Puso ea Jōoashe, khosi ea Juda
1Jōoashe o ne a qale ho busa ka selemo sa bosupa sa puso ea Jehu, 'me a busa ka lilemo tse mashome a mane, a le Jerusalema. Lebitso la 'm'ae e ne e le Sebiea, eo hahabo e neng e le Beeresheba. 2Jōoashe a khahlisa Morena ka nako eohle eo moprista Jehoeada a neng a ntse a mo tataisa ka eona; 3feela ha aa ka a felisa libaka tseo ho rapelloang melimo ea bohata ho tsona. Sechaba sa 'na sa etsetsa mahlabelo libakeng tseo ho rapelloang melimo ea bohata ho tsona, sa chesetsa mokubetso hona teng.
4Jōoashe a re ho baprista: “Chelete eohle, eo e leng limpho tse abetsoeng Morena, e tlisoang ka Tempeleng ea Morena, e leng chelete eo motho ka mong a lekanyelitsoeng ho e ntša, le e lekanyelitsoeng ba tlas'a taolo ea hae, le chelete eohle eo motho a e ntšetsang Tempele ea Morena ka boithaōpo; 5lōna baprista, le e bōkelle ho batho bao le ba tsebang, le inkele eona; feela le thibe mapatso a Tempele ea Morena hohle moo a leng teng.”
6Empa ka selemo sa mashome a mabeli a metso e meraro sa puso ea khosi Jōoashe, baprista ba ne ba e-s'o ka ba thiba mapatso a Tempele ea Morena. 7Eaba khosi Jōoashe o bitsa moprista Jehoeada, le baprista ba bang, a re ho bona: “Ke ka lebaka la'ng le sa thibang mapatso a Tempele? Ka lebaka lena he, le se hlole le bōkella chelete ho batho bao le ba tsebang; le neelane ka e seng e le teng, ho tle ho thijoe mapatso a Tempele ka eona.” 8Baprista ba lumela hore ha ba sa tla hlola ba amohela chelete e tsoang sechabeng, le hore ha ba sa tla hlola ba thiba mapatso a Tempele.
9Eaba moprista Jehoeada o nka letlōle, o phunya lesoba holim'a sekoahelo sa lona, o le bea pel'a aletare, ka letsohong le letona ha motho a kena ka Tempeleng ea Morena. Baprista ba lebelang monyako ba ne ba kenya chelete eohle e neng e tlisoa Tempeleng ea Morena, ka letlōleng leo. 10E ne e ee ere ha ba bona hore chelete e se e le ngata ka letlōleng, ebe mongoli oa khosi, le Moprista e Moholo, baa tla, ba fihla ba bala chelete e ka Tempeleng ea Morena, ba nt'o e tšela ka mokotlaneng. 11Hoba ba e bale, ba ne ba ee ba e nee ba okametseng mosebetsi oa Tempele ea Morena; baokameli bana bona ba lefe batho ba neng ba betla lifate, le lihahi tse neng li haha Tempele ea Morena. 12Ba ne ba lefa le ba betlang majoe, le ba a thuang; ba reka lifate le majoe a thuiloeng, ho tla thiba mapatso a Tempele ea Morena, le ho phetha tsohle tse amanang le mosebetsi oa ho nchafatsa Tempele.
13Leha ho le joalo, ka chelete ena e neng e tlisitsoe ka Tempeleng ea Morena, ha hoa ka ha etsetsoa Tempele ea Morena likotlolo tsa silefera, le litima-mabone, le matlao, le literompeta, leha e le eng kapa eng ea khauta kapa ea silefera. 14Chelete eo ba e nea basebetsi, 'me ba nchafatsa Tempele ea Morena ka eona. 15Ebile ha baa ka ba belaela ka batho bao chelete e neng e le matsohong a bona, hobane ba ne ba tšepahala. 16Ha e le chelete ea nyehelo e tlosang tšito le e tlosang sebe, eona e ne e sa tlisoe ka Tempeleng ea Morena; e ne e le ea baprista.
17Joale Hasaele, khosi ea Arame, a nyoloha, a futuhela Gate, a e hapa, a nt'o rera ho futuhela Jerusalema. 18Eaba Jōoashe, khosi ea Juda, o nka lintho tsohle tse halalelang, tseo bo-ntat'ae Jehoshafate, le Jehorame, le Akasiea, likhosi tsa Juda, ba neng ba li abetse Morena; a nka le lintho tsa hae tsohle, tse halalelang, le khauta eohle e neng e le ka letlōleng la Tempele ea Morena, le ka tlung ea khosi, 'me tsena a li rōmela ho Hasaele, khosi ea Arame. Eaba Hasaele o tloha Jerusalema.
19Liketso tse ling tsa Jōoashe, le tsohle tseo a ileng a li etsa, li ngotsoe Bukeng ea Liketsahalo tsa Likhosi tsa Juda. 20Bahlanka ba hae ba mo rera, ba 'molaela tlung ea Milo, tseleng e theohelang Silla. 21A bolaoa ke bahlanka ba hae, bo-Josakara, mora oa Shimate, le Jehosabada, mora oa Shomere, 'me a shoa. A epeloa le bo-ntat'ae Motseng oa Davida, 'me Amasiea, mora oa hae, a mo hlahlama.
