2 LIKHOSI 17

₁Ka selemo sa leshome le metso e 'meli Akase e le khosi ea Juda, Hoshea, mora oa Ela, a qala ho busa sechaba sa Iseraele, a le Samaria. O ile a busa ka lilemo tse robong. ₂A etsa bobe mahlong a Morena, empa e seng joaloka likhosi tsa Iseraele tse bileng teng pele ho eena.

₃A futuheloa ke Salemanesere, khosi ea Asiria, Hoshea ea e-ba mohlanka oa hae, 'me a mo ntšetsa lekhetho. ₄Khosi ea Asiria ea hlokomela hore Hoshea o se a e fetohetse, hobane o ne a ile a rōmela maqosa ho So, khosi ea Egepeta, a bile a se a sa ntše le lekhetho joalokaha a ne a ntse a etsa ka selemo le selemo. Ka lebaka lena, khosi ea Asiria ea mo tšoara, ea mo koalla chakaneng.

₅Joale khosi ea Asiria ea futuhela naha eohle, ea nt'o futuhela Samaria, ea etsetsa motse oo thibella ka lilemo tse tharo.

₆Ka selemo sa borobong sa puso ea Hoshea, khosi ea Asiria ea hapa motse oa Samaria. Ea thōpa Baiseraele, ea ba isa naheng ea Asiria, ea ba bea Hala, le pel'a nōka ea Habore, e Gosane, ea ba bea le metseng ea Bamede.

₇Tsena li etsahetse kahobane sechaba sa Iseraele se ne se ile sa siteloa Morena Molimo oa sona, ea neng a ile a se ntša naheng ea Egepeta, tlas'a puso ea Faro, khosi ea Egepeta, 'me sa sebeletsa melimo e meng. ₈Hape sa latela meetlo ea lichaba tseo Morena a neng a li leleke kapele ho sona, le meetlo e qapiloeng ke likhosi tsa Iseraele. ₉Ka sekhukhu bana ba Iseraele ba etsa lintho tse sa khahliseng Morena Molimo oa bona. Ba ikhahela libaka tseo ho rapelloang melimo ea bohata ho tsona, metseng eohle ea bona, e menyenyane le e meholo. ₁₀Ba hloma lifika tseo ba li khumamelang, le litšoantšo tsa Ashera holim'a maralla 'ohle, le katlas'a lifate tsohle tse talana. ₁₁Ba chesetsa mokubetso hona teng, joalokaha lichaba tseo Morena a neng a li leleke kapele ho bona li ne li etsa. Ba etsa lintho tse mpe, 'me ba halefisa Morena. ₁₂Hape ba khumamela melingoana ea litšoantšo eo Morena a ileng a bua ka eona, a re: “Le se ke la e khumamela.”

₁₃Morena o ne a se a ile a lemōsa Baiseraele le ba naha ea Juda ka baporofeta le ka linōhe, a re: “Furallang mekhoa ena ea lōna e mebe, le bōlōke melao ea ka, le litaelo tsa ka, ho ea kamoo ke neng ke laele bo-ntat'a lōna kateng. Tsena ke ne ke li rōmele ho lōna ka bahlanka ba ka, e leng baporofeta.”

₁₄Leha ho le joalo, bana ba Iseraele ha baa ka ba mamela, ba e-ba manganga joaloka bo-ntat'a bona, ba sa kang ba tšepa Morena Molimo oa bona. ₁₅Ba hana litaelo, ba koenehela selekane seo Morena a neng a se etse le bo-ntat'a bona, le litemōso tsa hae, tseo a neng a ba lemōse ka tsona. Ba latela mafeela, 'me le bona ba fetoha mafeela. Ba etsisa bahetene ba neng ba ahelane le bona, athe Morena o ne a ile a ba laela hore ba se ke ba ba etsisa.

₁₆Ba furalla melao eohle ea Morena Molimo oa bona: Ba ipōpela litšoantšo tse peli tsa manamane, ba iketsetsa setšoantšo sa Ashera; ba khumamela letsatsi, le khoeli, le linaleli, ba sebeletsa Baale. ₁₇Ba etsa sehlabelo sa secheso ka bara ba bona le ka barali ba bona; ba sebelisa bonohe le boloi, ba etsa bokhopo mahlong a Morena, hore ba mo halefise.

₁₈Ka baka leo, Morena a halefela Baiseraele haholo, a ba lelekela hōle le sefahleho sa hae, ha se ke ha sala le ea mong, haese ba morabe oa Juda feela.

₁₉Le bona Bajuda ha baa ka ba bōlōka melao ea Morena Molimo oa bona, hobane ba ile ba etsa tseo Baiseraele ba neng ba ile ba li etsa. ₂₀Morena a furalla litlōhōlō tsohle tsa Baiseraele, a li hlōkōfatsa, a neelana ka tsona matsohong a batlatlapi ba tsona, ho fihlela a li lelekela hōle le sefahleho sa hae.

₂₁Morena a arohanya Baiseraele ho ba ntlo ea Davida, eaba Baiseraele ba bea Jeroboame, mora oa Nebate, hore e be khosi ea bona. Jeroboame a khelosa Baiseraele hore ba se hlole ba latela Morena, 'me a etsa hore ba siteloe Morena haholo. ₂₂Bana ba Iseraele ba etsa libe tsohle tseo Jeroboame a ileng a li etsa, ba se ka ba li tlohela; ₂₃ho fihlela Morena a ba lelekela hōle le sefahleho sa hae, joalokaha a ne a bolele ka bahlanka ba hae, e leng baporofeta. Ka mokhoa o joalo, Baiseraele ba ntšoa naheng ea bona, ba isoa naheng ea Baasiria, moo ba ntseng ba le hona teng le kajeno-ea-bokajeno.

₂₄Joale khosi ea Asiria ea tlisa batho ba tsoang Babilona, le Kuta, le Afa, le Hamate, le Sefarafaime, ea ba bea metseng ea Samaria, moo e neng e le ha Baiseraele. Samaria ea e-ba ea bona, 'me ba aha metseng ea eona. ₂₅Ha ba ne ba qala ho fihla moo, ba ne ba sa hlomphe Morena. Ka baka leo, Morena a ba rōmella litau, tsa bolaea ba bang ba bona. ₂₆Ka hona ba tsebisa khosi ea Asiria, ba re: “Lichaba tseo u li tlositseng moo li neng li ahile teng, 'me ua li bea metseng ea Samaria, ha li tsebe molao oa Molimo oa naha eo. Ka baka leo, Molimo eo o li rōmetse litau; li bolaea lichaba tseo, hobane ha li tsebe molao oa Molimo oa naha eo.”

₂₇Eaba khosi ea Asiria e laela, e re: “Tsamaeang le e mong oa baprista bao le ileng la ba tlisa mona, a e'o lula moo, 'me a ba rute molao oa Molimo oa naha eo.” ₂₈Joale e mong oa baprista ba neng ba thōpiloe Samaria a tsamaea, a ea aha Bethele, 'me a ba ruta ho hlompha Morena.

₂₉Leha ho le joalo, sechaba ka seng sa iketsetsa melimo ea sona, sa e bea litempelaneng tse libakeng tseo ho rapelloang melimo ea bohata ha tsona, tseo Basamaria ba neng ba li hahile. Sechaba ka seng se ne se etsa joalo metseng eo se neng se ahile ho eona. ₃₀Bafalali ba tsoang Babilona ba iketsetsa molimo o bitsoang Sukote-Benote; ba tsoang Kuta ba iketsetsa o mong o bitsoang Neregale; ba tsoang Hamate ba iketsetsa o bitsoang Ashima. ₃₁Ba tsoang Afa ba iketsetsa molimo o bitsoang Nibehase le Taretake; ba tsoang Sefara bona ba etsa linyehelo tsa secheso ka bana ba bona, ba li etsetsa Adarameleke le Anameleke, e leng melimo ea Sefarafaime. ₃₂Leha batho bana ba ne ba ntse ba hlompha Morena, ba ile ba ikhethela baprista mefuteng eohle ea bona, ba neng ba ba etsetsa mahlabelo libakeng tseo ho rapelloang melimo ea bohata ho tsona. ₃₃Ba ne ba hlompha Morena, empa ba ntse ba sebeletsa melimo eo ea bona, joalokaha ba ne ba ntse ba e sebeletsa linaheng tseo ba tsoang ho tsona.

₃₄Le kajeno-ea-bokajeno ba sa ntse ba phela ho ea ka meetlo eo ea bona ea pele. Ha ba hlomphe Morena, 'me ha ba phethe litaelo, kapa melao eo Morena a neng a e laele bana ba Jakobo, eo a neng a mo ree lebitso la Iseraele. ₃₅Ke bona bao Morena a neng a etse selekane le bona, 'me a ba laela, a re: “Le se ke la hlompha melimo e meng, le se ke la e khumamela, leha e le ho e sebeletsa, kapa ho e etsetsa mahlabelo. ₃₆Empa le hlomphe Morena ea le ntšitseng naheng ea Egepeta ka matla a maholo, le ka letsoho le otlolohileng. Le khumamele eena, 'me le etsetse eena mahlabelo. ₃₇Kamehla eohle le bōlōke litaelo le melao eo a le ngoletseng eona, 'me le se ke la hlompha melimo e meng. ₃₈Le se ke la lebala selekane seo ke se entseng le lōna, 'me le se ke la hlompha melimo e meng. ₃₉Le mpe le hlomphe Morena Molimo oa lōna, 'me o tla le namolela matsohong a lira tsa lōna tsohle.”

₄₀Leha ho le joalo, ha baa ka ba mamela; ba 'na ba phela ho ea ka meetlo ea bona ea pele.

₄₁Lichaba tsena li ne li hlompha Morena, empa tsona, le bana ba tsona, le litlōhōlō tsa tsona, tsa 'na tsa sebeletsa le melimo ea tsona ea litšoantšo tse betliloeng. Joalokaha bo-ntat'a tsona ba ne ba etsa, le tsona li ntse li etsa joalo le kajeno-ea-bokajeno.