hoo Bamoabe ba bileng ba baleha. Empa Baiseraele ba tsamaea ba ntse ba ba etsa mofela ho ea fihla naheng ea habo bona. 25Ba heletsa metse, 'me masimong 'ohle a matle monna ka mong a akhela lejoe la hae, masimo ao a tlala majoe. Ba kata liliba tsohle, ba rema le lifate tsohle tse ntle. Ke motse oa Kire-Herese feela o sa kang oa heletsoa; leha ho le joalo, bo-ramatjeketjane ba o pota-pota, ba o ruthutha ka majoe.
26Ha khosi ea Moabe e bona hore e imeloa ke ntoa, ea nka banna ba makholo a supileng ba lisabole, hore ba phunyeletse ho ea fihla ho khosi ea Edomo, empa ba sitoa. 27Joale khosi ea Moabe ea nka mora oa eona oa matsibolo, ea neng a tla e hlahlama, ea etsa nyehelo ea secheso ka eena holim'a lerako. Baiseraele ba kenoa ke letsoalo hoo ba ileng ba tloha motseng oo, ba khutlela naheng ea habo bona.
