Puso ea Amasiea, khosi ea Juda
1Ka selemo sa bobeli sa puso ea Jehōoashe, mora oa Jehōoakase, khosi ea Iseraele, Amasiea, mora oa Jōoashe, khosi ea Juda, a qala ho busa. 2O ne a e-na le lilemo tse mashome a mabeli a metso e mehlano, ha a qala ho busa, 'me a busa ka lilemo tse mashome a mabeli a metso e robong, a le Jerusalema. Lebitso la 'm'ae e ne e le Jehōoadane, eo hahabo e neng e le Jerusalema. 3Amasiea a khahlisa Morena, feela e seng joaloka Davida, ntat'ae-moholo. A tsamaea mehlaleng ea Jōoashe, ntat'ae; 4feela ha aa ka a felisa libaka tseo ho rapelloang melimo ea bohata ho tsona. Sechaba sa 'na sa etsetsa mahlabelo libakeng tseo, sa chesetsa le mokubetso hona teng.
5Eare ha a se a tsitsitse bokhosing ba hae, a bolaea bahlanka ba hae ba neng ba bolaee khosi, e leng ntat'ae. 6Empa a se ke a bolaea bana ba babolai bao, ho ea ka Molao o ngotsoeng Bukeng ea Moshe, moo Morena a laetseng, a re: “Bo-ntat'a ha ba ka ke ba bolaoa ka baka la bana ba bona, le bana ha ba ka ke ba bolaoa ka baka la bo-ntat'a bona, empa motho ka mong o tla bolaeloa sebe sa hae.”
7Amasiea a bolaela Baedomo ba likete tse leshome ka Khohlong ea Letsoai, a ba a hapa Sela, a e rea lebitso la Jokotheele, 'me e ntse e bitsoa joalo le kajeno-ea-bokajeno.
8Joale Amasiea a rōmela maqōsa ho Jehōoashe, mora oa Jehōoakase, mora oa Jehu, khosi ea Iseraele, a re: “Tloo re tl'o lebanya lithèbè!”
9Empa Jehōoashe, khosi ea Iseraele, a araba Amasiea, khosi ea Juda, a re: “Hlabahlabane ea Lebanone e kile ea rōmela molaetsa ho kedare ea Lebanone, ea re: ‘Nea mora oa ka morali oa hao, a mo nyale!’ Eaba ho feta sebatana sa Lebanone, se fihla se hatakela hlabahlabane eo. 10U fela u hlōtse Baedomo, joale u se u le makokonyana! Thabela hona, u itulele ha hao. U ratela'ng ho ikenya tsietsing e tla u timetsa, e be e timetse le sechaba sa Juda?” 11Empa Amasiea a se ke a mo mamela. Ka baka leo, Jehōoashe, khosi ea Iseraele, a nyoloha, 'me eena le Amasiea, khosi ea Juda, ba lebanya lithèbè ba le Bete-Shemeshe e naheng ea Juda. 12Baiseraele ba imela Bajuda, 'me Bajuda ba baleha, e mong le e mong a balehela lapeng la hae. 13Moo Bete-Shemeshe, Jehōoashe, khosi ea Iseraele, a thōpa Amasiea, khosi ea Juda, mora oa Jōoashe, setlōhōlō sa Akasia. A fihla Jerusalema, a heletsa lerako la eona ho tloha khorong ea Efraime, ho ea fihla khorong e hukung. E ne e le sebaka se ka bang bolelele ba limethara tse makholo a mabeli. 14A hahara khauta eohle, le silefera, le thepa e neng e le ka Tempeleng ea Morena, le e neng e le ka letlōleng la ntlo ea khosi; a thōpa batho, eaba o khutlela Samaria.
15Liketso tse ling tsa Jehōoashe, le tsa bohlabani ba hae, le kamoo a neng a loantše Amasiea, khosi ea Juda kateng, li ngotsoe Bukeng ea Liketsahalo tsa Likhosi tsa Iseraele. 16Jehōoashe a shoa, 'me a epeloa Samaria le likhosi tsa Iseraele. Jeroboame, mora oa hae, a mo hlahlama.
Lefu la Amasiea, khosi ea Juda
17Amasiea, mora oa Jōoashe, khosi ea Juda, a phela lilemo tse leshome le metso e mehlano, kamorao ho lefu la Jehōoashe, mora oa Jehōoakase, khosi ea Iseraele. 18Liketso tse ling tsa Amasiea li ngotsoe Bukeng ea Liketsahalo tsa Likhosi tsa Juda.
19E ile eare hoba ba mo tsohele matla, a le Jerusalema, a balehela Lakishe. Empa ba mo salisa bahlabani morao ho ea fihla Lakishe, moo ba ileng ba 'molaela teng. 20Ba bofa setōpō sa hae pereng, ba mo epela le bo-ntat'ae, Jerusalema, Motseng oa Davida.
Puso ea Asariea, khosi ea Juda
21Sechaba sohle sa Juda sa bea Asariea setulong sa Amasia, ntat'ae. O ne a e-na le lilemo tse leshome le metso e tšeletseng. 22Ke eena ea ileng a haheletsa Elate, a ba a e khutlisetsa Juda. Kamorao ho moo, khosi ea e-shoa.
Puso ea Jeroboame, khosi ea Iseraele
23Ka selemo sa leshome le metso e mehlano sa puso ea Amasia, mora oa Jōoashe, khosi ea Juda, Jeroboame, mora oa Jehōoashe, khosi ea Iseraele, a qala ho busa, a le Samaria. A busa ka lilemo tse mashome a mane a motso o mong. 24Jeroboame a etsa bobe mahlong a Morena, a se ke a tlohela le se seng sa libe tsa Jeroboame, mora oa Nebate, ea ileng a etsa hore Baiseraele ba siteloe Morena. 25O ile a busetsa meeli ea Iseraele litulong tsa eona, ho tloha ka Lekhalo la Hamate, ho ea fihla Leoatleng la Letsoai. Hona ha phethahala ho ea ka polelo ea Morena Molimo oa Iseraele, eo a neng a e bue ka mohlanka oa hae, moporofeta Jonase, mora oa Amitai oa Mogate-Hefere.
26Morena o ne a ile a bona hore Baiseraele ba matšoenyehong a maholo, hobane ho ne ho se le ea mong oa bona ea neng a setse, ebang ke lekhoba, kapa hase lekhoba, 'me ho ne ho se mang oee! ea ba thusang. 27Morena o ne a sa ka a re o tla hlakola lebitso la Iseraele lefatšeng; ka hona a ba pholosa ka Jeroboame, mora oa Jehōoashe.
28Liketso tse ling tsa Jeroboame, le tsohle tseo a ileng a li etsa, le tsa bohlabani ba hae, le kamoo a neng a loane kateng, le kamoo a ileng a hapela Iseraele Damaseka le Hamathe kateng, tseo e neng e le tsa Juda, tsena tsohle li ngotsoe Bukeng ea Liketsahalo tsa Likhosi tsa Iseraele. 29Jeroboame, a shoa, a epeloa le likhosi tsa Iseraele. Sakariea, mora oa hae, a mo hlahlama.
