2 LIKHOSI 15

₁Ka selemo sa mashome a mabeli a metso e supileng sa puso ea Jeroboame, khosi ea Iseraele, Asariea, mora oa Amasiea, khosi ea Juda, a qala ho busa. ₂O ne a e-na le lilemo tse leshome le metso e tšeletseng ha a qala ho busa. A busa ka lilemo tse mashome a mahlano a metšo e 'meli, a le Jerusalema. Lebitso la 'm'ae e ne e le Jekoleea, eo hahabo e neng e le Jerusalema. ₃Asariea a khahlisa Morena, joalokaha Amasiea, ntat'ae, a ne a ile a etsa. ₄Feela ha a ka a felisa libaka tseo ho rapelloang melimo ea bohata ho tsona. Sechaba sa 'na sa etsetsa mahlabelo libakeng tseo, sa chesetsa le mokubetso hona teng.

₅Morena a otla khosi, 'me khosi ea e-ba molepera ho fihlela e e-shoa. Khosi ea phela e le inotši tlung e kathoko. Jotame, mora oa khosi, e ne e le eena mookameli oa lelapa la khosi, a bile a busa naha eo.

₆Liketso tse ling tsa Asariea, le tsohle tseo a ileng a li etsa, li ngotsoe Bukeng ea Liketsahalo tsa Likhosi tsa Juda. ₇Asariea a shoa, 'me a epeloa le bo-ntat'ae, Motseng oa Davida. Jotame, mora oa hae, a mo hlahlama.

₈Ka selemo sa mashome a mararo a metso e robeli sa puso ea Asariea, khosi ea Juda, Sakariea, mora oa Jeroboame, a qala ho busa Iseraele, a le Samaria. A busa ka likhoeli tse tšeletseng. ₉A etsa bobe mahlong a Morena, joalokaha bo-ntat'ae ba 'nile ba etsa; a se ke a tlohela libe tsa Jeroboame, mora oa Nebate, ea neng a etse hore Baiseraele ba siteloe Morena. ₁₀Shalōme, mora oa Jabeshe, a mo rera, a mo hlaba pontšeng ea batho, a 'molaea, 'me a ikhapela puso.

₁₁Liketso tse ling tsa Sakariea li ngotsoe Bukeng ea Liketsahalo tsa Likhosi tsa Iseraele. ₁₂Tsena li phethahetse ho ea ka polelo ea Morena, eo a neng a e bue ho Jehu, a re: “Bana ba hao, ho isa molōkong oa bone, ba tla busa sechaba sa Iseraele.” Ho ile ha fela ha e-ba joalo.

₁₃Shalōme, mora oa Jabeshe, a qala ho busa ka selemo sa mashome a mararo a metso e robong sa puso ea Usiea, khosi ea Juda. A busa khoeli, a le Samaria. ₁₄Menaheme, mora oa Gadi, o ne a ile a tloha Tiresa, a ea Samaria, moo a ileng a fihla a hlaba Shalōme, mora oa Jabeshe, a 'molaea, 'me a ikhapela puso.

₁₅Liketso tse ling tsa Shalōme, le bohlabaphieo boo a ileng a bo etsa, li ngotsoe Bukeng ea Liketsahalo tsa Likhosi tsa Iseraele.

₁₆Menaheme a ripitla motse oa Tifesa, le bohle ba neng ba le ka ho oona. A ripitla le batho ba naha e o pota-potileng, ho tloha Tiresa, hobane ba ne ba ile ba re ho eena motse oo ha o kenoe. A o ripitla ka lona lebaka leo. Baimana ba motse oo a ba phatlōla limpa.

₁₇Ka selemo sa mashome a mararo a metso e robong sa puso ea Asariea, khosi ea Juda, Menaheme, mora oa Gadi, a qala ho busa Iseraele. A e busa ka lilemo tse leshome, a le Samaria. ₁₈A etsa bobe mahlong a Morena. Ka nako eohle ea bophelo ba hae, a se ke a tlohela libe tsa Jeroboame, mora oa Nebate, ea ileng a etsa hore Baiseraele ba siteloe Morena.

₁₉Pule, khosi ea Asiria, a futuhela naha ea Iseraele. Menaheme a thēlla Pule ka silefera e boima ba likilo tse likete tse mashome a mararo a metso e mene, hore Pule a tle a mo thuse, a mo tsitsise bokhosing. ₂₀Menaheme o ne a ile a ntšisa barui ba Baiseraele sethabathaba, monna ka mong a ntša lichelete tsa silefera tse ka bang boima ba halofo ea kilo, hore a tle a thèllè khosi ea Asiria ka chelete eo. Eaba khosi ea Asiria ea khutla, ea se ke ea lula naheng eo ea Iseraele.

₂₁Liketso tse ling tsa Menaheme, le tsohle tseo a ileng a li etsa, li ngotsoe Bukeng ea Liketsahalo tsa Likhosi tsa Iseraele. ₂₂Menaheme a shoa; Pekahiea, mora oa hae, a mo hlahlama.

₂₃Ka selemo sa mashome a mahlano sa puso ea Asariea, khosi ea Juda, Pekahiea, mora oa Menaheme, a qala ho busa, a le Samaria. A busa ka lilemo tse peli. ₂₄Pekahiea a etsa bobe mahlong a Morena, a se ke a tlohela libe tsa Jeroboame, mora oa Nebate, ea neng a etsa hore Baiseraele ba siteloe Morena. ₂₅Peka, mora oa Remaleea, molaoli oa mabōtho a hae, a e-na le Aregobe le Are, le banna ba mashome a mahlano ba Bagileade, a mo rera, 'me a 'molaela Samaria ka qhobosheaneng e kahare ho ntlo ea khosi. Peka a mo hlahlama.

₂₆Liketso tse ling tsa Pekahiea, le tsohle tseo a ileng a li etsa, li ngotsoe Bukeng ea Liketsahalo tsa Likhosi tsa Iseraele.

₂₇Ka selemo sa mashome a mahlano a metso e 'meli sa puso ea Asariea, khosi ea Juda, Peka, mora oa Remaleea, a qala ho busa naha ea Iseraele, a le Samaria. A busa ka lilemo tse mashome a mabeli. ₂₈A etsa bobe mahlong a Morena, a se ke a tlohela libe tsa Jeroboame, mora oa Nebate, ea ileng a etsa hore Baiseraele ba siteloe Morena.

₂₉Mehleng ea Peka, khosi ea Iseraele, Tigelate-Pilesere, khosi ea Asiria, a futuha, 'me a thōpa batho ba Ione, le ba Abele-Bete-Maaka, le ba Janōoa, le ba Kedeshe, le ba Hasore, le ba Gileade, le ba Galelea, le ba naha eohle ea Nafthali, a ba isa Asiria. ₃₀Hoshea, mora oa Ela, a rera Peka, mora oa Remaleea. A mo hlaba, a 'molaea, 'me a ikhapela bokhosi. E ne e le ka selemo sa mashome a mabeli sa puso ea Jotame, mora oa Usiea.

₃₁Liketso tse ling tsa Peka, le tsohle tseo a ileng a li etsa, li ngotsoe Bukeng ea Liketsahalo tsa Likhosi tsa Iseraele.

₃₂Ka selemo sa bobeli sa puso ea Peka, mora oa Remalia, khosi ea Iseraele, Jotame, mora oa Usiea, khosi ea Juda, a qala ho busa. ₃₃O ne a e-na le lilemo tse mashome a mabeli a metso e mehlano ha a qala ho busa. A busa ka lilemo tse leshome le metso e tšeletseng, a le Jerusalema. Lebitso la 'm'ae e ne le Jerusha, morali oa Sadoke. ₃₄Jotame a khahlisa Morena, a etsa joalokaha Usiea, ntat'ae, a ile a etsa. ₃₅Feela ha aa ka a felisa libaka tseo ho rapelloang melimo ea bohata ho tsona. Sechaba sa 'na sa etsetsa mahlabelo libakeng tseo, sa chesetsa le mokubetso hona teng. Ke eena ea ileng a haha khoro ea Tempele, e bitsoang Khoro ea Leboea.

₃₆Liketso tse ling tsa Jotame, le tsohle tseo a ileng a li etsa, li ngotsoe Bukeng ea Liketsahalo tsa Likhosi tsa Juda. ₃₇Mehleng eo, Morena a etsa hore Resine, khosi ea Arame, le Peka, mora oa Remaleea, ba futuhele naha ea Juda. ₃₈Jotame, a shoa, 'me a epeloa le bo-ntat'ae, Motseng oa Davida. Akase, mora oa hae, a mo hlahlama.