2 BAKORINTHE 9

₁Tabeng ea lithuso tse etsetsoang balumeli, ha ho hlokahale hore ke le ngolle letho. ₂Ke tseba hore le thahasella ho thusa, 'me ke ithorisitse ka hona ho ba Masedonia, ka bolela hore ba Akaea ba se ba itokiselitse ho thusa ho tloha ngoahola. Mafōlōfōlō a lōna a phaphamisitse batho ba bangata. ₃Joale ke rōma bana babo rōna ho lōna, e le hore boithoriso boo ba rōna tabeng ena bo se ke ba fetoha lefeela, lōna le mpe le fumanoe le itokiselitse ho thusa joalokaha ke boletse. ₄Ho seng joalo, ha ba bang ba Masedonia ba ka tla le 'na, 'me ba fumana hore ha lea itokisa, tšepo e kaalo eo re e beileng ho lōna e tla re fetohela lihlong, ke se ke sa re letho ka lōna. ₅Ka hona ke ile ka hopola hore ke tšoanela ho kōpa bana bana babo rōna ho nketella pele, ba tle ba lokise limpho tseo le ntšepisitseng tsona. Ha li se li lokisitsoe, e tla ba limpho tsa sebele, e seng tsa bokhōnatha.

₆Tsebang hona: Ea jalang hanyenyane o tla kotula hanyenyane; athe ea jalang haholo o tla kotula haholo. ₇Motho ka mong a ke a fane ho ea kamoo a rerileng kateng ka pelong ea hae, e seng ka ho khanana kapa ka ho qōbelloa. Molimo o rata ea fanang a thabile. ₈Molimo o na le matla a ho le atisetsa linèo tsohle tsa hae, e le hore, kamehla, le tle le be le ho lekaneng linthong tsohle, le be le ngatafalloe haholo, hoo le ka tsebang ho etsa mesebetsi eohle e molemo. ₉Ke sona se ngotsoeng, ha ho thoe:

₁₀Ea sitsang mojali ka peō, le ka bohobe boo a ka bo jang, le lōna o tla le sitsa ka peō, a be a e ngatafatse, 'me a le atisetse litholoana tsa ho loka ha lōna. ₁₁O tla le ruisa kahohle-hohle, hoo le ka tsebang ho fana ka matsoho a mabeli. Ka rōna, hona ho tla tsoala teboho e isoang ho Molimo.

₁₂Efela tšebetso ena ea ho thusa, hase feela e tla fokotsa bohloki ba balumeli, empa e tšoanetse ho ba mohloli oa liteboho tse khaphatsehang tse isoang ho Molimo. ₁₃Ka ho ananela tšebetso eo, ba bangata ba tla tlotlisa Molimo ka baka la hobane le ikokobeletsa molaetsa o molemo oa Kreste oo le o pakang, le ka baka la hobane ka ho fana le arolelana le bona, esita le ba bang bohle. ₁₄Ba tla le rapella, hobane ba le rata ka baka la mohau o moholo oo Molimo a le etselitseng oona. ₁₅A re leboheng Molimo ka mpho ea hae e ke keng ea lekanngoa!